Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 9

1Иисус мярьгсь тейст: «Видеста корхтан тейнть: тяса ащихнень ёткса улихть стапт, конат нинге аф кенерихть куломс, кода ни няйсазь Шкаень Оцязорксшить, кона сась сембе вийсонза».

Иисусонь лиякстомац

(Матф. 17:1-13; Лук. 9:28-36)

2Кота шида меле Иисус сявозень Пёторонь, Иаковонь и Иоаннонь и куцсь мархтост сери панда пряс, коса ульсть ськамост. Тоса инголест Сон лиякстомсь.3Щамонза пиндолгодсть и вандолгодсть стама акшеса, кода киндинге модать лангса афольхть акшептов.

4Тейст эвондасть Илия и Моисей; и синь корхнесть Иисусонь мархта.5Ся пингоня Пётр мярьгсь Иисусти: «Тонафты! Кодань пара тейнек тяса. Эрь тихтяма колма кошт: фкять Тейть, фкять Моисеенди и фкять Илиянди».6Пётр мярьгсь тяфта, сяс мес ашезе сода, мезе корхтамс, вдь тонафнихне ульсть пяк эвотьфт.7Эста эвондась ковол, кона вельхтязень синь, и коволть потмоста кулевсь вайгяль: «Тя Монь кельгома Цёразе. Кулхцондость Сонь».8Тонафнихне эстокиге варжакстсть перьфпяльге, и киньге ни, Иисуста башка, ашезь няе.

9Пандть пряста валгомста Иисус мярьгсь тонафниензонды киндинге мезевок аф азонкшнемс сянь колга, мезе няйсть, мзярс Ломанень Цёрась аф вельмай кулофста.10Тонафнихне кирдезь Иисусть валонзон седисост и эсь ётковаст корхнесть, мезе стамсь кулофста вельмамась.

11Синь кизефтезь Иисусонь: «Мес мле койти тонафтыхне корхтайхть: васенда сама Илиянди?»12Сон каршезост мярьгсь: «Виде, васенда сама Илиянди и сон семботь путсы эсь вастованза. И Ломанень Цёрать колга сёрматф: Тейнза сави кирдемс лама маятамада и сялдомада.13Но азса тейнть: Илия сась ни и ломаттне мархтонза тисть эсь мяльснон коряс, кода сёрматф колганза».

Иисус панцы кяжи ваймопожфть цёранять потмоста

(Матф. 17:14-20; Лук. 9:37-43)

14Иисус колма тонафниензон мархта сась ляды тонафнихненди. Вакссост няйсь лама ломаньда и койти тонафтыда, конат пялькснесть синь мархтост.15Мзярда няезь Иисусонь, сембе дивандазевсть и эряскодсть мархтонза шумбракстома.16Иисус кизефтезень синь: «Мезень колга пялькстоманте?»17Ломаттнень ёткста фкясь мярьгсь Иисусти: «Тонафты! Мон вятине Тейть цёранязень, сонь эсонза кяжи ваймопожф, кона тиезе сонь аф корхтайкс.18Коса аф кундасы сонь, прафтсы модать лангс, и кургстонза туй шов, порьсыне пеензон и шуфтоми. Энялькшнень тонафнихненди, панелезь эздонза, а тейст ашезь панев».

19Иисус каршезонза мярьгсь: «Вай, тяниень пингонь аф кемай ломатть! Мзярс Мон карман улема тинь мархтонт? И мзярс карман кирдемонт тинь? Вятесть цёранять Тейне».20Вятезь цёранять Иисусти. Кодак кяжи ваймопожфсь няезе Иисусть, сон калкфтозе цёранять; ся прась мастору и кеворькшнесь, кургстонза лиссь шов.21Иисус кизефтезе алянц: «Кунара сон тяфта арась?» Ся мярьгсь: «Идькс пингстонза.22Ламоксть кяжи ваймопожфсь ёрязе сонь толтиге и ведтиге, ёразе шавомс. Но кда Тейть мезе тиеви, ужяльдемасть и лезтт тейнек!»23Иисус мярьгсь тейнза: «Кда Тейть мезе тиеви? Сембось тиеви сянди, кие кемай».24Эстокиге цёранять аляц ювадсь: «Мон кеман, Азор! Лезтт тейне кемамс!»

