Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 1

Ингольце валсь и шумбракстомась

1Павел, Иисус Христосонь покодиец, конань Шкайсь тердезе улемс апостолкс и кочказе азондомс Шкаень Пара кулять,2конань Шкайсь инголькиге надияфтозе Эсь пророконзон вельде иняру Сёрматфксса.3Тя Кулясь Сонь Цёранц колга, кона ломанень шачемас коре Давидонь уноконь-унокоц,4а инярушить Ваймопожфонц коре – Шкаень Цёра, конань Шкайсь няфтезе сембе вийсонза, вельмафтомок кулофнень эзда. Тя – Иисус Христос, минь Азороньке.5Сонь вельденза тейнек максфоль пароказнесь и апостолонь тевсь: вятелеськ сембе ломаньтналхнень Иисусонь лемс кемамати.6Синь лувксозост сувсетяда тиньге, конат тертьфт улемс Иисусоннекс.7Мон кучан пара вал сембе ся римэряйхненди, конатнень кельгсыне Шкайсь и конатнень Сон тердезень улемс иняру ломанькс. Мон арьсян тейнть пароказне и сетьмоши Шкай Аляньконь и Иисус Христос Азороньконь эзда.

Павелонь мялец повомс Риму

8Васендакиге азан сюконяма Иисус Христосонь вельде монь Шкаезти сембонь тинь инксонт, сяс мес тинь кемамантень колга корхтави марнек масторлангса.9Мон Шкайти сединек-ваймонек покодян, азондомок Пара кулять Сонь Цёранц колга. Сон няйсы-содасы: мон фалу лятфнетядязь тинь10эсь озондомасон. И эняльдян Шкайти, кда тянди ули Сонь мялец: пади тяни коданга молеван тинь варжамонт.11Вдь монь аф азовомшка оцю мялезе няемс тинь, мялезе максомс тейнть ваймопожфонь кодамовок казне и тянь вельде кемокстамс тинь,12лиякс мярьгомс, улелеме нежекс фкя-фкянди минь марстонь кемамасонк: тинь улеледе нежекс тейне, а мон – тейнть.13Содасть, кемай ялгат, мон ламоксть срхксень молемс тейнть, но тянемс тефне-перяфксне шорясть тейне молемс ширезонт и кочкамс ётксонтка имошт, кода мон тиендень ни лия ломаньтналхненьге ёткса.14Мон шумуван грекнень и варвархнень, смузюфнень и аф содайхнень инголе.15Сяс, кда корхтамс монь колган, мон анокан азондомс Пара кулять тейнтьке, Римса эряйхненди.

Пара кулять виец

16Мон аф виздян Христость Пара кулядонза, вдь тя Шкаень вий, кона идекшнесыне сембе кемайхнень, васендакиге еврейхнень, сяльде – лия ломаньтналхненьге.17Вдь тя Куляса панжеви: Шкайсь минь лувсамазь видексшинь ломанькс кемаманкса и аньцек кемаманкса. Сёрматфксса азф: «Видексшинь ломанць кармай эряма кемамать вельде».

Сембе ломаттне муворуфт-шумуфт

18Шкайть кяжень пандомац валги менельста эрь кодама пежень и зиянонь тиихнень лангс, конат эсь кальдявшисост кяшендьсазь ломаттнень эзда видешить.19Ся, мезе ломанть вийса содамс Шкайть колга, няфтьф тейст, Сон Сонць панжезе тейст.20Менельхнень-масторхнень тиемаснон эзда сявомок, Шкайть аф няевикс ширенза – Сонь пефтома виец и Шкайксшиц – няфтьфт ломаттненди Сонь тифонц вельде. Сяс ня ломаттненди аф аралави прясна Шкайть инголе!21Хуш синь содазь Шкайть, но сяка ашезь шна Сонь и ашесть азонда сюконяма Тейнза кода Шкаенди. Меколанкт, синь мяльсна-арьсемасна тиевсть шавокс, а ёньфтома седиснон ашкодозе шобдась.22Лемнемок эсь пряснон смузюкс, синь арасть шава прякс.23Пефтома пингс эряй Шкайти сюконямать вастс синь сюконякшнихть аф афкуксонь шкайхненди, конат шаркстыхть кулы-наксады ломаненди, нармоненди, ниле пильгса жуватанди, куенди-ёзмолдыенди.

24Сяс Шкайсь кадозень синь аф арушис, визькс мялень топафнемас, тяфта синць максозь туткотксшити эсь ронгснон.25Шкаень видешить синь полафтозь кяльготнемать лангс. Синь сюконякшнихть и покодихть Шкаень тифти, а аф Сембонь Тии Шкайти, кона шнаф-бславаф пефтома пингс. Аминь.

26Тянкса Шкайсь и максозень синь визькс мялень топафтомать кядялу. Авась ава мархта прашенды визькс тевс, мезсь моли эряфонь койть каршес.27Тяфта алятневок, шарфтсть аватнень эзда и крьвязсть визькс мяльса фкя-фкянди. Алясь аля мархта тиенди визькс тефт, тянь мархта аноклайхть эстейст кяжень пандома, конань синць сатозь зияну тевснон инкса.

28Сяс мес синь ашель мяльсна содамс Шкайть, Шкайсь синь максозень синцень шоряф ёньцнонды тиендемс сянь, мезе тиендемс аф мярьгондеви.29Синь пяшкодсть кодама-повсь аф видешида, усксевомада, кальдявда, аф топафневишида, кяжда. Синь эряфсна пяшкодсь сельмонь каямада, шавондомада, сялондомада, васькафнемада, кальдявонь арьсемада.30Синь сялды валса корхтафтыхть, кяльготнихть ломаттнень лангс, синь Шкаень аф кельгихть, синь обжайхть-пиксыхть, прянь шнафтыхть, прянь няихть, докат кяжень тиемаса, тядянь-алянь аф кулхцондыхть,31аф шарьхкодихть, валонь аф кирдихть, кельгомань аф содайхть, кяжьбень кирдихть и аф ужяльдихть.32Синь содасазь, Шкаень видексшинь койть коряс тяфта тиендихне максовихть куломас. И сяка, синь аф аньцек синць тяфта тиендихть, но и шнасазь лацост тиендихнень.


*а 1:7 иняру ломаттне – тя сембе сят, кит кемайхть Иисус Христости.


предыдущая глава Глава 1 следующая глава