Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 11

Лазарень куломац

1Урмаськодсь фкя ломань, лемоцоль Лазарь. Сон Вифания велестоннель, коса эрясть Мария и Марфа сазоронза.2Мария ся авасель, кона вадендезе Азорть танцти шине вайса и эсь пряшяярьсонза нардазень Сонь пильгонзон. Тя сонь Лазарь брадоц сярятькстсь.

3Сазорхне пачфсть куля Иисусти: «Азор! Тонь кельгома ялгаце сяряди».4Иисус марязень ня валхнень, мярьгсь: «Тя сярядемась аф куломанди, а Шкайть оцюшинц няфтеманди, тянь вельде шнаволь-оцюлгофтоволь Шкаень Цёрась».5Иисус кельгозень Марфа и Мария сазорхнень и синь Лазарь брадснон.6Лазарень сярядеманц колга кулемда меле Иисус ащесь нинге кафта шит тоса, коса ульсь.7Сяда меле мярьгсь тонафниензонды: «Аряда меки Иудеяв».8Тонафниенза мярьгсть Тейнза: «Равви! Аф кунара еврейхне ёрадязь шавомс кевса, и Тон тага молят тоза?»9Иисус каршезост мярьгсь: «Дяряй аф кемгафтува частт фкя шиса? Кие якай ши валдса, ся аф пупоряй, сяс мес няйсы тя масторлангонь валдть.10А кие якай веть, пупоряй, сяс мес эсонза аш валда».

11Тянь азомда меле корхтай тейст: «Лазарь ялганьке матодовсь; но Мон молян стяфтомонза».12Тонафниенза мярьгсть: «Азор! Кда матодовсь, эста пчкяй».13Иисус корхтась Лазарень куломанц колга, а синь арьсесть: Сон корхтай эрь шинь матодовомать колга.14Эста Иисус видеста азозе тейст: «Лазарь кулось.15Но Мон кеняртькшнян инксонт, мес Мон ашелень тоса: тяфта тинь карматада кемама Тейне. Аряда ина тейнза».16Эста Фома, конань нинге лиякс лемнесазь Кафтась, азозе тонафни ялганзонды: «Аряда ина кулотама Тонафтыеньконь мархта».

Иисус – вельмамась и эряфсь

17Мзярда Иисус сась, кулезе, Лазарь ниле шит ни калмоса.18А Вифаниясь Иерусалимть эзда аф ичкозель, ётксост колмошка вайгяльбе,19сяс ламотне сашендсть Иудеяста Марфань и Мариянь мархта ризнама синь брадснон инкса.

20Мзярда Марфа марязе: сай Иисус, сон тусь каршезонза, а Мария лядсь куду.21Марфа корхтай Иисусонди: «Азор! Улендярялеть Тон тяса, афоль кула брадозе.22Но тянивок содаса, мезе Тон анат Шкайть кядьста, Сон макссы Тейть».23Иисус корхтай тейнза: «Вельмай брадце».24Марфа мярьгсь: «Содаса, вельмай мекольце шиня, мзярда ули вельмамась».25Иисус азозе тейнза: «Мон – вельмамась и эряфсь. Тейне кемайсь, кда и кулы, кармай эряма.26И эрь эряйсь и Тейне кемайсь мзярдонга аф кулы. Кемат тянди?»27Марфа корхтай Тейнза: «Кеман, Азор! Мон кеман, Тон Христоссят, Шкайть Цёрацат, конанди сама масторлангти».

Иисус аварди

28Тянь азомда меле Марфа тусь и салава тердезе Мариянь, эсь сазоронц и мярьгсь: «Тонафтысь тяса, тернетянза тонь».29Кодак Мария кулезе тянь, сон эрязста стясь и тусь Иисусти.30Иисус нинге ашезь сува вели, а ульсь тозк, коса Сонь васьфтезе Марфа.31Еврейхне, конат ульсть Мариянь мархта кудса и ваймафнезь-кемокснезь сонь, няезь, кода сон эрязста стясь и лиссь, и синьге тусть мельганза. Синь арьсесть: Мария тусь калмоть ваксс явсема.

