Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 9

Лезксонь кочкамась Коринф ошса

1Шкаень ломаттненди лезксонь максомать колга, арьсян, тейне аш мезенди сёрмадомс тейнть.2Мон содаса тинь оцю мялентень лездомс, и мон шнаян эсонт Македониянь кемайхнень инголе: азондыне тейст, кода Ахаиясь аноклазень лезксонь максоматнень нинге ётай кизотькиге. И тинь тяфтама оцю мяленте лездомс, синь ётксостка ламотнень сргозьфтезень тя тевти.3Но мон сякокс кучсайне тинь ширезонт ня кемай ялганьконь, сяс мес мялезе тяфтама: улеледе анокт лездоманди, кода мон и корхнень. И эста тинь эсонт шнамазе тя тевса аф ули шавокс.4Вдь кда сайхть мархтон Македониянь кемайхне, а тинь аф аноктада, эста минь пофтама визькс шамас, мес сяшкава кемоста шнакшнедязь тинь. А конашкава визькс ули тейнть, мон ни афи корхтан!5Сяс мон лувине эрявиксокс азомс ня кемай ялганьконди: сальхть миньдонк инголи ширезонт и инголькиге аноклалезь надияфтф казнентень. Эста тя ули афкукс эсь мяльса максф казне, а аф вихца кочкаф.

6Тевсь вага мезьса: кие кржа види, ся кржа и кочкай. А кие лама види, ся лама и кочкай.7Катк эрсь максы сняра, кода мярьги седиец, аф пичедезь и аф вихца кошардозь. Вдь Шкайсь кельгсы кенярдезь максыть.8Сонь ули виец вельф каземс тинь эрь кодама пароказнеса. Эста тейнть фалу и сембоса кармай улема сембе эрявикссь, и тяконь лангс нинге вельф саты эрь кодама пара тевонди.9Кода азф Сёрматфксса:
«Сон аф ужяльди кядьса явондсь ашуфненди,
и сонь видексшиц кирдеви пефтома пингс».

10Шкайсь, кона максси видьмот видити и кшиса аннесы ломанть, тейнтьке максы видьмот, ламолгофтсы сянь, мезе озафттада, и касфтсыне эсонт видексшинь тефнень.11Тяфта, тинь ульхтяда сяшкава козят сембоса, нльне максомста фалу ульхтяда мезеньге аф ужяльдикс. Сяс ламотне кармайхть азонкшнема сюконямат Шкайти тинь казнентень инкса, конат максовихть минь вельденк.

12Тя покодеманте лезды аф аньцек иняру ломаттненди синь ашушисост, но тяда башка, ламотнень тисыне сюконяйкс, и сяс синь седистост кармайхть шудезь шудема сюконямань валхт Шкайть шнаманцты.13Иняруфне шнасазь Шкайть сянкса, мес тинь афкукс кематада Христость колга Пара куляти, конань тинь пачфнесасть-азонкшнесасть и тя лац няеви тинь покодемастонт; и шнасазь сянкса, мес тинь седи ваксста лезттада тейст и лия кемайхненди.14Тяда башка, синь кармайхть озондома инксонт и сембе седиса ёрама няемс тинь, сяс мес Шкайсь казедязь тинь Эсь аф ункстави пароказненц мархта.15Сюконяма Шкайти аф азовомшка казненц инкса!


*а 9:9 Псалтирь 111:9


предыдущая глава Глава 9 следующая глава