Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 24

Иисус аноконди азонды Шкаень кудть срафтоманц колга

(Марк 13:1,2; Лук. 21:5,6)

1Иисус лиссь Шкаень кудста. Тоста молемста Тейнза нажядсть тонафниенза, синь мяльсноль няфтемс Тейнза Шкаень кудть сембе ширде.2Иисус мярьгсь тейст: «Няйсасть сембонь тянь? Видеста корхтан тейнть: тяса кев лангс кевга аф ляды, сембось ули срафтф-калафтф».

Мекольдень пинкнень тяштьксна

(Марк 13:3-13; Лук. 21:7-19)

3Мзярда Иисус ащесь озада Вайшуфта пандть лангса, нажядсть Тейнза ськамост тонафниенза и кизефтезь: «Азк тейнек, мзярда тя кармай улема? И кодама тяштьксонь коряс минь содасаськ Тонь самацень и тя пингть пенц?»4Иисус каршезост корхтай: «Ванода, кивок афоледязь васькафта.5Ламотне кармайхть сашендома Монь лемсон и корхтама: "Мон – Христоссян", и ламотнень васькафтсазь.6Тинь марятада тюремань зярьфт и тюремань колга кулят. Ванода, тяда эводе, тянди эряви улемс, но тя нинге аф песь.7Ломаньтналсь кеподи ломаньтнал лангс, масторсь – мастор лангс, сайхть вача пингт и куломань урмат и васток-васток шерьхкозеви модась.8Сембось тя ули, кода шачфтомъётконь маятаматнень ушеткссна.

9Тинь фатятядязь, макстядязь маятамас и шафтядязь, и Монь лемозень инкса сембе ломаньтналхне кармайхть аф кельгомонт.10Эста ламотне аердыхть кемамать эзда, фкя-фкянь эса кармайхть мишендема и фкя-фкянь аф кельгома.11Ся пингть сай лама аф афкуксонь пророкта и ламотнень васькафтсазь.12Коень коламась кармай касома, тянкса ламотнень эса кельми кельгомась.13А кие кирди петь самс, ся идеви.14И тя Пара кулясь Оцязорксшить колга ули пачфтьф марнек масторть келес сембе ломаньтналхненди азондоманкса, и аньцек эста сай пингонь песь».

Оцюдонга оцю ризфсь

(Марк 13:14-23; Лук. 21:20-24)

15«Мзярда тинь няйсасть иняру вастти путф гастямань нулготьксть, конань колга азфоль Даниил пророкть вельде, – лувись катк тянь лац шарьхкодьсы, –16эста сят, кит улихть Иудеяса, катк ворьгодихть панттненди.17Ся, кие тя пингть кармай улема кудбрясонза, катк куду мезеньге сявома аф валгонды,18кие кармай улема паксяса, катк куду эсь щамонзон инкса аф мртци.19Вай, конашкава стака ули ся шитнень пекихненди и идень потяфтыхненди!20Озондода, афоль уле ворьгодеманте тялонда али ваймамань шиня.21Ся шитне пяшкодихть оцю ризфса, кодама ашель масторть тиемста сявомок и тячиень шить самс, и афи кармай улема.22И кда афольхть кирьфтав ся шитне, эста кивок афоль идев, но кочкафнень инкса кирьфтавихть ся шитне.

23Эста, кда кивок тейнть мярьги: "Вага, тяса Христоссь али вона тоса", – тяда кема,24сяс мес сайхть аф афкуксонь христост и аф афкуксонь пророкт, конат кармайхть тиендема оцю тяштькст и дивань тефт кочкафнень васькафтоманкса, кда васькафтовольхть.25Вага, Мон аноконди азондыне тейнть тянь.

