Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 15

Христость вельмамац кулофнень эзда

1Кемай ялгат, мон лятфтаса мялезонт Пара кулять, конань пачфтине тейнть, а тинь сявость сонь и эсонза кемоста ащетяда.2Сонь вельденза тинь ульхтяда идефт, кда кирдьсасть сонь прокс стамкс, кодамкс мон сонь тейнть пачфтине. А кда аф тяфта, эста тинь шавоста кемаде Шкайти.3Васенда мон азыне тейнть сянь, мезсь тейне максфоль: Христос кулось минь пеженьконь инкса, кода азф Сёрматфксса.4Сон калмафоль и колмоце шиня ульсь вельмафтф, кода азф Сёрматфксса,5и эвондась Кифанди, сяльде кемгафтува апостолхненди.

6Меле сон эвондась фкя пингоня вете сятта лама кемай ялганди, эздост ламотне тянемс шисот, а кой-конат кулость ни.7Тяда меле Сон эвондась Иаковонди, сяльде сембе апостолхненди.8Мекольцеда эвондась тейненьге, аф эсь пингстонза шачф шаба лаца ащити.9Мон вдь апостолхнень ёткста инь ёмласян, и мянь аф кондястян лемневомс апостолкс, сяс мес инголи панцине Шкаень кемаень пуромксть.10Но Шкайть пароказненц вельде мон тяфтаман, кодаман тяни, и Сонь пароказнец тейне максовсь аф шавоста. Мон тиень сяда лама сембе лия апостолхнень коряс, хуш тянь аф мон тиине, а Шкаень пароказнесь, кона монь мархтон.

11Сяс сембе сяка, кие тейнть пачфтезе Кулять: мон али синь, но тя ся Кулясь, конань минь сембе пачфнесаськ, и ся, конанди тинь кемаде.

Кулофнень вельмамасна

12Кда Христос вельмафтфоль кулофста, кода минь тейнть Сонь колганза пачфнетяма, мес эста конат-конат эздонт корхтайхть, кле, аш кулофнень эзда вельмама?13Кда аш кулофнень эзда вельмама, эста Христосовок ашезь вельма.14А кда Христоссь ашезь вельма, эста шава минь Пара кулянь азондоманьке и шава тинь кемаманте.15Лисенди, миньге кяльготни азондыхтяма Шкайть колга, вдь минь азондоме колганза: Сон вельмафтозе Христость. Вдь, кда кулофнень эзда вельмама аш, эста Сон Христостьке ашезе вельмафта.16Виде, кда аш кулофнень эзда вельмама, эста Христоска ашезь вельма.17Но кда Христоссь ашезь вельма, эста тинь кемаманте шава и тинь тянемс ляткшнетяда эсь пежентень потмоса.18Тяста лисенди, сятка, кит кулость Христосонди кемазь, юмасть-арасть аду.19Кда минь надияманьке Христость лангс канды лездома аньцек тя эряфти, эста минь тя масторлангса сембода ужялькс ломаттне.

20Но Христоссь афкукс вельмась кулофнень эзда – и тя ушеткс лия кулофнень вельмамаснонды.21Вдь кода куломась сась тя масторлангти фкя ломань вельде, тяфта кулофнень эзда вельмамаське сась фкя Ломань вельде.22И кода Адамонь эса сембе кулсихть, тяфта Христосса сембе мрдафтовихть эряфти.23Аньцек эрсь вельмай эсь пингстонза: васенда Христоссь; сяльде, мзярда Сон мрдай, сембе Христосоннетне.24Тяда меле сай песь. Эста Христоссь машфтсыне вийда сембе оцюнятнень, азорксшитнень и вийхнень и макссы Оцязорксшить Шкай Аляти.25Вдь Христости оцязорондама снярс, мзярс Шкайсь аф путсыне Сонь пильгалонза сембе каршек ащихнень.26И мекольце каршек ащись, конань виец ули машфтф – тя куломась.27Вдь Сёрматфксса азф: «Шкайсь семботь путозе Сонь пильгалонза». Ня валхне: «семботь путозе Сонь пильгалонза», содаф, азфт аф Шкайть колга, кона Сонць семботь максозе Христость кядялу.28Мзярда Шкайсь семботь макссы Сонь кядялонза, эста Шкаень Цёраське макссы прянц Алянц кядялу, кона максозе семботь Сонь кядялонза. Тяфта Шкайсь кармай улема сембокс и сембоса.

