Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 23

1Павел варжакстсь Оцю пуромксонь ломаттнень лангс, мярьгсь: «Ялгат! Мон сембе эряфозень и тячиень шить самс ару ваймот эрянь Шкайть инголе».2Эста Анания, озксвятиень оцюнясь кошардозень Павелонь ваксса ащихнень эрьхтемс сонь кургти.3Тянь каршес Павел мярьгсь тейнза: «Тонь эрьхттянза Шкайсь, акшептф стена! Тон озать сей монь судендамон койть коряс, а тонць койть каршес молезь пиксфтат эсон».4«Тон сялдсак Шкайть озксвятиень оцюнянц?» – мярьгсть Павелонь ваксса ащихне.5«Мон ашине сода, ялгат, сон – озксвятиень оцюня. Сёрматфксса азф: Тяк сялда ломаньтналцень оцюнянц».

6Павел, лац содамок: Оцю пуромксть фкя пялезонза сувсесть саддукейхне, омбоцети фарисейхне, кайгиста мярьгсь Оцю пуромксса: «Ялгат! Мон фарисеян и фарисеень цёран! Монь судендасамазь сянкса, мес мон надиян кулофста вельмамать лангс!»7Кодак сон азозень ня валхнень, фарисейхне и садуккейхне кармасть эсь ётковаст пялькстома, и пуромкссь явсь.8Вдь саддукейхне корхтайхть, кле, аш кулофста вельмама, аш ангелхт, аш ваймопожфт, а фарисейхне меколанкт – кемайхть и сянди и тонанди.9Кеподсь оцю жалф, фарисейхнень ёткста кона-кона койти тонафтыхне пялькстомста корхтасть: «Минь аф мушенттама мезеньге кальдяв тя ломанть эса. Кда мархтонза корхтась ваймопожф али ангел, аф карматама молема Шкайть каршес».10Пялькстомасна оржамсь сяшкава, нльне тёжянень оцюнясь пелезевсь, афолезь сязенде Павелонь, сяс кошардозень ушматтнень сявомс Павелонь пуромксть ёткста и ильхтемс сонь ушманкуду.

11Омбоце веня Азорсь эвондась Павелонди и мярьгсь: «Тят пеле! Кода тон няфтеть-азондоть Монь колган Иерусалимса, стане тейть эряви няфтемс-азондомс Римсонга».

Павелонь каршес салавань арьсефсь

12Шобдава кона-кона еврейхне салава корхтасть эсь ётковаст и варасть мезьдонга аф ярхцамс, аф симомс, мзярс аф шавсазь Павелонь.13Салава корхтайда ульсь нильгемоньда лама ломань.14Синь мольсть озксвятиень оцюнятненди и ломаньтналонь оцюнятненди и азозь: «Минь вараме: мезьдонга аф ярхцатама, аф сиптяма, мзярс аф шавсаськ Павелонь.15А тинь, тяни, Оцю пуромксть мархта пшкядеда тёжянень оцюняти и мярьгода тейнза ванды лихтемс тяза Павелонь, бта ёрасасть лацкас ваномс сонь тевонц. Минь ульхтяма анокт, и шавсаськ сонь нинге тяза пачкодемда инголе».

16Тя салавань арьсефть колга кульсь Павелонь сазоронц цёрац. Сон мольсь ушманкуду и семботь азондозе Павелонди.17Эста Павел серьгядезе фкять сядонь оцюнятнень эзда и мярьгсь: «Тя од цёрась мезе-бди ёрай азомда тёжянень оцюняти, вятьк тейнза».18Сядонь оцюнясь вятезе сонь тёжянень оцюняти и пачфтезе: «Монь тердемань пякстафсь Павел и эняльдсь вятемс тейть тя од цёрать, сонь мялец кати-мезе азондомс тейть».

19Тёжянень оцюнясь сявозе цёрать кядьта, вятезе шири и кизефтезе: «Мезе ёрат тейне азомс?»20«Кона-кона еврейхне корхтасть эсь ётковаст – мярьгсь цёрась, – ванды синь эняльдихть тейть вятемс Павелонь пуромксу, бта синь ёрайхть лацкас ваномс тевонц.21Но тон тят кема тейст! Павелонь учсазь кяшф вастса нильгемоньда лама ломань. Синь варасть мезьдонга аф ярхцамс, аф симомс, мзярс аф шавсазь Павелонь. Синь анокт ни и учихть тонь валцень эса».22Тёжянень оцюнясь нолдазе цёрать, сияк кардазе сонь: «Сянь, мезе мондейне азондоть, киндинге тяк азонда».

Павелонь кучезь Кесарияв Феликс оцюняти

23Тяда меле тёжянень оцюнясь тердсь кафта сядонь оцюнят и мярьгсь: «Аноклада тейне кафта сятт ушман, нинге сизьгемонь ластя и кафта сятт ушман сялгом мархта. Веть колмоце частста тейст лисема Кесарияв.24Аноклада алашат Павелонди и пачфтесть сонь Феликс оцюняти шумбраста-парста».

25И тёжянень оцюнясь сёрмадсь тяфтама сёрма:26«Клавдий Лисий кучи пара мяльхть-арьсемат пара лувксонь Феликс оцюняти.27Пачфтьса тейть, тя ломанть кундазь еврейхне и аноктольхть шавомс сонь. Но мзярда мон содайне – сон Римонь ломань, сань ушматтнень мархта и идине сонь еврейхнень кядьста.28Сянь содаманкса, мезьса сонь муворгофнесазь, мон вятьфтине сонь Оцю пуромксозост.29Мон шарьхкодине, муворгофнемась сотф синь койсост тапаряф кизефкснень мархта, но аш мезевок стама, мезенкса сон максоволь шавомас али пякстамас.30Мзярда мон содайне – еврейхне анокласть тя ломанть шавомонза, мон эстокиге кучине сонь тейть. А муворгофтыензонды мярьгонь тонь инголет азондомс семботь, мезьсна ули сонь каршезонза. Ульхть шумбра».

31Тяфта ушматтне, кода мярькфоль, сявозь Павелонь и веть вятезь сонь Антипатрида ошу,32а омбоце шиня мярьгсть ластятненди молемс мархтонза сяда тов, а синць мрдасть меки ушманкуду.33Кесарияв пачкодемста Павелонь вятиенза венептезь Феликс оцюняти сёрмать и максозь Павелонь.34Оцюнясь лувозе сёрмать и кизефтезе Павелонь, кодама сон аймакста. Мзярда содазе, сон Киликияста,35мярьгсь: «Мон кулхцонтте, мзярда сайхть тонь муворгофтыхне». Тяда меле сон мярьгсь кирдемда Павелонь Иродонь азоргудса ванфтыень видеса.


предыдущая глава Глава 23 следующая глава