Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 10

Кемгафтува апостолхне

(Марк 3:13-19, 6:7-13, 13:9-13; Лук. 6:12-16, 9:1-6, 21:12-17)

1Иисус тердезень кемгафтува тонафниензон, макссь тейст азорксши панцемс аф ару ваймопожфнень и пчкафнемс эрь кодама урма и сярятьф.

2Кемгафтува апостолхнень лемсна тяфтапт: васенцесь Симон, кона лемневи Пёторкс, и Андрей сонь брадоц, меле Иаков, Зеведеень цёрац, и Иоанн, сонь брадоц,3Филипп и Варфоломей, Фома и каяфксонь кочкайсь Матфей, Алфеень цёрац Иаков и Леввей, кона лемневсь Фаддейкс,4Симон Кананит и Иуда Искариот, кона и мизе Иисусонь.

5Ня кемгафтувотнень Иисус кучезень и кошардозень: «Тяда яка ся китнень эзга, конат вятихть лия ломаньтналхненди, и тяда сувсе Самариянь фкявок ошу.6Но тянь вастс моледа Израилень ломаньтналти, кона юмаф-араф уча лаца.7Молемста пачфнесть: "Менелень Оцязорксшись маласа".8Сярядихнень пчкафнесть, кулофнень вельмафнесть, наксафты урма мархтотнень – аруяфнесть, кяжи ваймопожфнень панцесть. Питнефтома сяводе, питнефтома максость.

9Тяда сявонде мархтонт аф зрнянь, аф сиянь, аф серень ярмак,10аф ки лангонь канкс, аф щапт полафтомс, аф карьсембяльхть, аф мандоня, сяс мес покайти ярхцамбяльсь максови тиф покодеманц инкса.

11Кодама ошс али велес афоледе сува, куляксасть, кие анок тинь нолдамс пялонза и ащеда тозк тумозонт.12Кудти сувамста шумбрандафтость кудэряйхнень и арьседа тейст сетьмоши.13Кда тя кудса васьфттядязь цебярьста, катк тинь сетьмошинь арьсеманте сувайхть тоза, а кда васьфттядязь кальдявста, катк синь меки мрдайхть тейнть.14А кда кие тинь аф васьфттядязь и валонтень аф кулхцондсы, эста тя кудста али тя ошста тумстонт нльне пультьке шукадесть пильгстонт.15Видеста корхтан тейнть: Содом и Гоморра ошненди судонь шиня ули сяда тёждя ся ошть коряс.

16Вага, Мон кучтядязь тинь, кода учатнень врьгаснень ёткс: уледа куй лаца смузюкс и гуляня лаца сятявкс.17Ванфтода пря ломаньда: синь кармайхть макссемонт судс и кармайхть пикссемонт синагогасост.18Монь инксон вяттядязь тинь оцюнятненди и оцязорхненди, и эста карматада азондома Монь колган тейст и лия ломаньтналхненди.19Но мзярда тинь вяттядязь судс, тяда пичеде, кода и мезе корхтамс; ся пингоня тейнть максови, мезе азомс,20сяс мес аф тинь карматада корхтама, а Алянтень Ваймопожфоц вельдент.

21Брадсь макссы брадонц куломас, и алясь – цёранц; и кеподихть иттне тядяснон-аляснон каршес и шавфтсазь синь.22Монь лемозень инкса кивок аф кармай кельгомонт, но кие кирди петь самс, ся идеви.23Мзярда кармайхть панцемонт фкя ошса, ворьгодеда лияс. Видеста корхтан тейнть: аф кенерьхтяда ётамс Израильть сембе ошензон, кода сай Ломанень Цёрась.

24Тонафнись аф эрси оцюкс тонафтыенц коряс, али покодись азоронц коряс:25тонафнити саты, кда сон ули тонафтыенц лаца, и покодити, кда сон ули азоронц лаца. Кда кудазорть лемнесазь Веельзевулкс, эста нинге сяда пяк тяфта мярьгихть кудстоннензон колга».

Шкайда пельхть, а аф ломаньда

(Лук. 12:2-9)

26«Тяда пеле эздост, вдь сембось, мезсь кяшф, лиси лангти, и сембе салаваннеське арай содафокс.27Мезе корхтан тейнть шобдаса, тянь азондость шинь валдса; мезе азф тейнть пилезонт тошказь, тянь азондость сембонь инголе.28И тяда пеле ронгонь машфтыда, тейст аф токави тинь ваймонте; а пеледа Сянь эзда, кона машты ваймотьке и ронгтьке юмафтомс-арафтомс адса.29Кали кафта кирьхксне мишендевихть аф трёшникта? И эздост фкяське аф прай модать лангс, кда тянди аф ули Алянтень мялец.30А тинь прясонт сембе шяярьнятневок лувфт.31Сяс тяда пеле: тинь сяда питнихтяда сембе кирьхкснень коряс».

Кемамацень панжеманц-азоманц колга и Иисусонь мельге молемать колга

(Марк 9:41; Лук. 12:51-53, 14:26,27)

32«Эрть, кие ломаттнень инголе лувсы и лемдьсы эсь прянц Моннекс, сянь Монга Менелень Алязень инголе лувса и лемдьса Монценнекс.33А кие ломаттнень инголе потай Монь эздон, сянь эзда Монга потан Менелень Алязень инголе.

34Тяда арьсе, бта Мон сань модать лангс сетьмошинь кандома. Мон сань кандомс аф сетьмоши, но тор.35Мон сань цёрать алянц эзда явфтома, стирть тядянц эзда, рьвянять авозенц эзда.36И душманкс ломанти арайхть сонь кудэряенза.

37Кие кельгсы алянц али тядянц Мондедон сяда пяк, ся аф кондясти Тейне; и кие кельгсы цёранц али стиренц Мондедон пяк, ся аф кондясти Тейне.38И кие аф сявсы эсь крёзонц и Монь мельган аф моли, ся аф кондясти Тейне.39Кие ёрай ванфтомс эряфонц, ся юмафтсы сонь, а кие юмафтсы эряфонц Монь инксон, ся ванфтсы сонь.

40Кие тинь васьфнетядязь, ся Монь васьфнесамань, а кие Монь васьфнесамань, ся васьфнесы Монь Кучиезень.41Кие васьфнесы пророкть сянкса, мес сон пророк, сянди ули казне, кода пророконди. Кие васьфнесы видексшинь ломанть сянкса, мес сон видексшинь ломань, сянди ули казне, кода видексшинь ломаненди.42Кие максы симомс кельме ведь карьхкя Монь тонафнинень эзда фкяти сянкса, мес сон Монь тонафниезе, видеста корхтан тейнть: ся казнефтома аф иляды».


*а 10:4 Кананит – лиякс Зилот, патриот, националист; шачема масторть и евреень кемамань койть инкса ащи

*б 10:5 лия ломаньтналхне – язычники

*в 10:6 юмаф-араф – погибшие

*г 10:12 сетьмоши – мир

*д 10:25 Веельзевул – кяжи ваймопожфнень оцюнясна, лиякс Сатана

*е 10:34 тор – меч


предыдущая глава Глава 10 следующая глава