Выбрать язык
Книги Ветхого Завета
Книги Нового Завета
с русским текстом1Тяда меле Ваймопожфсь вятезе Иисусонь шавмодав вага мезенди: тоса идемэвозсь*а тяряфнезе сувафтомс Сонь пежес.2Нильгемонь ши и нильгемонь ве ащесь Иисус апак ярхцак и пяк вачсь пекоц.3Маладсь Тейнза варчсись*б и мярьгсь: «Кда Тон Шкаень Цёрат, мярьк ня кефненди арамс кшикс».4Но Иисус каршезонза мярьгсь: «Сёрматф:
"Аф аньцек кшить вельде эряй ломанць,
а эрь валть вельде, кона лиси Шкайть кургста"*в».
5Тяда меле идемэвозсь вятезе Сонь иняру ошу и стяфтозе Шкаень кудть*г пряс,6и корхтай Тейнза: «Кда Тон Шкаень Цёрат, ёрдак пря алу, вдь сёрматф:
"Шкайсь кошардсыне ангелонзон ванфтомс тонь,
и кядьсост канттядязь тонь,
афоль пупорда тонь пильгце кев лангс"*д».
7Иисус мярьгсь тейнза: «Тоса тяфтавок сёрматф: "Тяк варчсе*е Азорть, Тонь Шкайцень виенц"».
8Эста тага идемэвозсь сявондьсы Иисусть серидонга сери панда пряс, няфнесыне Тейнза модалангонь сембе масторхнень и синь мазышиснон-козяшиснон,9и корхтай Тейнза: «Сембонь тянь максса Тейть, кда праят пильгозон и сюконят тейне».10Иисус каршезонза мярьгсь: «Аертт эздон, Сатана; вдь сёрматф:
"Азорти, эсь Шкайцти сюконякшнек
и аньцек Тейнза покотть"*Ж».
11Эста идемэвозсь кадозе Иисусонь, и вов, ангелхне састь и кармасть лездома Тейнза.
12Мзярда Иисус марязе: Иоанн Кстиндайсь пякстамгудса, Сон мрдась меки Галилеяв.13Кадозе Назаретть и кармась эряма Капернаум ошса, кона ащи Галилеянь эрьхкть трваса Завулон и Неффалим масторса.14Тяфта лиссь, сяс мес эрявсь пяшкодемс Исаия пророкть вельде азф валхнень:15
«Завулон масторсь и Неффалим масторсь,
конат ащихть оцюведти вяти кить лангса,
Иорданть фтала,
лия ломаньтналонь*з Галилеясь –
16шобдашиса эряй ломаттне,
няйсть оцю валда,
и куломань цильфса эряйхнень
валдоптозень валдсь»*и.
17Эстоньбере Иисус ушедсь кулянь пачфнема: «Шарфтода Шкайти, Менелень Оцязорксшись маласа».
18Галилеянь эрьхкть трвава ётамста Иисус няйсь кафта братт, Симононь, конань лемнезь Пёторкс, и сонь брадонц, Андреень. Синь ульсть калонь кунцихть и ёрязь эрьхкти калонь кундаматнень.19Иисус мярьгсь тейст: «Моледа мельган, и Мон тихтядязь тинь ломанень кунцикс».20Синь эстокиге кадозь калонь кундаматнень и тусть мельганза.
21Иисус тусь тоста сяда тов и няйсь лия кафта братт, Иаковонь и сонь Иоанн брадонц, Зеведеень цёранзон. Синь венчса аляснон мархта петнезь калонь кундамаснон. Иисус синьге тердезень.22Сятка кадозь венчть, аляснон и эстокиге тусть Сонь мельганза.
23Иисус якась сембе Галилеява, тонафтсь синагогава, пачфнесь Пара куля*к Шкаень Оцязорксшить колга и пчкафнезень ломаттнень эрь кодама урмада и сярятьфта.24Иисусонь колга кулясь срадсь марнек Сириять келес; и вятнезь Тейнза сембе сярядихнень и эрь кодама урмаса маятайхнень, кяжи ваймопожфса колафнень, эсь урмаса*л сярядихнень, параличса колафнень, и Сон пчкафнезень синь.25Иисусонь мельге мольсь пяк лама ломаньда Галилеяста, Кемонь Ошень аймакста, Иерусалимста, Иудеяста и Иорданть омбокста.
*а 4:1 идемэвозь – дьявол
*б 4:3 варчси – тяса: искуситель
*в 4:4 5 Моисея 8:3
*г 4:5 Шкаень куд – храм
*д 4:6 Псалтирь 90:11-12
*е 4:7 варчсемс – тяса: искушать
*ж 4:10 5 Моисея 6:13
*з 4:15 лия ломаньтналонь – языческая
*и 4:15-16 Исаия 9:1-2
*к 4:23 Пара куля – Евангелие
*л 4:24 эсь урма – эпилепсия
Глава 4