Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 18

Иисусонь кундамац

(Матф. 26:47-56; Марк 14:43-50; Лук. 22:47-53)

1Тянь азомда меле Иисус Эсь тонафниензон мархта тусь Кедрон шудерьксть тона пяли. Тоса ульсь иможбере, коза Сон сувась тонафниензон мархта.2А тя вастть содазе Иудавок, Иисусть мииец; вдь Иисус тонафниензон мархта сидеста якась тов.3И вага Иуда сась тов, мархтонза вятсь Римонь ушматт и Шкаень кудонь ваныхть, конатнень кучезь озксвятиень оцюнятне и фарисейхне. Сембонь кядьса ульсть тюрембяльхть и валдоптомат-месть.

4А Иисус содазе семботь, мезе тиеви мархтонза, лиссь и мярьгсь тейст: «Кинь вешенттяда?»5Азозь Тейнза: «Назаретонь Иисусть». Иисус корхтай тейст: «Тя – Монан». Ётксост ульсь Иудавок, Сонь мииец.6И мзярда Иисус мярьгсь тейст: «Тя – Монан», синь потасть и прашендсть модать лангс.7Иисус тага кизефтезень синь: «Кинь вешенттяда?» Сят мярьгсть: «Назаретонь Иисусть».8Иисус каршезост мярьгсь: «Мон мярьгонь тейнть: тя Монан. Сяс, кда Монь вешендьсамасть, нолдасть мархтоннетнень, катк туйхть».9Сон мярьгсь тяфта, сяс мес эрявсь пяшкодевомс Сонь валонзонды: «Сятнень ёткста, конатнень Тон максыть Тейне, Мон киньге ашине юмафта».

10Симон Пёторть ульсь тороц. Сон таргазе торть, яфодсь мархтонза и керозе озксвятиень оцюнять покодиенц види пиленц. Покодить лемоцоль Малх.11Но Иисус мярьгсь Пёторонди: «Путк торцень вастозонза. Дяряй Тейне аф симома кядьгось, конань максозе Тейне Алязе?»

Иисусть вятьсазь Аннанди

(Матф. 26:57,58; Марк 14:53,54; Лук. 22:54)

12Эста Римонь ушматтне оцюняснон мархта и Шкаень кудонь ваныхнень мархта сявозь Иисусонь и сотнезь Сонь.13Васенда Сонь вятезь Аннанди; ся ульсь Каиафань атявозец, а Каиафа ся кизоня озксвятиень оцюняль.14Тя ульсь ся Каиафась, кона макссь еврейхнень оцюняснонды стама мяль-арьсема: сяда цебярь ули, кда фкя ломань кулы ломаньтналть инкса.

Пётр потай Иисусонь эзда

(Матф. 26:69,70; Марк 14:66-68; Лук. 22:55-57)

15Иисусонь мельге мольсть Симон Пётр и тага фкя тонафни. Тя тонафнись ульсь озксвятиень оцюнять содафоц, сясы сувась Иисусонь мархта озксвятиень оцюнять пирьфс,16а Пётр лядсь ортать ваксс ушеса. Сяльде ся тонафнись, кона озксвятиень оцюнять содафоцоль, лиссь и корхнесь ортань ваны авать мархта и сувафтозе Пёторонь пирьфи.17Тяса ортань ваны авась корхтай Пёторонди: «Улема, тонга Ся Ломанть тонафниензон эзда?» Сон мярьгсь: «Аф».18Якшамоль, сяс покодихне и Шкаень кудонь ваныхне плхтасть седень толмар, ащесть вакссонза и эжендсть. Пёторга ащесь мархтост и эжендсь.

Анна озксвятиень оцюнясь кизефнесы Иисусонь

(Матф. 26:59-66; Марк 14:55-64; Лук. 22:66-71)

19Озксвятиень оцюнясь кизефнесь Иисусонь кядьста Сонь тонафниензон и тонафтоманц колга.20Иисус каршезонза мярьгсь: «Мон корхнень масторлангти панжада, сембонь ингольде. Мон най тонафтонь синагогава и Шкаень кудса, коза еврейхне фалу пуромкшнихть марс. Салава мезевок ашень корхне.21Мес Монь кизефнесамак? Кизефтить сятнень, кит марямазь, мезе Мон корхнень тейст; вов, синь содасазь, мезе Мон корхнень».

