Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 5

Анания и Сапфира

1Фкя ломанць, конань лемоцоль Анания, Сапфира рьванц мархта мизь уликсснон.2Анания ярмакнень пяльксснон сёпозень, тянь колга содась рьвацка. А лядыксть кандозе и максозе апостолхненди.3Эста Пётр мярьгсь: «Анания, мес тон нолдайть Сатанать путомс седиезт мяльхть васькафтомс Иняру Ваймопожфть и сёпомс ярмакнень пяльксснон миф паксяцень инкса?4Мзярс ашить мишенде паксяцень, сон ульсь тонне, мимдонза мелевок ярмакне тоннетольхть. Мес тон арьсить тянь тиемс? Тон васькафнеть аф ломаттненди, а Шкайти».5Ня валхнень кулемда меле, Анания прась кулофста. Сембе, кит кульсть тянь колга, аф азомшка эводсть.6Од цёратне ашкодозь кулофть котфс, лихтезь ушу и калмазь.

7Колмошка частта меле сась тов рьвац. Сон мезевок ашезь сода тоса лисьфть колга.8Пётр кизефтезе сонь: «Азк, тнярода мисть паксянтень?» И ся азозе: «Стане, тнярода».9Эста Пётр мярьгсь тейнза: «Лисенди, тонга, мирдцевок корхтаде эсь ётковант варжамс Азорть Ваймопожфонц? Маряк! Мирдцень калмаензон аськолкссна кулевихть ни кенкш фтала, синь тоньге лихттядязь».10Тяка ёткть авась кулофста прась Пёторонь пильгонзонды. Цёратне сувасть и няезь кулоф авать, синь соньге лихтезь и калмазь мирденц ваксс.11Оцюдонга оцю пелема сявозе сембе кемаень пуромксть, и сембонь сятнень, кит кулезь тянь.

Дивань тефт и тяштькст

12-15Кемайхне пуромкшнесть сембе марс Соломононь вельхтяф пирьфсонза. Ширде кивок ашезь сменда шоворемс ёткозост, но сембе ломаттне пяк шназь синь. Азорти кемайхнень лувкссна касондсь: алятненьге, аватненьге. Апостолхнень вельде тиендевсь ломаттнень ёткса лама дивань тевда и тяштькста. Ломаттне нльне лихнезь сярядихнень ульцяв и путнезь кандомка и ацам лангс – малаваст ётамста праза лангозост хуш Пёторонь цильфоц.16Тяфта жа Иерусалиму сашендсь пяк лама ломань маластонь ошнень эзда. Синь каннесть сярядихть и аф ару ваймопожфса колафт, и сембе синь ульсть пчкафтфт.

Апостолхне пякстамгудсот

17Эста озксвятиень оцюнясь и сембе мархтонзотне, а нят ульсть саддукейхнень ёткста, пяшкодсть сельмонь каямада.18Синь кундазь апостолхнень и озафтозь ошень пякстамгудс.19Но веть Азорть ангелоц панжезень пякстамгудть кенкшензон и, лихтемок синь тоста, мярьгсь:20«Моледа, арада Шкаень кудть пирьфса и азондость ломаньтналти семботь тя од эряфть колга».21Валдашкодомшовор синь ни ульсть Шкаень кудса, кода тейст мярькфоль, и тонафнезь ломаттнень.

Тя ёткть озксвятиень оцюнясь и кит ульсть сонь мархтонза састь и тердезь Оцю пуромксть и сембе Израилень оцюнятнень, и кучсть покодихть пякстамгуду апостолхнень инкса.22Покодихне мольсть тов, но пякстамгудса сятнень ашезь му. Меки мрдамста синь азозь:23«Минь няеськ, пякстамгудсь ульсь кемоста пякстаф и кенкш видесонза ащесть ваныхть, но мзярда панжеськ кенкшть, потмоса кивок ашель».24Тянь кулемста озксвятиень оцюнясь, Шкаень кудонь ваныень оцюнясь и озксвятиень оцюнятне абонгодсть, ашезь шарьхкоде, мезе лиссь.25Тя пингть сась ломань и азозе тейст: «Кулесте, ся алятне, конатнень тинь пякстасть пякстамгудс, тяни Шкаень кудсот и тонафтыхть ломатть».26Эста Шкаень кудонь ваныень оцюнясь покодихнень мархта мольсь и вятезень апостолхнень Оцю пуромксть инголи, но аф вихца, сяс мес пельсть ломаттнень эзда – тязазь пикса кевса.

27Синь вятезь апостолхнень и ладязь Оцю пуромксть инголи. Озксвятиень оцюнясь кизефтезень синь:28«Кали минь аф кемоста кардадязь тонафтомда тя Ломанть лемса? А тинь эсь тонафтомасонт пяшкодесть Иерусалимть и нльне ёратада тя Ломанть куломанц веляфтомс минь лангозонк!»29Пётр и лядыкс апостолхне каршезост мярьгсть: «Тейнек кулхцондома Шкайсь ломаньда пяк.30Тинь шавость Иисусонь, эськодесть крёз лангс, но атянь-атяньконь Шкаец вельмафтозе Сонь кулофста.31Шкайсь кеподезе Сонь, озафтозе види кядь ширесонза и путозе Вятикс и Идикс, шарфтоза Израильсь Шкайти и нолдавозаст пеженза.32Минь тянь няеськ и тянь колга азонттама, минь и Иняру Ваймопожфсь, конань Шкайсь максозе сятненди, кит кулхцондсазь Сонь».

33Тянь кулемста Оцю пуромксти сувсихне лиссть эсьстост и ёразь шавомс апостолхнень.34Эста ёткстост стясь фкя фарисей, Гамалиил койти тонафтысь; сонь пяк кельгозе марнек ломаньтналсь. Сон мярьгсь аф ламос лихтемдост апостолхнень,35тяда меле пшкядсь Оцю пуромксти: «Израилень алят! Лацкас арьседа, мезе ёратада тиемс ня ломаттнень мархта.36Мяляфтсасть, кода аф кунара эвондась Февда. Сон лемдезе прянц кати-кодама оцюнякс и нилешка сяда ломань педсь тейнза. Но сонь шавозь, и сембе ширень кирдиенза срадсть и юмасть.37Тяда меле сёрматфтомань пингть эвондась Галилеянь Иудась и усксь мельганза лама ломань. Соньге шавозь, и сембе сят, кит мольсть мельганза, срадсть.38Сяс тяни корхтан тейнть: аердода ня ломаттнень эзда и нолдасть синь. Кда синь арьсефсна и тевсна ломаттнень эзда, сон сонць юмай,39а кда Шкайть эзда, тейнть аф машфтови. Афоль лисе стане, тинь тюрьхтяда Сонцень Шкайть мархта».

40Синь мяльс путозь Гамалиилонь валонзон. Меки тердезь апостолхнень, пикссефтезь, кардазь корхтамда Иисусонь лемса и нолдазь.41Апостолхне тусть Оцю пуромксста кеняртькшнезь, сяс мес тейст максовсь тя наругамась Иисус Азорть лемонц инкса.42Синь ашесть лотксе тонафтомда. Эрь шиня, Шкаень кудса и кудга синь азонкшнезь Пара кулять Иисус Христоть колга.


*а 5:37 сёрматфтомань пингсь – время переписи населения


предыдущая глава Глава 5 следующая глава