Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 4

Пётр и Иоанн Оцю пуромксть инголе

1Ся пингть, мзярда Пётр и Иоанн корхтасть ломаттненди, малазост нежедсть озксвятихть, Шкаень кудонь ваныень оцюнясь и саддукейхть.2Синь кяжихтольхть сяс, мес апостолхне тонафтсть ломаттнень эса и азондсть Иисусонь вельмаманц колга, кона няфнесы: кулофне вельмайхть.3Синь фатязь Пёторонь мархта Иоаннонь и пякстафтозь вандыс, сяс мес ульсь ни илядь.4Но ламотне, кит кулхцондозь Кулять, кемасть; и кемайхнень лувкссна кассь вете тёжянц, тя авада и шабада башка.

5Омбоце шиня Иерусалимса кочкавсть Оцю пуромксти сувси ломаттне, евреень оцюнятне и койти тонафтыхне.6Тоса ульсть озксвятиень оцюнясь Анна, Каиафа, Иоанн, Александр и лият, кит сувсесть озксвятиень оцюнянь юромти.7Апостолхнень ладязь пуромксть инголи и кизефтезь: «Кодама азорксшиса и кинь лемса тинь пчкафтость алять?»

8Эста Пётр, улемок пяшкотьф Иняру Ваймопожфта, кармась корхтама тейст: «Израилень вятихть и евреень оцюнят!9Кда тячи минь сембонь ингольде стяфтомазь и кизефнесамазь коське пильге ломанти пара тевонь тиеманкса, кода сон пчкафтф,10эста улеза содаф сембонди тейнть и Израилень марнек ломаньтналти: тя ломанць ащи шумбраста инголент Назаретонь Иисус Христость лемонц вельде, ся Иисусть, конань тинь эськодесть крёзти и конань Шкайсь вельмафтозе кулофнень эзда.11Иисус –
"кевсь, конань тинь, кудонь путыхне, ёрдасть,
но кона арась кудужень кирди кевкс".

Сондедонза башка оду киньге эса аш идема.12Апак макст ломаттненди лия лем менельть ала, конань вельде минь идеволеме».

13Мзярда оцюнятне няезь Пёторонь и Иоаннонь аф пелемашиснон, шарьхкодезь – инголест ащихть аф тонафнеф, сембе ломаттнень лаца ломатть, и пяк дивандасть. Сяка ёткть синь содазь: нят ульсть Иисусонь мархта.14Но сяс мес Пёторонь и Иоаннонь ваксса ащесь пчкафтф алясь, синь ашесть му мезе азомс каршек.15Оцюнятне мярьгсть апостолхненди аф ламос лисемс, а синць ушедсть эсь ётковаст латцемонза:16«Мезе тиемс ня ломаттнень мархта? Вдь синь вельдест тиевсь афкуксонь дивань тев, кона содаф сембе Иерусалимонь эряйхненди, и тейнек тя тевсь аф сёпови.17Но сядонга афоль келем тя кулясь ломаттнень ёткова, тейнек кемоста кардамат синь: Иисусонь лемса киндиге мезевок аф корхтамс».

18Синь меки тердезь апостолхнень и кардазь синь: оду аф корхтамс, аф тонафтомс Иисусонь лемса.19Но Пётр и Иоанн мярьгсть каршезост: «Арьседовака, кали виде ули Шкайть инголе – сяда пяк кулхцондомс тинь Шкайть коряс?20Тейнек аш кода аф корхтамс сянь колга, мезе няеме и кулеме».21Озксвятиень оцюнятне нинге сядонга пяк эвфтезь апостолхнень, и сяльде нолдазь. Ломаттнень инкса синь ашесть машта наказамс синь, сяс мес сембе шназь Шкайть коське пильгть пчкафтоманц инкса.22Вдь аляти, кона пчкафтфоль тя дивань тевть вельде, ульсь нильгемоньда лама киза.

Кемайхнень озондомасна

23Мзярда синь нолдазь, Пётр и Иоанн мрдасть эсь ломаньцнонды и азозь тейст, мезе мярьгсть озксвятиень оцюнятне и евреень оцюнятне.24Азксснон кулемста, сембе синь кайгиста тердезь Шкайть: «Сембонь Кирди Азороньке, Тон, кона тиезе менельть и масторть, оцюведть и семботь сянь, мезе эсост!25Тон Иняру Ваймопожфть вельде, Давид аляньконь, Тонь покодицень кургса азыть тейнек:
"Мес лия тналонь ломаттне лаказевсть кяжса
и мес ломаньтналхне стак арьсихть прясост кяжи тефт?
26Масторлангонь оцязорхне срхкасть тюрема
и вятихне кочкавсть марса
Азорть и Сонь Христосонц каршес".

27Афкукс тяфта, тя ошса кочкавсть Ирод и Понтий Пилат Израилень ломаттнень мархта и лия ломаньтналхнень мархта Иняру Цёрацень Иисусонь каршес, Ватьфцень каршес.28Синь пяшкодезь сянь, мезе Тон инголькиге арьсеть Эсь мяльсот и вийсот.29Варжакстт тяни, Азор, синь эвфнемаснон лангс, и макст покодихненди аф пелезь азонкшнемс Тонь валцень.30Венептьк Эсь кядцень, пчказаст сярядихне и катк тиевихть дивань тефт и тяштькст Иняру покодицень Иисусть лемса».31Синь озондомдост меле, шерьхкозевсь кудсь, коса синь пуромфтольхть, и сембе пяшкодсть Иняру Ваймопожфса, и кармасть апак пельхть азонкшнемонза Шкаень валть.

Сембось марстонь

32Сембе кемайхнень ульсь фкя седисна и фкя ваймосна. Фкявок ломань эсь уликс-паронц эзда мезнятьке ашезе лемне сонценнекс, синь сембосна марстоннель.33И оцюдонга оцю вийса апостолхне азондсть Иисус Христос Азорть вельмаманц колга, и Шкаень оцю пароказнесь ульсь сембонь синь мархтост.34Синь ётксост ашель фкявок ломань, кона эряль ашушиса, вдь кинь ульсь модац али кудонза, мишендезь и сявф ярмакнень35каннезь апостолхненди. И сембось явондовсь ашстотнень ёткова, макссевсь кинди мзяра эрявсь.

36Тяфта Иосиявок, Кипраста Левиень юромста алясь, конань Апостолхне лемдезь Варнавакс – лемонц смузец: лиянди лезды,37мизе эсь паксяц, и кандозень ярмакнень апостолхненди.


*а 4:11 Псалтирь 117:22

*б 4:25-26 Псалтирь 2:1-2

*в 4:27 Шкайсь вадезе Иисусонь оцю тевонь тиема: идемс Сонь ломаньтналонц пежеснон эзда и тянь вельде пяшкодемс Шкаень надияфтоматнень.


предыдущая глава Глава 4 следующая глава