22Мзярда Иисус тянь азозе, Шкаень кудонь ваныхнень эзда фкясь, кона ащесь сяда маласа, эрьхтезе Сонь шама ланга и мярьгсь: «Тяфта Тон корхтат озксвятиень оцюняти?!»23Иисус каршезонза мярьгсь: «Кда мярьгонь аф лац, няфтьк, мезсь кальдяв; а кда видеть азыне, эста мес эрьхтемайть?»

24Анна кучезе Иисусонь сотнефста Каиафа озксвятиень оцюняти.

Пётр тага потай Иисусонь эзда

(Матф. 26:71-75; Марк 14:69-72; Лук. 22:58-62)

25А Симон Пётр ащесь и эжендсь. Тяса тейнза мярьгсть: «Улема, тонга Ся Ломанть тонафниензон ёткста?» Сон тянь сёпозе и мярьгсь: «Аф».26Эста озксвятиень оцюнянь фкя покодись, сянь радняц, конань пиленц керозе Пётр, мярьгсь: «Афоли тонь няихтень иможбереса Ся Ломанть мархта?»27Пётр тага сёпсь; и ся пингть моразевсь атякшсь.

Иисус Пилатонь инголе

(Матф. 27:1,2,11-14; Марк 15:1-5; Лук. 23:1-5)

28Шобдава Иисусонь сявозь Каиафань пяльде и вятезь Пилатонь азоргудонцты. Синць куду ашесть сува – пельсть гастямада, конань инкса синь афольхть ярхцав Очижинь верозда.29Сяс лиссь Пилат и мярьгсь тейст: «Мезьса муворгофнесасть Тя Ломанть?»30Синь каршезонза мярьгсть: «Аф улендяряль Сон кальдяв тевонь тии, минь афолеськ вяте Сонь тейть».31Пилат мярьгсь тейст: «Тинць сявость Сонь и эсь коентень коряс судендасть». Еврейхне каршезонза мярьгсть: «Минь аш азорксшиньке ломанень шавомс».32Тя лиссь, сяс мес эрявсь пяшкодевомс Иисусть валонзонды, конатнень вельде Сон шарьхкотьфтезе, кодама куломаса кулы.

33Эста Пилат тага сувась азоргуду, тердезе Иисусонь и кизефтезе Сонь: «Тон еврейхнень Оцязорснат?»34Иисус каршезонза мярьгсь: «Тонць тянь арьсить, али лиятне азондсть колган?»35Пилат мярьгсь каршезонза: «Дяряй мон евреян? Тя Тонцень ломаньтналце и озксвятиень оцюнятне максодязь тейне. Мезе Тон тиеть?»36Иисус азозе: «Монь Оцязорксшизе аф тя масторлангонь. Кда улель Монь Оцязорксшизе тя масторлангонь, эста Моннетне тюрельхть инксон и Монь афолемазь макса еврейхнень оцюняснонды. Но Монь Оцязорксшизе аф тястонь».37Пилат мярьгсь Тейнза: «Лисенди, Тон Оцязорат?» Иисус каршезонза: «Тон корхтат: Мон Оцязоран. Мон шачень и сань масторлангти видешить колга азондома; сембе, кит видешить эзда, кулхцондсазь Монь вайгялезень».38Пилат мярьгсь каршезонза: «Мезсь видеши?»

Иисусонь куломас судендамац

(Матф. 27:15-31; Марк 15:6-20; Лук. 23:13-25)

Кизефтемок тянь, тага лиссь еврейхненди, мярьгсь тейст: «Сонь муворгофтомс мон кодамовок туфтал аф мушендан.39Тинь вдь ули коенте: Очижинди мон нолдан тейнть фкя ломань. Ули мяленте, нолдаса еврейхнень Оцязорснон?»40Эста сембе кармасть юватькшнема: «Аф Сонь, нолдак Вараввань!» А Варавва ульсь салай-шави ломань.


*а 18:24 Анна инголи ульсь озксвятиень оцюнякс. Мзярда Римонь ломаттне сявозь еврейхнень масторснон, Аннань вастс путозь Каиафань, но тяда мелевок ломаттне Аннань нинге лемнезь озксвятиень оцюнякс.


предыдущая глава Глава 18 следующая глава