Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 11

Иисус тонафты озондома

(Матф. 6:9-15, 7:7-11)

1Весть Иисус озондсь фкя вастса. Мзярда Сон аделазе озондоманц, тонафниензон ёткста фкясь мярьгсь Тейнза: «Азор, тонафтомасть минь озондома, кода Иоаннга тонафтозень эсь тонафниензон».

2Иисус мярьгсь тейст: «Озондомста корхтада:
Аляньке, кона менельса!
Катк лувови инярукс Тонь лемце.
Катк сай Тонь Оцязорксшице;
катк ули Тонь мяльцень коряс,
модалангсовок, кода менельса.
3Шиста шис макссек тейнек
эрь шинь кшиньконь.
4Нолдайть тейнек минь пеженьконь,
вдь миньге нолясаськ эрти,
кие тейнек шумуясь.
Тямасть вятфне варчсемас,
но Кальдявть эзда идемасть».

5Иисус мярьгсь тейст: «Кепотьксонди ладясаськ, конацка тинь ёткстонт веньгучкать моли ялганцты и мярьги тейнза: "Ялгай, макст тейне пандомда колма кшит.6Ялгазе сувась ётамбачк, а тейне аш мезе путомс инголенза".7А сон мярьги тейть кудста: "Тямак томошинда, кенкшне ни пякстафт, идневок, монцьке удома вастсотама, сяс аф стяван тейть кшинь максома".8Корхтан тейнть, кда сон аф стяй и аф максы тейнза кши ялгаксшить инкса, меле сон сяка стяй и максы мзяра эряви, сяс мес ся апак лотксек анай.

9Сяс корхтан тейнть: анада, и максови тейнть; вешеда, и мутада; чакада, и панжеви тейнть.10Сяс мес эрь анайти максови, вешендись муй и чакайти панчсазь.11Кона алясь тинь ёткстонт максы цёранцты кев, мзярда ся анай кши; али максы куй, мзярда анай кал?12Али максы скорпион, мзярда цёрац анай ал?13Тяфта, кда тинь, кяжи ломатть, машттада идентенди макссемс цебярь казнет, эста сядонга Менелень Алясь максы Иняру Ваймопожф сятненди, кит анайхть Сонь кядьстонза!»

Иисусонь муворгофнесазь Сатанань вийть тевс нолдамаса

(Матф. 12:22-30; Марк 3:20-27)

14Весть Иисус панць фкя алять потмоста кяжи ваймопожф, кона тиезе тя алять аф корхтайкс. Мзярда кяжи ваймопожфсь лиссь, аф корхтайсь ушедсь корхтама. Ломаттне дивандасть.15Ёткстост конат-конат корхтасть: «Сон панцесыне кяжи ваймопожфнень Веельзевулонь, кяжи ваймопожфнень оцюняснон вийса».16Лиятне, варчсемок Иисусонь виенц, анасть-вешсть кядьстонза менельста тяштькс.

17Но Иисус содазень синь арьсемаснон, мярьгсь тейст: «Эрь кодама масторсь, кона явови эсь эсьсонза, шами; кудське, коса тюремат-сялондомат, срады.18Сатанаське явондяряй сонць эсьсонза, эста кода кирди оцязорксшиц? А тинь мярьктяда, Мон Веельзевулонь вийса панцесайне кяжи ваймопожфнень!19Кда Мон Веельзевулонь вийса панцесайне кяжи ваймопожфнень, эста тинь ломаненте кинь вийса панцесазь синь? Сяс катк синь улихть тейнть судьякс!20Но кда Мон Шкаень вийса панцесайне кяжи ваймопожфнень, эста Шкаень Оцязорксшись сась тейнть.

21Мзярда вии ломанць тюрембяль мархта ванцы кудонц, эста ванфтови уликс-пароц.22Но кда сондедонза вии ломань врьгяти лангозонза и сяськсы сонь, эста нельгсы тюрембяленц, конань лангс сон надиякшнесь, и явсы нелькф уликс-паронц.23Кие аф мархтон – ся Тейне каршек; кие аф кочкай мархтон, ся срафты».

Аф ару ваймопожфть мрдамац

(Матф. 12:43-45)

24«Мзярда аф ару ваймопожфсь лиси ломаньцта, эста эстейнза ваймама вастонь вешендезь, ушеды якама ведьфтома вастова, и мзярда аф муй, мярьги: "Эрька мрдан кудозон, коста лисень".25Мрдамста, мусы кудонц тяйфста, лац-ряц урядафста.26Эста сон моли и сяви мархтонза сисем лия ваймопожфт, конат сондедонза кяжихть. Синь сувайхть ся ломанть потмос и кармайхть эряма тоса. Меколи ся ломанти арай нинге сядонга кальдяв ингольцеть коряс».

Кие павазу?

27Мзярда Иисус тянь корхтазе, ломаттнень ёткста фкя авась ювадсь: «Павазу ся авась, кона каннензе Тонь эсь потмосонза и мяштьсонза потяфнензе!»28Иисус каршезонза мярьгсь: «Сядонга павазуфт сят, конат кульсазь Шкаень валть и пяшкодьсазь сонь».