29Кда тя аф тяфта, эста мезе тиендихть сят, кит кулофнень вастс кстиндафнихть пря? Кда кулофне мзярдовок аф вельмайхть, эста мезенди ня ломаттне кстиндафнихть пря кулофнень вастс?30Мезенди эста миньге эрь пингоня эцекшнесаськ пряньконь пельксс?31Кемай ялгат, кода виде тя: тинь монь шнама вастозе Иисус Христос Азороньконь инголе, тяфта виде тявок: мон эрь шиня ванан куломать сельмос.32Кда мон арьселень тя масторлангонь ломаттнень лаца, эста мезенди Ефесса мон тюрень вирьбаксянь жувататнень мархта? Кодама тейне лезкс тянь эзда, кда кулофне аф вельмайхть? Эста «Эрьда карматама ярхцама-симома, вдь ванды кулотама!»33Тяда васькафнев: «Кальдяв ялгатне гастясазь пара обуцятнень».34Сргозеда видешинь эряфти и лоткада пежень тиендемда. Вдь тинь ётксонт улихть стапт, конат аф содасазь Шкайть. Кода тейнть аф визькс!

Менелень од ронгсь

35Кивок тинь эздонт, пади, кизефтьсамань: «Кода кулофне вельмайхть? И кодама эста ули синь ронгсна?»36Ёньфтома! Видьмось, конань тон видесак, аф эреклай, кда васенда аф кулы.37И тон видят аф оцю касыкс, а аньцек видьмоня, тозеронь али нинге мезень.38А Шкайсь максы тейнза нетькс Эсь мяленц коряс, эрь видьмоти сонценнеть.39Аф сембонь ронгсна фкат; ломаттнень синцень ронгсна, жувататнень синцень, нармоттнень синцень, калхненьге синцень.40Улихть менелень ронкт и модалангонь ронкт. Менеленнетнень синцень иневалдсна, модалангоннетнень – синцень.41Шить валдоц фкя, ковть лия, тяшттненьге лия. И фкя тяштть валдоц яви омбоцеть валдонц эзда.

42Вов тяфта кулофнень вельмафтомстовок: калмави наксады-юмай ронга, а кеподи пефтома пингс эряй ронга.43Калмави визьксонь ронга – кеподи иневалдса пиндолды ронга; калмави лафча – кеподи вии;44калмави модалангонь ронга – кеподи ваймопожфонь. Вдь кда ули модалангонь ронга, эста ули ваймопожфоньге.45Сёрматфксса тяфта и азф: «Васенце ломанць, Адам, арась эрек ваймокс». А мекольце Адамсь арась эряфонь максы ваймопожфокс.46Аф ваймопожфоннесь инголи, а модалангоннесь, аньцек тяда меле ваймопожфоннесь.47Васенце ломанць ульсь мода лангста, тиф пульста, омбоце Ломанць – Азорсь менельста.48Кодама ульсь модалангонь пульстонь ломанць, тяфтапт сембе модалангонь пульстонь ломаттневок. И кодама Менельстонь ломанць, тяфтапт улихть сембе менельстонь ломаттневок.49Кода минь улеме модалангонь пульстоннеть лаца, тяфта минь аратама Менельстоннетьке лаца.

50Но вага мезе азан тейнть, кемай ялгат: сиволень-веронь ронгть аш пяльксоц Шкаень Оцязорксшиса, кода наксадыть-юмайтьке аш пяльксоц пефтома пингса.51Кулхцондода, мон азан тейнть салаваши: аф сембе минь кулотама, но сембе минь полафттама –52апак учентт, сельмоське аф кенери чипордамс, мекольце торамать торамстонза. Сон торазеви – и кулофне вельмайхть пефтома пингс, а минь полафттама.53Вдь тя наксады и кулы ронгти эряви тиевомс аф наксадыкс и аф кулыкс.54Мзярда наксадысь тиеви аф наксадыкс, кулысь аф кулыкс, эста пяшкоди Сёрматфксса азфсь:
«Куломась нильф, сонь сяськозь.
55Кулома, коса тонь пупамаце?
Ад, коса тонь сяськомаце?»

56Куломать пупамац – тя пежесь, а пежеть виец койса.57Сюконяма Шкайти, кона Иисус Христос Азороньконь вельде макссь тейнек сяськома!58Сяс, кельгома ялгат, уледа кемот и мезевок тязадязь шерьфте. Марнек прянтень максость Азорть тевонцты, сяс мес тинь содасать: стака покодеманте Азорть инголе шавокс аф ули.


*а 15.29 кулофнень вастс кстиндафнихть пря – ули арьсема: Коринф эряйхнень ёткса конат-конат кстиндакшнезь пряснон ся ломанть вастс, кона кулось и ашезь кенере сонць кстиндафтомс прянц.

*б 15:54 Исаия 25:8

*в 15:55 Осия 13:14


предыдущая глава Глава 15 следующая глава