Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 9

Шкайсь кочказе Израильть

1Мон корхтаса видеть и кемокстаса тянь Христость лемса. Мон аф кяльготнян и тянь кемокстасы монь ваймовайгялезе, кона вятневи Иняру Ваймопожфса.2Монь оцюдонга оцю ризфозе, и седисон пефтома сярятьф3ялганень – фкя веронь ломаннень инкса! Сяда пароль эстейне улемс вастозост сюдофокс и Христость эзда явфокс.4Синь Израилень ломатть: Шкайсь тиезень синь Эстейнза идькс и няфтезе тейст Эсь иневалдонц. Синь мархтост Сон ладясь соткст и макссь тейст кой, тяка лангс макссь тейст озксвятема и Шкаень надияфтомат.5Синнет ульсть кунардонь пингонь атянь-атятневок, и синь эздост ломанькс шачсь Христос, семботь лангса ащи Шкайсь, кона бславаф пефтома пингс! Аминь.

6Но тя аф корхтай сянь колга, бта Шкайсь ашезе пяшкоде Эсь надияфтоманц. Вдь аф сембе израиленнетне афкуксонь Израильсь.7И аф сембе Авраамонь эзда шачфне тейнза афкуксонь итть, но Шкайсь мярьгсь Авраамонди: «Исааконь эзда шачфне лемдевихть тейть уноконь-унококс».8Стане, аф сембе Авраамонь эзда шачфне лувовихть Шкаень идькс, а аньцек сятне, конатнень шачемасна ульсь надияфтф Шкайть эзда.9А надияфтомаса ульсть тяфтама валхт: «Кизода меле Мон тага саян тяка пингть, и Саррань кармай улема цёрац».

10И тя аф сембе. Ревеккань цёранзон ульсь фкя-сяка алясна, минь атянь-атяньке Исаак.11-12Мзярда иттне нинге афи шачендсть и мезевок ашесть кенере тиемс, аф цебярь, аф кальдяв, Шкайсь ни мярьгсь Ревекканди: «Оцюсь кармай ёмлать лангс покодема». Тяфта Шкайсь няфтезе: Сон кочкась Эсь мяльсонза, аньцек тердеманц коряс, аф ломанень тевть коряс.13Сёрматфксса тяфта и корхтави:
«Иаков тейне кельговсь, а Исав аердавсь».

14Мезе тянь лангс астама? Шкайсь тиенди аф видеста? Прокс аф!15Моисеенди Сон мярьгсь:
«Кинди мялезе, сянди няфтьса кельгозь ужяльдемазень,
кинь мялезе ужяльдемс, сянь ужяльдьса».

16Тяфта, сембось тя ащи аф ломанть мяленц и путф виенц эзда, а Шкайть кельгозь ужяльдеманц эзда.17Сёрматфксса Шкайсь корхтай фараонти: «Мон путыхтень тонь оцязоркс ва мес: няфтемс тонь лангсот Эсь виезень и марнек масторлангса тиемс содавиксокс Монь лемозень».18Лисенди, Шкайсь Эсь мяленц коряс финцнень ужяльдьсыне, а лиятнень седиснон кевонзафтсыне.

Шкаень кяжсь и кельгозь ужяльдемась

19Тон кизефтьсамак монь: «Эста мезенкса Шкайсь муворгофнесыне ломаттнень? Дяряй киньге ули виец молемс Сонь мяленц каршес?»20Но кият тон, ломань, пялькстомс Шкайть мархта? Кали мярьги кядьгонясь кядьгонянь тиити: «Мезенди тяфтамкс тиемайть?»21Мезе, кали кядьгонянь тиить аш виец фкя-сяка сёвоньцта тиемс фкя питни кядьге и фкя стакшинь кядьге?22Тяфта тись Шкайське: Сон ёрась няфтемс Эсь кяженц и Эсь виенц. Сяка Сон куватьс сатфтозе кирдемшканц ня кядьготнень мархта, конат срхкафнезь кяженц и конат эрявсть тапамс.23Тяда башка Сон путсь мяль няфтемс пефтома оцю иневалдонц ся кядьготнень лангса, конатнень Сон Эсь кельгозь ужяльдеманц вельде аноклазень иневалдти.24Кельгозь ужяльдемань кядьготне – тя минь. Минь сембонь тердемазь Шкайсь, аф аньцек еврейхнень, тякокс лия ломаньтналхненьге.25Осиянь книгаса Сон корхтай тянь колга:
«Ломаньтналть, кона аф Моннель,
лемдьса Монценнекс,
и аф кельговить – кельговиксокс.
26И ся вастса, коса азфоль тейст:
"Тинь аф Монь ломаньтналозе", –
тоса синь улихть лемтьфт эряй Шкайти идькс».

27А Исаия ювади Израильть колга:
«Улендяряй израиленнетнень лувкссна оцюведень шувар лаца,
сембе сяка идеф ули аньцек лядыкссь.
28Вдь Азорсь тисы тевть педа-пес
и курок пяшкодьсы сонь видешить коряс.
Апак абонкшнек Азорсь аделасы тевонц масторть лангса».

29Эста лиси тяфта, кода ингольпяли азозе Исаия:
«Кда Саваоф Азорсь
афоль када тейнек юромонь поладыхть,
минь аралеме Содомть лаца, и шаролеме Гоморрать лангс».

Израильсь и Пара кулясь

30Ина мезе лисенди? Лия ломаньтналхне, конат ашесть вешенде видексшинь эряф, сатозь сонь, мусть видексшинь эряф, кона кемамать эзда.31А Израильсь, кона коень ванфтомать вельде ёразе сатомс видексшить, ашезь пачкоде тейнза.32Мес? Сяс мес синь нежетькшнесть аф кемамать, а коень тефнень лангс. Тяфта синь пупордасть «пупордамань кевть» ланга,33кода тяштьф Сёрматфксса:
«Вов, Мон путан Сиону кев, и кармайхть ланганза пупоряма,
кев, конань ланга синь прайхть.
Но ся, кие кемай Тейнза, аф сувай визькс шамас».


*а 9:13 Малахия 1:2-3

*б 9:15 2 Моисея 33:19

*в 9:25 Осия 2:23

*г 9:26 Осия 1:10

*д 9:27-28 Исаия 10:22-23

*е 9:29 Исаия 1:9

*ж 9:33 Исаия 28:16


предыдущая глава Глава 9 следующая глава