Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ГАЛАТИЯНЬ КЕМАЙХНЕНДИ

Глава 4

1Мон ва мезе нинге азан: мзярс идень пингса ся, конанди меле максови алянц уликс-пароц, сон мезьсонга аф явови уреть эзда, хуш сон – семботь лангса азор.2Сонь мельганза ваныхть кудвятихне и мельганза якайхне, мзярс аф сай пингсь, конань ладязе аляц.3Тяфта миньге, мзярс ашеме ара кемайкс, улеме шаба лаца, и улеме урекс тя масторонь вяти вийхненди.4Но мзярда сась ладяф пингсь, Шкайсь кучезе Эсь Цёранц. Сон шачсь ломанькс авань эзда и эрясь койть ала ва мес:5нолдамс минь воляшис койть азорксшинц алда и тиемс минь Шкаень идькс.6Тяни ни тиньге Шкаень иттяда. Тянь няфтеманкса Шкайсь кучезе тинь седиезонт Эсь Цёранц Ваймопожфонц, кона тердьсы Шкайть: «Авва! Аляй!»7Тяфта, тон тяни аф урят, а Шкаень идят; а кда идят, эста Иисус Христосонь инкса тейть максови уликс-парось, конань Шкайсь надияфтозе Эсь идензонды.

Павел пичеди Галатиянь кемайхнень инкса

8Тяда инголи, мзярда тинь нинге ашесть сода Шкайть, тинь уледе урекс шкайхненди, конат прокс аф шкайхть.9Ина тяни, мзярда тинь содасть Шкайть, сяда лац азомс, мзярда Шкайсь содадязь тинь, кали тинь меки ёратада мрдамс ня лафча и асуфтома вийхненди? Кали меки ёратада арамс тейст урекс?10Тинь лувонттада-тяштькснетяда шит, кофт, пинкт и кизот, арьсемок: тяфта тинь покоттяда Шкайти!11Пелян, монь покодемазе тинь ширесонт ётась стакащемда.

12Эняльдян тейнть, кемай ялгат, тиеда монь лацон – лиседа койть азорксшинц алда, сяс мес монга арань тинь лацонт. Тинь монь мезьсонга ашемасть обжа.13Тинь содасасть, васенцеда мон сань ширезонт, сяс мес сярятькстонь. Самай эста азондыне тейнть Пара кулять.14Катк эста монь сярядемазе ульсь тейнть стака канксокс, тинь сяка ашеде шарфта безярдезь эздон. Меколанкт, тинь седи ваксста васьфтемасть монь кода Шкаень ангел, кода Сонцень Иисус Христость.15Коза ина юмась тинь кенярдеманте? Мон кемоста азса, инголи тинь эсь сельмонтеньге аноктоледе максомс тейне, кда максовольхть.16Мезе ина? Кали видеть корхтамста мон арань тейнть душманкс?17Ня ломаттне ёладозь шарыхть перьфкант, но аф паронди эсонт ускихть эсь ширезост: ёрайхть явфтомс тинь монь эздон и тиемс тинь синцень перьфкаст шарыкс.18Сянь эса кальдяв аш, мзярда кивок шары перьфкант паронь арьсезь. Катк тяфта ули фалу, а аф аньцек эста, мзярда мон тинь мархтонтан.19Идне монь, тинь инксонт мон тага кирдян маятамат, кодапт кирди авась шачфтомста, мзярс тинь аф тиефтяда Христость лаца.20Монь пяк мялезе тяни улемс тинь ётксонт и корхтамс мархтонт сяда ляпоста. Мон прокс аф содаса, мезе мархтонт тиемс.

Агарь и Сарра

21Сят тинь эздонт, конатнень мяльсна эрямс койть азорксшинц ала, азость тейне, кали тинь аф кульсасть, мезе корхтай койсь?22Вдь эсонза сёрматф: Авраамонь ульсть кафта цёранза, фкясь Агарень, уре авать эзда, омбоцесь Саррань, волястонь авать эзда.23Уре авать шабац шачсь кода шачендыхть сембе шабатне, а волястонь авать эзда шачись шачсь Шкаень надияфтомать коряс.24Тя азксса ули валвеляфкс: ня кафта аватне ащихть кафта сотксонь няфтемакс. Агарь авась, конань иденза шачихть урексшис, няфтьсы ся сотксть, кона ульсь тиф-кемокстаф Синай панда пряса.25Агарь – тя Синай пандсь, кона Аравияса. Сон тяниень пингонь Иерусалимсь, кона эсь идензон мархта эряй урексшиса,26а менелень Иерусалимсь – воляшиса, и тя сон минь тядяньке.27Сонь колганза азф Сёрматфксса:
«Кеняртть, аф шачфтови и идьфтома ава!
Кенярдезь юватькшнек,
шачфтома маятамань аф содай!
Вдь катфть сяда лама идьтонза
мирде мархта эряйть коряс».

28Миньге, кемай ялгат, стама иттяма, конат Исааконь лаца шачсть надияфтомать коряс.29Но кода эста ломанень вийса шачф идсь панцезе Ваймопожфонь вийса шачфть, тяфта моли тянивок.

30Мезе ина корхтай Сёрматфкссь? «Паньк уре авать-цёранек. Уре авать цёранцты аф максови алянц уликс-пароц. Алять уликс-пароц катк ляды аньцек воляшистонь авать цёранцты».

31Тяфта, кемай ялгат, минь аф уре авать идензотама, а воляшистоннеть.


*а 4:27 Исаия 54:1

*б 4:30 1 Моисея 21:10


предыдущая глава Глава 4 следующая глава