Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 22

Валвеляфкс рьвяямань илать колга

(Лук. 14:15-24)

1Иисус сяда товга корхтась валвеляфксса. Сон мярьгсь:2«Мезень лангс шары Менелень Оцязорксшись? Сон кода оцязорсь, кона аноклась эсь цёранцты рьвяямань ила.3Сон кучезень эсь покодиензон илас тертьфнень мельге, но сятнень ашель мяльсна самс.4Эста оцязорсь тага весть кучсь лия покодихть и мярьгсь: "Арда и азость тертьфненди: сембось анок илати; букатне и андонь васне печкфт, каванямбяльсь анок. Сада рьвяямань илас".5Но инжихне ашесть шарфта мяль тердемать лангс и сраткшнесть эсь тевснон тиема: кие – эсь паксязонза, кие – мишендема вастозонза.6А лиятне кундазь кучф покодиензон, пикссезь синь и шавозь.7Тянь кулемста оцязорсь пяк кяжиясь. Сон кучезе эсь ушмовиенц, машфтозень ся шавихнень и плхтазе синь ошснон.8Сяда меле сон мярьгсь эсь покодиензонды: "Каванямась анок, но сятнень, кинь мон тердине, тяса аф вастсна.9Арда тяни ки рашкненди и тернесть сембонь, кинь васьфттяда".10Покодихне тусть и вятезь сембонь, кинь васьфтезь: цебярьхненьге, кальдяфненьге. И пяшкодсь рьвяяма илань кудсь инжида.

11Мзярда оцязорсь лиссь инжиензон ванома, ёткстост сон няйсь аф илань щамса щаф ломань,12и корхтай тейнза: "Ялгай, мес тон сать тяза аф илань щамса?" Но ся каршезонза мезевок ашезь аза.13Эста оцязорсь мярьгсь эсь покодиензонды: "Сотнесть сонь кяднек-пильгонек и ёрдасть тяста шобдати, коса кармай улема авардема и пеень мчкорфтома".14Сяс мес лама тертьфта, но кржа кочкафта».

Кизефкс каяфксонь пандомать колга

(Марк 12:13-17; Лук. 20:20-26)

15Эста фарисейхне тусть и арьсесть эсь ётковаст, кода кундамс Иисусонь валса.16Синь кучсесазь Тейнза эсь тонафниснон и Иродонь ломанензон. Сят мярьгсть Иисусонди: «Тонафты, минь содасаськ: Тон видешинь кельгият и видеста тонафтат Шкайть коряс эряма, аф арьсят мяльс тумать колга и киньге лангс аф ванат.17Эста азк тейнек, кода Тон арьсят, койть коряс мярьгондеви пандомс каяфкс кесарти али аф?»18Иисус шарьхкодезень синь кальдяв мяльснон и мярьгсь: «Шамафксонь каннихть! Мезенди варчсесамасть Монь кизефксонтень вельде?19Няфтесть Тейне ярмакть, конань мархта паннетяда каяфкс». Синь кандсть Тейнза фкя динарий.20Иисус кизефнесыне синь: «Кинне тяса шамаликсь и лемсь сёрматфт?»21Синь каршезонза корхтайхть: «Кесарть». Эста Иисус корхтай тейст: «Сяс макссесть кесареннеть – кесарти, а Шкаеннеть – Шкайти».22Тянь кулемста синь прасть дивас, кадозь Иисусонь и тусть.

Кизефкс кулофнень эзда вельмамать колга

(Марк 12:18-27; Лук. 20:27-40)

23Сяка шиня Иисусонди састь саддукейхть, конат ашесть кема кулофста вельмамати, и кизефтезь Сонь:24«Тонафты! Моисей мярьгсь: "Кда кулы аля, конань аш шабанза, катк брадоц сявсы полакс сонь рьванц и кады кулофти юромонь полады".25Минь эздонк ульсь сисем братт. Васенцесь рьвяясь и кулось шабафтома, рьвац лядсь брадонцты.26Тяфта лиссь и омбоце, колмоце, ляды сисем браттнень мархтовок.27Мекпяли кулось рьвяське.28Мзярда кулофне вельмайхть, кинди сисем браттнень эзда сон кармай улема рьвакс, вдь сембе синь ульсть тейнза мирдекс?»

29Иисус корхтай каршезост: «Тинь васькафтфтада-эрьготьфтада, сяс мес аф содасасть аф Сёрматфксть, аф Шкайть виенц.30Мзярда Шкайсь вельмафтсыне кулофнень, эста синь аф рьвяйсихть, рьвакска аф тушендыхть, а кармайхть улема кода Шкаень ангелхне менельса.31А кода ащи тевсь кулофнень вельмамаснон мархта, дяряй тинь ашесть лувонда сянь, мезе тейнть мярьгсь Шкайсь? Сон мярьгсь:32"Мон Авраамонь Шкаецан, Исааконь Шкаецан и Иаковонь Шкаецан". Шкайсь – аф кулофнень Шкайсна, а эряйхнень».33Тянь кулемста ломаттне дивандакшнесть Иисусть тонафтоманцты.

Сембода оцю кошардомвалсь

(Марк 12:28-34; Лук. 10:25-28)

34Мзярда фарисейхне кулезь, кода Иисус пандозень саддукейхнень кургснон, пуромсть марс.35Эздост койти фкя тонафтысь арьсесь кундамс Иисусонь валса и кизефтезе:36«Тонафты! Кона кошардомвалсь койса сембода оцю?»37Иисус корхтай тейнза: «"Кельк Азорть, Шкайцень, сембе седисот, сембе ваймосот и сембе шарьхкодемасот".38Тя васенце и сембода оцю кошардомвалсь.39Омбоцесь васенцеть лаца: "Кельк маластоцень, кода эсь пряцень".40Сембе койсь и пророкнень тонафтомасна ащихть ня кафта кошардомвалхнень лангса».

Христоссь – кинне цёрась?

(Марк 12:35-37; Лук. 20:41-44)

41Мзярда фарисейхне пуромсть Иисусонь перьф, Сон кизефтезень:42«Мезе тинь арьсетяда Христость колга? Кинне Сон цёрась?» Тейнза корхтайхть: «Давидонь».43Иисус корхтай тейст: «Мес ина Давид, Шкаень Ваймопожфть вятеманц коряс, лемнесы Сонь Азоркс? Вдь Давид корхтась:44
"Азорсь мярьгсь монь Азорозти:
озак Монь види ширезон,
мзярс аф путсайне Тонь пильгалот
Тейть каршек ащихнень".

45Лисенди, кда Давид лемнесы Христость Азоркс, эста кода Христос ули тейнза цёракс?»

46Иисусонь каршес кивок валга ашезь азов, и ся шиста сявомок синь пеленкшнесть Сонь кядьстонза мезевок кизефнемс.


*а 22:7 ушмовий – войско

*б 22:44 Псалтирь 109:1


предыдущая глава Глава 22 следующая глава