Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЁТОРОНЬ ОМБОЦЕ СЁРМАЦ

Глава 2

Аф виде тонафтыхне и синь наказамасна

1Кода Израилень ломаньтналть ёткса ульсть аф афкуксонь пророкт, тяфта тинь ётксонтка эвондайхть аф виде тонафтыхть. Синь салава сувафнихть кемаень пуромксти юмафты-арафты васькафнемат и мянь потайхть Азорть эзда, кона синь идезень. Тяфта синь таргайхть эсь лангозост куроконь юмама-арама.2И ламотне туйхть синь визьксфтома эряфснон мельге, и синь инксост видешинь кись кармай сялдовома.3Ня топафксонь аф содай ломаттне, васькафнемок тинь ёжу валса-корхтамаса, кармайхть козякодома тинь вельдент. Но Шкаень судсь аноклаф ни тейст, и юмамась-арамась учи эсост.

4Вдь Шкайсь ашезень ужяльде пежес праф ангелхнень, но, сотомок синь цинзерса, ёрдазень адонь шобдашити, коса синь учсазь судонь шить.5Сон ашезе ужяльде кунардонь масторлангтьке, а кучсь лангозонза оцюдонга оцю шада и ваяфтозень масторлангонь Шкайда аф пели ломаттнень. Сон идезе ваямада аньцек видексшинь пачфни Нойть и сонь сисем кудэряензон.6Шкайсь Содом и Гоморра ошнень судендазень юмамас, и толса плхтазень тиемок кулукс. Тяфта няфтезе сай пингонь Шкайда аф пели ломаттненди: синь мархтост тиеви тяконь лаца.7А видексшиса эряй Лотонь, кона маятась ня койфтома ломаттнень визьксфтома эряфснон эзда, Сон идезе.8Эрямок синь ётксост, тя видексшиса эряй ломанць эрь шиня няендезень и кулендезень синь кяжи тевснон. Сяс сонь видексшинь ваймоц маятась и сярядсь.9Тя сембось няфнесы: Азорсь содасы, кода идемс Шкайда пели ломаттнень сталмотнень-варчсематнень эзда, а коень колсихнень кирдемс судонь шить самс наказаманди,10а сембода пяк сятнень, конат якайхть ронгть аф ару мялензон-арьсеманзон мельге и мезькска аф лувсазь Шкайть азорксшинц.

Синь аш визькссна, синь тиендихть стане, кода синцень мяльсна, и синь аф пелихть сялдомс менелень вийхнень,11хуш ангелхневок, конат синдедост виихть и кемот, аф сялдсазь ня вийхнень Азорть инголе.12Ня ломаттне сялдсазь сянь, мезть аф шарьхкодьсазь. Синь шарыхть ёньфтома жувататнень лангс, конат эряйхть эсь обуцяснон коряс и шачендыхть кундаманди и шавоманди. Ня жувататнень лаца синьге улихть машфтфт.13Синь кяжса улихть наказафт сембе кяжи тевснон инкса. Синь петнесазь эсь мяльснон-ронгснон, мзярда шиньгучкать симондихть-гуляндайхть и тиендихть усксевомань тефт. Синь визьксфтомот и нулготькст, и тейст пара мялезост, мзярда мархтонт ярхцамста-симомста синь васькафнихть эсонт.14Авань няемста синь сельмосна палыхть визьксонь мяльса, и мзярдовок синь аф топафтовихть пежеса. Синь васькафнесазь-кунцесазь лафча ваймотнень, седисна тонатфт аньцек мезень-мезень сявома. Синь сюдоф итть!15Синь пувордасть виде киста и эрьгодсть. Синь тусть сяка киге, кода и Валаам, Восоронь цёрац, кона кельгозе аф виде тевонкса ярмаконь сявондеманц.16Но кяжи тевонзон инкса Шкайсь лихтезе сонь лангти: осёлоц, корхтама аф машты жуватась, корхтазевсь ломанень вайгяльса и лоткафтозе пророкть ёньфтома тевонц.

17Ня ломаттне, кода ведьфтома лихтибрят, кода сюне коволхт, конатнень панцесыне даволсь. Тейст аноклаф адонь пефтома шобдась.18Корхтамок прянь шнафты, но шава валхт, синь тарксесазь-кунцесазь визьксонь мялень топафтомас сятнень, конат аньцек явсть васькафтфнень-эрьготьфнень эзда.19Ня аф виде тонафтыхне надияфтыхть тейст воляши, хуш синць урет сянди, мезсь вяти юмамати-арамати. Вдь эрь ломанць уре сянди, кие сонь сяськозе.20Кда синь, Иисус Христос Азороньконь и Идиеньконь содаманц вельде, ворьгодевсть тя масторлангонь аф арушить эзда, но меле тага сотовсть-тапарясть эсонза и сяськовсть, эста синь эряфсна кармай нинге сяда кальдяв ингольцеть коряс.21Тейст улель сяда цебярь афи содамс видешинь кить. Но кальдяв, мзярда содамок сонь, шарфтыхть меки иняру кошардомвалть эзда, кона максфоль тейст.22Синь мархтост лиси стане, кода азф валмуворксса: «Пинесь мрдай эсь уксолксонзон лангс» и «Штаф тувось тага моли рдазса эшеляма».


*а 2:22 Притчи 26:11


предыдущая глава Глава 2 следующая глава