Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 10

Иисус кучи сизьгемонь тонафни

1Тяда меле Азорсь кочкась нинге сизьгемонь тонафни и кучезень синь кафтонь-кафтонь эстедонза инголи сембе ся ошева и вастова, коза Сонцьке ёрась молемс.2Сон мярьгсь тейст: «Нумада лама, а покайда кржа; ина эняльдеда нумать Азоронцты, кучеза сёронь кочкайхть Эсь паксянц лангс.

3Арда! Мон кучтядязь тинь, кода вероснень врьгаснень ёткс.4Тяда сявонде аф кяскавне ярмаконди, аф канкс, аф омбонц карьсембяльхть, и ки кувалма киньге мархта тяда лотксе шумбракснема.5Мзярда суватада киньге кудс, васенда арьседа кудстотненди сетьмоши.6Улендяряй тоса сетьмошинь эряфс кондясти ломань, эста тинь сетьмошинь арьсеманте иляды тейнза. Кда аш тяфтама ломань, эста мрдай меки эстейнть.7Илядода ся кудса, симода-ярхцада мезьсна ули, сяс мес покайти пандыхть тиф покодеманц инкса. Тяда яка кудста кудс.

8Сандярятада кодамонга ошс и тинь васьфтядязь тоса, ярхцада, мезе максыхть.9Пчкафнесть тостонь сярядихнень, азость сембонди: "Шкаень Оцязорксшись маласонт".10Сандярятада кодамонга ошс и аф васьфттядязь, эста ётада курняваст и азость:11"Нльне пультьке, кона педсь пильгозонк ошсонт, шукадьсаськ ширесонт, но содасть: Шкаень Оцязорксшись маласонт".12Азса тейнть, Содом ошти судонь шиня ули сяда тёждя тя ошть коряс».

Иисус апрякасыне Галилеянь ошнень Шкайти аф шарфтоманкса

(Матф. 11:20-24)

13«Кальдяв тейть, Хоразин ош! Кальдяв тейть, Вифсаида ош! Кда ня вии тефне, конат няфтьфтольхть тинь ётксонт, улельхть няфтьфт Тирса и Сидонца, ня ошэряйхне ризнамань щамса и кулуса почетфста кунаркиге шарфтольхть эсь пежеснон эзда.14Но Тирти и Сидонти судонь шиня ули сяда тёждя тинь корязонт.15И тон, Капернаум ош, арьсят, кепоттядязь менели? Аф, тон улят ёрдаф аду.

16Тинь кулхцондыенте Монь кулхцондсамазь, и тинь эздонт аердысь Монь эздон аерды; а Монь эздон аердысь Монь Кучиезень эзда аерды».

Сизьгемонь тонафнихнень мрдамасна

17Сизьгемонь тонафнихне мрдасть кеняртьфста и корхтасть: «Азор, кяжи ваймопожфневок кулхцондомазь, мзярда кошярясаськ Тонь лемсот!»18Сон мярьгсь тейст: «Мон няине Сатанать ёндолкс менельста праманц.19Вов, Мон максонь тейнть азорксши шятямс куень, скорпиононь лангс и азорксши сембе кальдяв вийхнень лангса, и мезеньге кальдяв синьцтост аф ули тейнть.20Аньцек тяда кенярде сянди, мес кяжи ваймопожфне кулхцонттядязь; кенярдеда сянди, мес лемонте сёрматф менельса».

Шкайсь панжеви ломаттненди Цёрать вельде

(Матф. 11:25-27, 13:16,17)

21Тя ёткть Иняру Ваймопожфсь пяшкодезе Иисусонь кенярдемада, и Иисус мярьгсь: «Аляй, менельть и масторть Азороц! Шнате Тонь сянкса, мес Тон кяшить тянь смузюфнень и шарьхкодихнень эзда и панжить тянь ёмла иттненди. Виде, Аляй, вдь тяфтама ульсь Тонь пара мяльце.