25Иисус няезе, кода ломаттне ласькихть ширезонза. Сон кардазе аф ару ваймопожфть: «Кяльфтомокс и пярявкс арафни ваймопожф! Мярьган тейть: листь потмостонза и оду тят сувсе эзонза».26Кяжи ваймопожфсь пешкодсь, вииста калкфтозе цёранять и лиссь эздонза. Цёранясь арась кода кулоф, сяс ламотне корхтасть: «Сон кулось».27Но Иисус сявозе цёранять кядьта и арафтозе пильге лангс, и ся стясь.

28Мзярда Иисус сувась куду, тонафниенза, ломаттнень эзда башка, кизефтезь Сонь: «Мес тейнек ашезь панев кяжи ваймопожфсь?»29Сон мярьгсь тейст: «Тяфтама ваймопожфсь лиякс аф лихтеви, аньцек озондомаса и постонь кирдемаса».

Иисус тага азонды Эсь куломанц колга

(Матф. 17:22,23; Лук. 9:43-45)

30Тоста тумда меле Иисус и тонафниенза ётасть Галилеять пачк. Иисусть ашель мялец, кивок содалезе тянь;31вдь Тейнза эрявсь тонафтомс Эсь тонафниензон. Сон корхнесь тейст: «Ломанень Цёрать макссазь ломаттнень кядьс и синь шавсазь Сонь, и куломдонза меле колмоце шиня Сон вельмай кулофста».32Но синь ашезь шарьхкоде ня валонзон, а кизефтеманц пельсть.

Кие сембода оцюсь?

(Матф. 18:1-5; Лук. 9:46-48)

33Синь састь Капернауму. Кудса Иисус кизефтезень синь: «Мезень колга корхнеде ки лангса?»34Синь кашт исть моле, сяс мес ки лангса корхнесть, кие ёткстост сембода оцю.35Иисус озась, тердезень кемгафтувотнень и мярьгсь тейст: «Кинь мялец улемс васенцекс, сембонь ёткста улеза мекольцекс и сембонди покодикс».36Эста Иисус сявсь идь, арафтозе тонафниензон инголи, озафтозе элезонза и мярьгсь тейст:37«Кие сяви фкя тяфтама идь Монь лемсон, ся Монь сявсамань. А кие Монь сявсамань, ся аф Монь, но Монь Кучиезень сявсы».

Кие тейнть аф каршек, ся ащи инксонт

(Лук. 9:49,50)

38Иоанн мярьгсь: «Тонафты! Минь няеме ломань, кона Тонь лемсот панци кяжи ваймопожфт, а мархтонк аф якай. Минь кардаськ сонь тянь тиендемда, сяс мес аф якай мархтонк».39Иисус мярьгсь: «Тясть карне сонь; кие Монь лемсон тии дивань тев, ся кальдяв вал лангозон аф азы.40Ся, кие аф моли тейнть каршек, ся ащи инксонт.41И кие максы тейнть симомс ведь карьхкя Монь лемсон, сяс мес тинь Христосоннетяда, видеста корхтан тейнть: ся казнефтома аф иляды».

Пежес сувафтомась

(Матф. 18:6-9; Лук. 17:1,2)

42«А кие вятьсы пежес конанцка фкять ня ёмлатнень эзда, конат тейне кемайхть, сянди улель сяда пара, кда сялдазозонза повфтальхть яжама кев и ёрдалезь оцюведти.43Кда тонь кядьце вяттянза пежес, керк сонь: тейть сяда пара ули фкя кядьса сувамс пефтома пингонь эряфти, адонь аф мадонды толти кафцьке кядьса ёрдамать коряс,44коса эздост ярхцай сукссь аф кулси, коса толське аф мадонды.45Кда тонь пильгце вяттянза пежес, керк сонь: тейть сяда пара ули фкя пильгса сувамс пефтома пингонь эряфти, адонь аф мадонды толти кафцьке пильгса ёрдамать коряс,46коса эздост ярхцай сукссь аф кулси, коса толське аф мадонды.47Кьда тонь сельмоце вяттянза пежес, таргак сонь: тейть сяда пара ули фкя сельмоса сувамс Шкайть Оцязорксшизонза, адонь толти кафцьке сельмоса ёрдамать коряс,48коса эздост ярхцай сукссь аф кулси, коса толське аф мадонды.

49Вдь толонь пачк ётазь эрь ломанць салыяй и эрь озксказнеське салыяфневи салса.50Салсь цебярь парши: аньцек юмафтондярясы эсь салушинц, кода арай меки салукс? Кирдесть эсьсонт салть, и эряда ялгаксшиса фкя-фкянь мархта».


предыдущая глава Глава 9 следующая глава