Иона пророкть тяштьксоц

(Матф. 12:38-42; Марк 8:12)

29Ломаттне сядонга ламонь пуромкшнесть Иисусонь перьф. Сон пшкядсь тейст: «Конашкава кяжихть тяниень пингонь ломаттне! Синь вешендихть тяштькст, аньцек аф ули тейст тяштькс Иона пророкть тяштькстонза башка.30Вдь кода Иона ульсь тяштьксокс Ниневиянь эряйхненди, стане Ломанень Цёраське ули тяштьксокс тяниень пингонь эряйхненди.31Лямбе ширдень оцязоравась кеподи судендамань шиня тяниень пингонь эряйхнень каршек и судендасыне синь, сяс мес сон сашендсь масторбеста Соломононь смузьшинц кулхцондома. А вов тяса ащи Соломонда оцюсь.32Ниневиянь эряйхне кеподихть судонь шиня тяниень пингонь эряйхнень каршек и судендасазь синь. Вдь Ниневиянь эряйхне шарфтсть Шкайти Ионань кулянц марямда меле; и вов, тяса ащи Ионада оцюсь».

Сельмось – валдоптома ронгти

(Матф. 5:15, 6:22,23)

33«Кивок крьвястьф штатолть аф путсы аксялу и аф вельхтясы кядьгоняса, а путсы штатолонь кирдемас, няелезь сувайхне валдонц.34Сельмось – валдоптома ронгти. Улендяряй сельмоце шумбра, эста марнек ронгце ули пяшксе валдта, а улендяряй сельмоце кольф, эста ронгцевок ули пяшксе шобдада.35Ватт ина: эсот валдсь афоль уле шобдакс!36Улендяряй ронгце пяшксе валдта и аф ули эсот мезевок шобда, эста тон марнек кармат вандолдома, кода валдоптолензе эсь вандолфсонза штатолсь».

Кальдяв ули тейнть, койти тонафтыхть и фарисейхть!

(Матф. 23:1-36; Марк 12:38-40; Лук. 20:45-47)

37Мзярда Иисус аделазе корхтаманц, фкя фарисейсь серьгядезе Сонь эсь пялонза ярхцама. Сон мольсь и озась шрать ваксс.38Фарисейсь дивандазевсь, мес Иисус озась ярхцама кядень апак штак.

39Но Азорсь мярьгсь тейнза: «Вов тинь, фарисейхть, штакшнесасть-нарнесасть шаватнень и кядьгонятнень лангснон, а тинцень потмонте пяшксет аф топафневишида и кяжда.40Ёньфтомот! Кали аф Ся, кона тиезе ланга пяльть, тиезе потмоннетьке?41Максость ашуфненди сянь, мезе шаватнень и кядьгонятнень потмоса, и эста сембонте ули ару.

42Кальдяв тейнть, фарисейхть, сяс мес тинь макссесасть кемонце пяльксть мятаста, рута тишеста и перень лия сёроста, а видешить и Шкайти кельгомать колга юкснесасть! Тявок эряви тиемс, тонавок аф эряви юкснемс.

43Кальдяв тейнть, фарисейхть, тинь кельгсасть синагогаса инголе озсемать и мишендемань-рамсемань вастова шумбракснема-шнама валонь кочксемать.

44Кальдяв тейнть койти тонафтыхть и фарисейхть. Шамафксонь каннихть! Тинь кода тяштьксфтома калмот, конатнень ланга якайхть ломатть, тянь апак содак».

45Койти тонафтыхнень эзда фкясь мярьгсь тянь каршес Тейнза: «Тонафты! Тянь корхтазь Тон миньге седиеньконь керсак».

46Но Иисус мярьгсь: «Тейнтьке кальдяв, койти тонафтыхть! Тинь путнетяда ломаттнень лангс аф кандовомшка канкст, ина тинць фкявок сурса аф токсесасть ня канкснень.

47Кальдяв тейнть! Тинь тиенттяда мялямгефт пророкнень калмоснон лангса. А кит шавондозь синь? Тинь атянь-атянте!48Тяфта тинь няфнесасть, кода шнасасть тевснон: синь шавондозь пророкнень, а тинь тиенттяда калмоснонды мялямгефт.49Сяс Шкаень смузьшиське корхтай: "Кучан тейст пророкт и апостолхт, и финцнень эздост синь шавсазь, а омбонцнень панцазь".50И сяс тя пингонь ломаттнень кядьста вешеви сембе пророкнень версна, кона пяяртьф масторлангса эряфть ушедомстокиге:51Авелень верста Захарияннети молемс, конань шавозь Шкаень кудть и инголенза ащи алтарть ёткса. Видеста мярьган тейнть: тяниень пингонь эряйхнень кядьста вешеви пророкнень версна.

52Кальдяв тейнть, койти тонафтыхть, тинь саласть содамошити панжемать. Тинцьке ашеде сува, и сятнендиге, кит тоза сувальхть – пякстасть кить».

53Мзярда Иисус корхтазе тейст тянь, койти тонафтыхне и фарисейхне лангозонза кяжиязь, кармасть педендема Иисусонди эсь пефтома кизефксснон мархта.54Ванцть Иисусонь кургозонза, ёразь кундамс кодамовок валса.


*а 11:4 варчсема – тяса: искушение

*б 11:44 Еврейхне лувозь: калмонь токсемась тисы ломанть аф арукс.


предыдущая глава Глава 11 следующая глава