Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИАКОВОНЬ СЁРМАЦ

Глава 5

Мезе учсыне козятнень

1Тяни кулхцондода тинь, козят! Авардеда и кайгиста явседа зиянда, конат прайхть лангозонт.2Тинь козяшинте наксадсь и тинь щамонтень сивозень ки мелавсь.3Зрнянтень и сиянтень порезень шямонць. Тя шямонць няфтьсы тинь муворшинтень, и сон сивсы-юмафтсы ронгонтень, кода тол. Тинь кочкаде козяши ня мекольдень шитненди.4Ваность, тинь ашеде панне ярмак паксясонт сёронь нуйхненди, и сянкса синь явсихть-авардихть. Сёронь кочкайхнень пеняцямасна пачкодсть Саваоф Азорть пилес.5Тинь эряде модать лангса козяшиса и пяшкотькшнесть сембе мялентень. Тинь андость-куялгофтость эсь прянтень кода печкома шинди.6Тинь судендасть и шавость видексшиса эряйть, а сон ашезь уле каршек тейнть.

Уледа куватьс кирдикс

7Кемай ялгат, уледа куватьс кирдикс Азорть сама шинцты. Ванода, конашка оцю кирдемшкац сокайть-видить, кона ученды модать эзда козя раштафкс, и мзярс аф туй тундань али сёксень пизем.8Тейнтьке улема куватьс кирдикс. Кемокстасть седиентень, сяс мес Азорть самац ни маласа.9Кемай ялгат, тяда пеняця фкя-фкянь лангс, эста тинь аф ульхтяда судендафт. Судьясь ни кенкш лангса.10Кемай ялгат, мзярда пофтада маятамас, ванода пророкнень лангс, конат корхтасть Азорть эзда, кода синь кемоста ащесть и куватьс кирдезь сембе маятаматнень.11Минь лемнесаськ павазукс сятнень, конатненди кирдевсть сембе маятаматне. Тинь марьседе Иовонь кирдемшканц колга, и содасасть кодама эряфонь пе макссь тейнза Азорсь. Вдь Азорсь кельгозь ужяльди и лезды стакашис повфненди.

Варамать колга

12Васендакиге, кемай ялгане, мзярдовок тяда вара, – аф менельса, аф модаса и аф мезеньге лиянь лемса; катк «тяфта» валонте ули аньцек «тяфта» валкс, а «аф» валонте улеза аньцек «аф» валкс. Эста тинь аф ульхтяда судендафт.

Озондомать виец

13Кда кивок тинь ёткстонт маятай, ся катк озонды. Кда кие кеняртькс потмоса, ся катк морафты псалопт.14Кда кие ёткстонт сяряди, ся катк тердьсыне кемаень пуромксонь оцюнятнень, и синь катк озондыхть сярядить вельхксса и Азорть лемса вадьсазь сонь елейса.15Кемама мархта озондомась пчкафтсы сярядить, и Азорсь стяфтсы сонь. И кда ся ломанць тись пежет, синь нолдавихть тейнза.16Сяс виденцяда фкя-фкянди эсь пежентень колга и озондода фкя-фкянь инкса: эста пчкатада. Видексшиса эряй ломанть озондомац пяк лама тии.17Илия ульсь тяфтамка ломань, кода и минь. Но сон пяк озондсь: афоль ту пизем. И ашель пизем модать лангса колма кизот и кота кофт.18Меле сон тага озондсь, и эста тусть пизепне, и модась раштазе эсь иможенц.

19Кемай ялгане, кда кие эздонт туй шири видешинь киста, и кивок мрдафтсы сонь меки,20эста катк сон содасы: ся, кие мрдафтсы пежуть видешинь ки лангс, идесы пежуть ваймонц куломада и нолдафтсы лама пеженц.


предыдущая глава Глава 5 следующая глава