Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 11

Павел и аф афкуксонь апостолхне

1Вай, кда нинге аф ламос кирдеволь тейнть монь ёньфтомашизе! Кирдеда ни, эняльдян.2Мон инксонт пяк пичедян-канзедян Шкаень пичедемаса-канзедемаса. Вдь мон ладядязь тинь максомс фкя-тяка мирденди – Христости, и сяс мялезе ванфтомс тинь кода ару и апак токак стирь.3Но мон пелян: кода куйсь ёжушисонза васькафтозе Евань, тяконь лаца тиньге ёненте афоль салав седиваксстонь и ару кельгомантень эзда Христосонди.4Вдь мзярда кати-кит сашендыхть тейнть и лиякс азондыхть Иисусонь колга – аф стане, кода минь азондоме тейнть, али макссазь тейнть аф ся Ваймопожфть, конань минь тейнть максоськ; али пачфнихть лия Пара куля, конань минь ашеськ пачфне, – тяфтама ломаттнень тинь оцю мяльса кирдьсасть!5Аньцек мон мезьсовок аф лувса эсь прязень сяда кальдявкс тона пефтома цебярь апостолонтень коряс.6Катк мон аф маштан мазыста корхтама, но содамошиса – тя лия тевсь. Минь тянь тейнть аф весть няфнеськ эрь кодама тевса.

7Пади мон тиень пеже эста, мзярда ёмлалгофтыне эсь прязень тинь кеподемантень инкса, и стак лангс пачфнине тейнть Шкайть Пара кулянц?8Мон бта салсине лия кемаень пуромкснень, мзярда сявондень синь кядьстост ярмакт тинь ширесонт покодеманди. Тинь ширесонт мон хуш и улендень афсатыксшиса, но сембе сяка, тинь ёткстонт киндиге мон ашень уле сталмокс.9Вдь тя афсатыксть пяшкотькшнезь Македонияста сашенды кемай ялгатне. Мон мзярдонга ашень уле и оду афи улян тейнть сталмокс.10Христость видешинц коряс, кона ули монь эсон, азса: Ахаиянь масторса киндинге аф лоткафтови монь тя прянь шнамазе.11Мес ина мон тяфта тиендян? Пади арьсетяда, мон аф кельктядязь тинь? Шкайсь содасы, мон кельктядязь тинь!

Но мон сяда товга карман тиендема стане, кода тиендень,12сяс мес монь аш мялезе макссемс туфталхт ся ломаттненди, конат вешендихть туфталхт шнамс эсь пряснон, корхтамок, кле, тиендьсазь Шкаень тевть прокс стане жа, кода и минь.13Ня ломаттне – аф афкуксонь апостолхт, синь васькафни покодихть, конат аньцек няфнесазь эсь пряснон Христосонь апостолкс.14Аш месть дивандакшнемс: сонць Сатанась няфнесы эсь прянц валдонь ангелкс.15Сяс аф оцю тевсь, кда сонь покодиензонга няфнесазь эсь пряснон видексшити покодикс. Но синь песна ули тевснон коряс.

Афкуксонь апостолть покодемац и маятаманза

16Нинге мярьган: кивок тязамань лува ёньфтомокс. А кда лувсамасть тяфтамкс, эста максода тейне аф ламос улемс ёньфтомокс и шнамс прязень.17Мезе тяни азан, азса аф Азорть мяленц коряс. Тяфтама аф пелезь прянь шнамаса мон карман корхтама кода ёньфтома ломань.18Сяс мес ламотне шнасазь пряснон тя масторлангонь ломаттнень лаца, эста монга карман шнамонза прязень.19Ина тинь, тяшкава ёнюфне, оцю мяльса кирттяда ёньфтомотнень эса!20Тинь кирттяда, мзярда эздонт тиихть урет али норгихть-ваткайхть кядьстонт, мзярда арнихть лангсонт али кепсесазь питнеснон инголент, и мзярда эрьхнетядязь шамати.21Тейне визькс, но азса, минь ашезь сатне виеньке тяфта тиемс тинь мархтонт. Тага корхтан тейнть ёньцта лисьф ломань лаца: кда кие аф пелезь шнасы прянц, эста монга аф пелезь шнаса прязень.22Синь еврейхть? Монга евреян. Израиленнет? Монга. Синь Авраамонь юромонц поладыенза? Монга.23Синь Христость покодиенза? Пади, прокс ни шорявсь прязе, но сембе сяка азса: мон сядонга лама покодян Тейнза. Мон синдедост лама вий путонь тя тевти, синдедост сяда ламоксть улень пякстамгудса, мон пефтома ламоксть улень пикссеф, и сидеста улендень кулома лангса.24Еврейхнень эзда мон ветексть кирдень локшеса пикссемат, фкафтома нильгемонь эрьхтема.25Колмоксть римляттне монь пикссемазь байдекса, весть монь куломшка шавомазь кевса, колмоксть повондонь оцю венчень ваямас, а весть ши и ве ётафтонь оцюведьса.26Мон сидеста улендень оцю киса, ламоксть улень пелькс паласа ляйти ваямда, пелькс паласа нельгихнень-шавихнень эзда, пелькс паласа эсь тналонь ломаттнень эзда и тяконь лаца лия ломаньтналоннетнень эзда. Улень пелькс паласа ошса, ломаньфтома вастса и оцюведьса, и тяконь лаца аф афкуксонь кемайхнень ёткса.27Мон кирдень стака покодема и сизема, вень аф удома, вачаши и ведьфтома ащема. Сидеста ётафнине шить апак ярхцак, и якшамста улендень крхтапа.28Азфта башка, тейне эрь шиня сашенды лама ломань, и мон кирдян сталмот сембе кемаень пуромкснень кувалма.29Кда кие лафча, инксонза монга маряса эсь прязень лафчекс, а кда кие прай пежес, сянь инкса мон палан-пичедян.

30Кда тейне сави шнамс пря, эста шнаса эсь лафчашизень мархта.31Шкайсь, Иисус Христос Азороньконь Аляц, кона пефтома пингс шнаф-бславаф, содасы: мон аф васькафнян.32Мзярда мон улень Дамаск ошса, Арета оцязорть аймаконь вятиец ёрась кундамс монь, и сянкса ошса путсь ваныхть. Но монь кептерьса нолдамазь ошень стенать вальмава, тяфта мянень сонь кядялдонза.


предыдущая глава Глава 11 следующая глава