Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 7

Мелхиседек озксвятись

1Мелхиседек, Салим ошень оцязорсь и Инь Вярдень Шкайть озксвятиец, васьфтезе и бславазе Авраамонь, мзярда ся мольсь тюремвастста, оцязорхнень сяськомдост меле.2И Авраам максозе тейнза кемонце пяльксть тюремвастста сембе сявфть эзда. Васендакиге, Мелхиседек лемть смузец «видексшинь оцязор». Тяда башка, Мелхиседек ульсь Салимонь оцязоркс, лиякс, «сетьмошинь оцязоркс».3Сёрматфксса мезевок апак аст сонь тядянц али алянц колга, али сонь шачемань юромонц колга. Сонь эряфонц аш ушетксоц, аш пец. Сон Шкаень Цёрать лаца; сон иляткшни озксвятикс пефтома пингс.

4Ваность, конашкава оцю ся, конанди мянь Авраам, Израилень ломаньтналть ушедыец, максозе кемонце пяльксть сембодонга цебярть эзда, кона ульсь сявф оцязорхнень сяськомдост меле.5Левиень цёранзонды, конатненди макссеви озксвятемань тевсь, койсь мярьги кочксемс кемонце пяльксть ломаньтналть кядьста, лиякс мярьгомс, эсь брадонзон кядьста, хуш синьге Авраамонь иденза.6Но Мелхиседек, улемок аф Левиень юромста, сявозе кемонце пяльксть Авраамонь кядьста и бславазе сонь эста, мзярда тейнза ни максфтольхть надияфтоматне.7Апак корхтак содави, ёмлась бславави сяда оцюса.8Тяса кемонце пяльксть сявсазь ломаттне, конат кулыхть, а тоса кемонце пяльксть сявозе ся, кона эряй пефтома, и тянь кемокстасы Сёрматфкссь.9Лисенди, мянь Левийге, конанди макссесазь кемонце пяльксть, Авраамонь вельде пандозе кемонце пяльксть Мелхиседеконди.10Вдь Левий ульсь нинге Авраамонь, юромонь ушедыть потмоса, мзярда Мелхиседек васедсь Авраамонь мархта.

11Кда левиень озксвятемась, конань вельде максф койсь, вятель афсатыксфтомашити, эста мезенди эрявсь лия озксвяти, конань озксвятемац Мелхиседеконь лаца, а аф Аарононь лаца?12Кда полафты озксвятемась, эста полафты койське.13Ся, конань колга тяфта корхтави, лиссь лия юромста, конаса кивок ашезь покоде озксвятикс алтарть инголе.14Содаф, минь Азороньке ульсь Иудань юромста. Но тя юромть кувалма Моисей мезевок ашезь аза, мзярда корхтась озксвятемань тевть колга.

Озксвятиень оцюня Мелхиседеконь лаца

15Тя сембось тиеви нинге сяда шарькодевиксокс, мзярда эвондай лия Озксвяти, кона Мелхиседеконь лаца.16Сон арась озксвятикс пефтома эряфть виенц коряс, а аф койть кошардомвалонц коряс, кона ваны шачемань юромть лангс.17Вага кода Сёрматфкссь кемокстай Сонь колганза:
«Тон улят озксвятикс пефтома пингс Мелхиседеконь лаца».

18Ингольдень кошардомвалть полафтозь, сяс мес сон ульсь лафча и ашезь канне кодамовок лезкс.19Вдь Моисеень коец мезтьке ашезе тие афсатыксфтомокс. Сонь вастозонза тейнек максови сяда цебярь надияма, конань вельде минь малаткшнетяма Шкайти.

20Иисусонь озксвятемац кемокстафоль Шкайть варамань валсонза.21Ингольдень пинкнень озксвятикс арсесть варамань валфтома. А Иисус арась озксвятикс варамань вал вельде, сяс мес Тейнза азфоль:
«Азорсь варась и аф полафтсы мяленц:
"Тон улят озксвятикс пефтома пингс Мелхиседеконь лаца"».

22Тяфта, варамась няфти, конашкава сяда пара ся соткссь, конанди Иисус тиевсь кемокстайкс.

23Ингольдень озксвятида ульсь лама, сяс мес куломась ашезь макссе тейст лядомс озксвятемань покодемасост,24а Иисус эряй пефтома пингс, и Сонь озксвятеманцты аф ули пе.25Сяс Сонь ули виец фалу идемс сятнень, кит вельденза сашендыхть Шкайти. Вдь Иисус эряй пефтома пингс и озонды синь инксост.

26Самай тяфтама Озксвятиень оцюня тейнек и эрявсь: иняру, аф мувору и ару. Сонь явфтозь пежуфнень эзда и кеподезь менельда вяри.27Тейнза аф эряви, кода лия озксвятиень оцюнятненди, эрь шиня каннемс озксказнет инголи эсь пежензон инкса, а сяльде ломаньтналть пежензон инкса. Сяс мес Сон максозе Эсь прянц озксказнекс, весть и сембе пинкненди.28Койть коряс озксвятиень оцюнякс путневихть лафча ломатть, а варамань валть коряс, кона максфоль койть мельге, озксвятиень оцюнякс ульсь путф пефтома пингс афсатыксфтома Шкаень Цёрась.


*а 7:17 Псалтирь 109:4

*б 7:21 Псалтирь 109:4


предыдущая глава Глава 7 следующая глава