Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЁТОРОНЬ ВАСЕНЦЕ СЁРМАЦ

Глава 3

Тонафтома мирттненди и рьватненди

1Тяфта тиньге, рьват, уледа кулхцондыкс эсь мирдентенди. И эста ся мирттне, конат аф кулхцондсазь Шкаень валть, няемок рьваснон прянь вятемаснон, валфтома сальхть кемамати.2Сяс мес синь няйсазь тинь ару эряфонтень и Шкайда пелемантень.3Катк тинь мазышинте ули аф ланга пялень: аф шяярень понамаса, аф зрняса, аф мазы щамса.4Улеза тинь мазышинте седипотмонь аф юмай мазышикс, кона няеви сятяв и сетьме ваймоса. Тяфтама мазышись питнидонга питни Шкайть сельминголенза.5Тяфта мазопнезь эсь пряснон кунардонь пингонь Шкайти кемай рьватне, конат надиясть Сонь лангозонза. Синь ульсть мирдень кулхцондыкс.6Тяфта тиендсь Сарравок, сон кулхцонкшнезе Авраамонь и лемнезе сонь азоркс. Тиньге сонь стиренза, кда тиенттяда пара и аф макстада пря пелемати.

7Тяфта тиньге, миртть, эсь рьвантень мархта уледа шарьхкодикс, сяс мес синь тинь корязонт сяда лафчт. Кельгость синь и лувость синь питникс Шкайть сельмоса, сяс мес тейст, кода тейнтьке, казнекс максови Шкайть эзда пефтома эряф. Эста мезевок аф кармай шоряма тинь озондомантенди.

Маятама пара тевонкса

8И мекольцесь, уледа сембе фкя мяльса, марясть лиятнень седиень сярятьфснон, сембе седиса кельгода фкя-фкянь, ванфнесть ялгаксшить эсь ётковант и уледа сетьме ваймокс.9Тяда панда кяжть инкса кяжса али сялдомать инкса сялдомаса. Меколанкт, бславасть сянь, кие тинь обжадязь. Тинь содасать: тяфта тиендема тердедязь Шкайсь. Эста Сон тиньге бславатядязь.10Сёрматфксса азф:
«Кинь мялец кельгомс эряфть и няемс цебярь шит,
ся катк кирдьсы кяленц кальдяв валда
и кургонц – васькафнемада.
11Катк сон шарфты кяжть эзда и тиенди цебярь,
катк вешенди сетьмоши и тяряфты сонь сатомс.
12Сяс мес Азорть сельмонза ваныхть
видексшиса эряйхнень мельге,
и Сонь пиленза марясазь синь озондомаснон.
Но Азорсь ащи каршек кальдяв тевонь тиихненди:
(Сонь мялец машфтомс синь модать лангста)».

13Кда тинь кемоста ащетяда цебярть инкса, эста кие тейнть тии кальдяв?14Но кда тинь кирттяда маятамат видексшить инкса, эста тинь павазуфтада. Тяда пеле синь эвфнемадост, катк тинь мезевок аф эвфтядязь.15Но эсь седисонт лувость Шкайть Азоркс. И фалу уледа анокт азомс каршек вал эрти, кие кизефттядязь тинь, мезень лангса кирди тинь кемаманте-надияманте. Но тянь тиендесть ляпоста и саворне,16ванфнемок эсь ваймовайгялентень арушиса. Эста араза визькс сятненди, кит кальдявста корхтайхть колгант и сялдсазь тинь ару эряфонтень, кона Христость мяленц коряс.17Сяда пара маятамс, кда тянди ули Шкайть мялец, пара тевонкса, а аф кальдяв тевонь тиеманкса.

18Вдь Христосовок весть и сембе пинкненди кирдсь маятамат минь пеженьконь инкса: видексшиса эряйсь аф видексшиса эряйхнень инкса, сяс мес Сонь мялецоль вятемс минь Шкайти. Сонь ронгоц ульсь кулофтф, но Сон вельмафтфоль ваймопожфонь эряфти,19и эста Сон тусь и пачфтсь Куля шобдашиса пякстаф ваймопожфненди,20конат кунардонь пингста ульсть аф кулхцондыкс Шкайти. Шкайсь оцю кирдемшка мархта учендозе синь каендамаснон Ноень пингста, мзярда сон тиендезе оцю венчть. Тя оцю венчса, ведть пачк ётазь, идевсть аф ламотне, аньцек кафкса ломатть.21Тя ведсь няфнесы кстиндамать, кона тяни тиньге идетядязь. Кстиндамась – тя аф ронгть лангста рдазонь штама, а Шкайть кядьста ару ваймовайгялень вешема. Кстиндамась идетядязь тинь Иисус Христосонь вельмаманц вельде.22Сон менели кеподемдонза меле ащи Шкайть види кяденц ширеса, и сембе ангелхне, азорксшитне и вийхне тиевсть Тейнза кулхцондыкс.


*а 3:10-12 Псалтирь 33:13-17


предыдущая глава Глава 3 следующая глава