32Мария сась тоза, коса ульсь Иисус и няемстонза, прась инголенза плманжа лангс и мярьгсь Тейнза: «Азор! Кда Тон улелеть тяса, афоль кула брадозе».33Иисус, мзярда няезе – Мария аварди и мархтонза саф еврейхневок авардихть, тя пяк токазе Сонь ваймонц и Сонцьке ризназевсь.34И мярьгсь: «Ков сонь путость?» Тейнза азозь: «Азор! Сак и ванк».35Иисусть тусть сельмоведенза.36Эста еврейхне корхтасть: «Ватт, конашкава Сон кельгозе Лазарень».37А конат-конат эздост мярьгсть: «Сон пчкафтозень сокорть сельмонзон. Дяряй Тейнза афоль ванфтов Лазарь куломада?»

Иисус вельмафтсы Лазарень кулофста

38А Иисус тага ризназевсь, сась калмоть ваксс. Калмось карафоль кевбанда бокс, и сувама вастозонза путфоль оцю кев.39Иисус мярьгсь: «Веляфтость кевть». Кулофть сазороц, Марфа, корхтай Тейнза: «Азор! Тусь ни шине; вдь ниле шит ни сон ащи лазксса».40Иисус корхтай тейнза: «Дяряй ашень мярьге Мон тейть: кда кармат кемама, няйсак Шкайть оцюшинц?»

41Веляфтозь калмоть ваксста кевть. Иисус кеподезе прянц вяри менели и мярьгсь: «Аляй! Сюконян Тейть сяс, мес марямайть Монь.42Мон стадонга содаса: Тон фалу марясамак Монь. Тянь азса тяса ащи ломаттнень инкса, кемальхть синь: Тон кучемайть Монь».43Тянь азомда меле Сон кайгиста серьгядсь: «Лазарь! Листь тоста!»44И кулофсь лиссь, сон кяднек-пильгонек ашкотфоль кулыень котфса, шамацка вельхтяфоль котфкаса. Иисус корхтай ломаттненди: «Юкссесть-калафнесть нуланзон, катк якай».

Евреень озксвятиень оцюнятне арьсихть шавомс Иисусонь

(Матф. 26:1-5; Марк 14:1,2; Лук. 22:1,2)

45Ламотне ся еврейхнень эзда, конат сашендсть Мариянди и няезь, мезе тись Иисус, кармасть кемама Иисусти.46А конат-конат тушендсть фарисейхненди и азондозь тейст, мезе тись Иисус.

47Эста озксвятиень оцюнятне и фарисейхне кочкасть пуромкс и азозь: «Мезе тейнек тиемс? Тя Ломанць тиенди лама тяштькс.48Кда кадсаськ Сонь тяфтак, эста сембе кармайхть кемама Тейнза; и сайхть римляттне и сявсазь Шкаень кудоньконьге и ломаненьконьге».49Синь ёткстост фкясь, Каиафа, кона ся кизоня путфоль озксвятиень оцюнякс, мярьгсь тейст: «Тинь мезевок аф содатада.50Дяряй аф шарьхкоттяда: тейнек ули сяда пара, кда фкя ломань кулы ломаттнень инкса, марнек Израилень ломаньтналть юмаманц вастс».51Тянь сон мярьгозе аф эсьстонза, а улемок ся кизоня озксвятиень оцюнякс, инголькиге азозе: Иисус кулы ломаньтналть инкса,52и аф аньцек Израилень ломаньтналть инкса, но Шкайть срафнеф идензон марс пуроптомаснон инксовок.

53Тя шиста сявомок синь арьсекшнезь, кода Сонь шавомс.54Сяс ни Иисус еврейхнень ёткса пря ашезь няфне, а тусь тоста шавмодать маласа ащи масторс – ошти, кона лемневсь Ефраим. И тоса лядсь Эсь тонафниензон мархта.

55Малаткшнесь еврейхнень Очижисна. Ламотне сембе пяльде састь Иерусалиму – эсь иласнон коряс Очижида инголе прянь аруяфтома.56Синь вешендезь Иисусонь, и Шкаень кудса фкя-фкянди корхтасть: «Кода арьсетяда? Сон сай Очижить ётафтома?»57Озксвятиень оцюнятне и фарисейхне Иисусть кундаманкса кошардозь ломаттнень: «Кда кие содасы, коса Иисус, катк азсы тейнек».


предыдущая глава Глава 11 следующая глава