26Сяс, кда кие тейнть мярьги: "Ватт, Сон шавмодаса", – тяда яка тоза; али: "Ватт, Сон тя кудботмоса", – тяда кема.27Кода ёндолсь кфчяди шинь стяма ширеста и няеви шинь валгома ширеть молемс, тяфтама ули Ломанень Цёрать самац.28Коса кулофсь, тоза пуромихть ловажада ярхцай нармоттневок».

Ломанень Цёрать самац

(Марк 13:24-37; Лук. 21:25-33, 17:26-30,34-36)

29«Эстокиге, ся ризфонь шитнень меле, ши валдсь шобдалгоды, ковське аф кармай валдоптома, тяшттневок прайхть менельста, менелень вийхневок шерьхкозевихть.30Эста менельса эвондай Ломанень Цёрать тяштьксоц. Масторлангонь сембе ломаньтналхне аварьгодыхть вярьгак вайгяльхть, мзярда няйсазь Ломанень Цёрать, кона сай менелень коволхнень лангса Эсь вийсонза и оцюдонга оцю иневалдсонза.31И торамань кайги вайгяльса Сон кучсыне ангелонзон пуроптома Эсь кочкафонзон сембе масторста – фкя менель песта сявомок омбоцети молемс.

32Кепотьксонди сявость смоква шуфтть: мзярда сонь тарадонза путькияйхть и нолдайхть лопат, эста содасасть: кизось маласа.33Стане тиньге семботь тянь няемста содасть: тя пингсь маласа, кенкшть лангса.34Видеста корхтан тейнть: тяниень пингонь эряйхне аф кенерихть юмамс, кода сембось тя ули.35Менельсь и модась юмайхть, но Монь валне аф юмайхть.

36А мзярда сай ся шись и пингсь, кивок аф содасы, менелень ангелхневок аф содасазь, а аньцек ськамонза Алязе содасы тянь.37Кода ульсь Ноень пингста, стане ули Ломанень Цёрать сама шистонзовок.38Оцюдонга оцю шадоть самдонза инголе ломаттне ярхцесть, симондсть, рьвяйсесть, рьвакс тушендсть, и тяфта ульсь ся шить самс, мзярс Ной изь сува оцю венчезонза.39Ломаттне ашезь сода, мезе ули сай пингть, мзярс ашезь са оцюдонга оцю шадось и ашезень юмафта синь сембонь. Тяфта кармай улема и Ломанень Цёрать самстовок.40Эста кафттне улихть паксяса: фкясь сявови, а омбоцесь кадови.41Кафта аватне кармайхть меленцяса яжама: фкясь сявови, а омбоцесь кадови.

42Сяс ванода, уледа анокт, вдь тинь аф содасасть, кодама шиня сай Азоронте.43Но тейнть содаф тя: кда кудазорсь содалезе, кодама пингоня сай салайсь, эста сон афоль мада и афолезе нолда салайть кудозонза.44Сяс тиньге уледа анокт, сяс мес Ломанень Цёрась сай ся пингоня, мзярда тинь аф учсасть Сонь».

Цебярь и кальдяв покоди

(Лук. 12:41-48)

45«Уледа ёню и кулхцонды покодить лаца, конань азорсь путозе сембе покодиензон лангса оцюнякс – эсь пингстонза ярхцамбялень макссема.46Павазу ся покодись, конань азороц мрдамстонза сатсы тяфта тиендикс.47Видеста корхтан тейнть: азороц путсы сонь оцюнякс марнек уликс-паронц лангса.

48А кда ся покодись ули кальдяв, сон эсь седисонза арьси: "Аф курок сай азорозе",49и ушеды пикссемост эсь покоди ялганзон, ярхцема и симондема симилатнень мархта.50Но ся шиня, мзярда сон аф учсы, и ся пингоня, мзярда сон аф арьси, сай азороц51и пялева керсы покодить, и ёрдасы тов, коза ёрдафт шамафксонь каннихневок. Тоса кармай улема авардема и пеень мчкорфтома».


*а 24:38 оцюдонга оцю шада – потоп


предыдущая глава Глава 24 следующая глава