Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 15

Иисус Пилатонь инголе

(Матф. 27:1,2,11-14; Лук. 23:1-5; Иоанн 18:28-38)

1Шобдавакиге озксвятиень оцюнятне ётафтсть пуромкс ломаньтналонь оцюнятнень, койти тонафтыхнень и марнек Оцю пуромксть мархта. Синь сотнезь Иисусонь, лихтезь тоста и максозь Пилатонди.

2Пилат кизефтезе Иисусонь: «Тон еврейхнень Оцязорснат?» «Тон тянь азыть», – мярьгсь Иисус.3Озксвятиень оцюнятне муворгофнезь Сонь лама тевса.4Пилат тага кизефтезе Иисусонь: «Тон мезевок аф азат? Няйсак, мзяра Тонь каршезот муворгофнемада».5Иисус тянь каршеска мезевок ашезь мярьге, сяс Пилат пяк дивандась.

Иисусонь куломас судендамац

(Матф. 27:15-26; Лук. 23:13-25; Иоанн 18:39-19:16)

6Эрь Очижиня Пилат ноляль ломаттненди фкя пякстаф, сянь, конань синь анцезь.7Ся пингть пякстафтольхть Варавва и сонь ялганза. Синь оцюнятнень каршес марса кеподемста шавсть ломань.8Ломаттне састь Пилатонди и кармасть эняльдема тейнза: тиель стане, кода фалу тиендсь тейст.9Пилат каршезост мярьгсь: «Ули мяленте, нолдаса тейнть еврейхнень Оцязорснон?»10Сон вдь содазе, озксвятиень оцюнятне максозь Иисусонь сонь кядезонза сельмонь каямать инкса.11Но озксвятиень оцюнятне корхтазь ломаттнень эняльдемс Пилатонди: катк Иисусонь вастс нолдасы Вараввань.12Пилат тага мярьгсь тейст: «Мезе ина тиема Сянь мархта, конань тинь лемнесасть евреень Оцязоркс?»13Синь тага ювадсть: «Эськотьк Сонь крёзти!»14Пилат мярьгсь тейст: «Мезень кальдяв Сон тись?» Но синь нинге сяда кайгиста юватькшнесть: «Эськотьк Сонь крёзти!»

15Пилат ёрась ваномс ломаттнень мяльснон и нолдазе тейст Вараввань, а Иисусонь пикссефтезе и максозе эськодемс крёз лангс.

Ушматтне пеетькшнихть Иисусонь лангса

(Матф. 27:27-31; Иоанн 19:2,3)

16Ушматтне вятезь Иисусонь оцюнять кудонц пирьфпотмозонза, и кочказь сембе лия ушматтнень.17Щафтсть лангозонза шобдаза-якстерь щам, кодасть сялги тишеста каштаз, путозь прязонза.18И кармасть рахсемга мархтонза шумбракснема: «Ульхть шумбра, еврейхнень Оцязорсна!»19Синь эрьхнезь Сонь пря ланга нюдинь байдекса, сельгондсть лангозонза и плманжа лангс прашендозь сюконякшнесть Тейнза.20Мзярда топодемс рахсесть лангсонза, синь каяфтозь лангстонза шобдаза-якстерь щамть, щафтозь меки Сонцень щамонзон и сявозь крёз лангс эськодемс.

Иисусонь крёз лангс эськодемац

(Матф. 27:32-44; Лук. 23:26-43; Иоанн 19:17-27)

21Ки лангса синь васьфтсть Киринеянь ломань, Симононь – тя Александронь и Руфонь алясна, сон ся ёткть саль паксяста. Ушматтне кошардозь Симононь кандома Иисусонь крёзонц.22Синь вятезь Иисусонь Голгофав, кона ётафневи кода: «Пряпакарь васта».23Тоса макссть Тейнза симомс смирна мархта шоряф винада, но Иисус ашезь симе.24Иисусонь эськодезь крёз лангс. Эськодиенза, кинди мезе саты, жерьбань каязь, явозь щамонзон эсь ётковаст.