22Иисус шарфтсь тонафниензонды и мярьгсь: Алязе семботь максозе Монь кядялон. Кие Цёрась, аф содасы кивок Аляда башка; и кие Алясь, аф содасы кивок Цёрада башка, и сяда башка, кинди Цёрась ёрасы панжемс Сонь».

23Сяльде Иисус шарфтсь тонафнихненди и мярьгсь аньцек тейст: «Павазуфт сельмотне, конат няйсазь сянь, мезе тинь няйхтяда!24Азондса тейнть, ламоц пророкне и оцязорхне ёрасть няемс сянь, мезе тинь няйхтяда, и ашезь няе; ёрасть кулемс сянь, мезе тинь кульхтяда, и ашезь куле».

Валвеляфкс кельги седи Самариянь эряйть колга

25Вов, стясь койти фкя тонафтысь и ёрамок кундамс Иисусонь валса, мярьгсь: «Тонафты! Мезе тейне тиема пефтома эряфонь сатоманкса?»26Иисус мярьгсь тейнза: «Мезе сёрматф койса? Кода лувсак?»27Ся каршезонза: «Кельк Азорть, эсь Шкайцень, сембе седисот, сембе ваймосот, сембе вийсот, сембе шарьхкодемасот, и маластот ломанть, кода эсь пряцень».28Иисус мярьгсь тейнза: «Видеста азыть; тяфта тиентть, и кармат эряма».

29Но койти тонафтыть мялецоль няфтемс: сон коень ванфты ломань, и сяс мярьгсь Иисусонди: «А кие монь маластонь ломанезе?»

30Тянь каршес Иисус мярьгсь: «Фкя алясь мольсь Иерусалимста Иерихону и повсь нельги-шавиень кядьс, конат каяфтозь щамонзон, пикссезь и тусть, кадозь пялес кулоста.31Лиссь тяфта, ся киге савсь ётамс фкя озксвятиенди. Сон няезе пикссефть и ётась ваксканза кить омбокова.32Стане тись левиеннеське: пачкодсь ся вастти, няезе пикссефть и ётась кить омбокс.

33Самариянь фкя эряйтьке киц прась тияне. Сон няезе пикссефть и тейнза ужялькс арась ломанць.34Мольсь малазонза, керсеф-тапаф васттнень штазень винаса, вадезень вайса и сотнезень; сяльде озафтозе осёлонц лангс, ускозе инжиень куду и тоса якась мельганза.35Омбоце шиня, тумстонза, сон таргась кафта динарийхть и максозень инжиень кудть азоронцты, мярьгсь тейнза: "Якак мельганза; ётафтондярят сяда лама, меки мрдамстон пандсайне".36Кие ня колмотнень эзда, тонь койсот, лувови маластоннекс нельги-шавиень кядьс повф ломанти?»

37Койти тонафтысь мярьгсь: «Ся, кие ужяльдезе сонь». Эста Иисус мярьгсь тейнза: «Архт, тонга тяфта тиентть».

Марфа и Мария сазорхне

38Сяда тов киснон поладомста Иисус тонафниензон мархта лоткась фкя велес. Тяса фкя авась, Марфа, тердезе пялонза.39Сонь ульсь сазороц Мария, кона озась Азорть пильгонзон ваксс и кулхцондозе Сонь корхтаманц.40Марфа пульхксь каванямань шрать перьф. Сон маладсь Иисусонди и мярьгсь: «Азор, кали Тейть сембе сяка, мес сазорозе кадомань ськамон шаромс инжихнень перьфке? Азк тейнза, катк лезды тейне».41Иисус каршезонза мярьгсь: «Марфа! Марфа! Тон пичедят и пульхкат ламонкса,42а эряви аньцек фкя. Мария кочказе цебярь пяльксть, кона кядьстонза аф нельгови».


*а 10:32 левиеннетне – Левиень юромста лисьф ломаттне, конат покодсть Шкаень кудса


предыдущая глава Глава 10 следующая глава