25Пингсь ульсь колмоце частть малава, мзярда Иисусонь эськодезь крёз лангс.26И прянц вельхксс сёрматфоль, мезьса Сон муворгофтф: «Еврейхнень Оцязорсна».27Мархтонза эськодсть кафта салси-шавонды алят, фкять види, омбоцеть кержи ширезонза.28Тяфта пяшкодсь Сёрматфксонь валсь: «Сонь сувафтозь кяжень тиендихнень ёткс».

29Вакска ётнихне сялдозь Сонь и прянь шукиезь корхтасть: «Эх, Шкаень кудонь срафты и колма шиста меки путы!30Идек Эсь пряцень и валк крёзть лангста».31Тяконь лаца озксвятиень оцюнятневок койти тонафтыхнень мархта рахсесть и корхнесть фкя-фкянди: «Лиятнень идекшнезень, а Эсь пряц аф идеви!32Катк тяни валги Израилень Оцязорсь, Христоссь, крёзть лангста. Кда минь тянь няйсаськ, эста карматама кемама Тейнза». Сятка, конат эськотьфтольхть вакссонза, пеедсть лангсонза.

Иисусонь куломац

(Матф. 27:45-56; Лук. 23:44-49; Иоанн 19:28-30)

33Котоце частса сембе масторлангсь шобдалгодсь, и шобдась кирдсь вейхксоце частть самс.34Вейхксоце частса Иисус пешкодсь оцю вайгяльса: «Элои́, Элои́! Ламма́ савахфани́?», кона ётафтови: «Шкаезе, Шкаезе! Мес Тон кадомайть Монь?»35Тянь кулемста тоса ащихнень ёткста конат-конат корхтасть: «Марясте, Илиянь тернесы».36Ёткстост фкясь ласьксь, навазе ведьбангонять шапама винас, повфтазе байдек пес, макссь Иисусонди симомс и корхтась: «Ожуда, ванцаськ, сай Илия Сонь валхтомонза али аф».37Иисус вярьгак вайгяльхть пешкодсь, и ваймоц лиссь.

38И Шкаень кудса котфонь перяфкссь сязевсь кафтова, вярде алу.39Иисусонь каршеса ащи сядонь оцюнясь няезе, кода Иисус ювадемда меле кулось, и мярьгсь: «Афкукс, тя ломанць Шкайть Цёрацоль».

40Тоса ульсть аватка, конат ванцть ичкозде; синь ётксостольхть Магдаласта Мария и Мария, ёмла Иаковть и Иосиянь тядясна, Саломиявок тосоль.41Синь эстонга, мзярда Сон ульсь Галилеяса, мольсть мельганза и лезнесть Тейнза. Тяса ульсть ламоц лия аватневок, конат састь Иисусонь мархта Иерусалиму.

Иисусонь калмамац

(Матф. 27:57-61; Лук. 23:50-56; Иоанн 19:38-42)

42Шоподем пяли, а тя ульсь пяденцяста, ваймамань шинди аноклама шиня,43сась Аримафея ошень Иосифсь, Оцю пуромксонь содаф ломанць, кона сонцьке учсезе Шкаень Оцязорксшить саманц. Сон аф пелезь сувась Пилатонди и аназе кядьстонза Иисусонь ловажанц.44Пилат дивандась, мес Сон ни кулофоль; тердезе сядонь оцюнять, кизефтезе: «Кунара кулось?»45И мзярда сядонь оцюнясь кемокстазе Иисусонь куломанц, Пилат максфтозе ловажать Иосифонди.46Иосиф рамась иляназонь котф, валхтозе Иисусонь ловажанц крёзть лангста, ашкодозе котфса и путозе Сонь калму, кона шувфоль кевбандс; калмос сувама вастти веляфтсь кев.47Магдаласта Мария и Иосиянь тядяц Мария няезь, коза путозь Иисусонь ловажанц.


предыдущая глава Глава 15 следующая глава