Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 3

Шкайть видексшиц

1Эста мезьса сяда цебярьхть еврейхне лиятнень коряс? И кодама лезкс киськопень керомать эзда?2Оцюдонга оцю лезкс сембе ширде. Васендакиге, Шкайсь максозе тейст Эсь валонц.3И мезе сянь эзда, кда конат-конат ня ломаттнень эзда ульсть аф кемайкс Тейнза? Кали синь аф кемамасна машфтсы Шкайть валонь кирдеманц?4Прокс аф! Шкайсь фалу кирдьсы валонц, а эрь ломанць кяльготни, кода азф Сёрматфксса:
«Тонь сембе валхне най лувовихть видекс,
и сятнень лангса, кит муворгофнетядязь Тонь, сявсак вярть».

5А кда минь аф видексшиньке тиендьсы нинге сяда няевиксокс Шкаень видексшить, эста мезе минь астама? Эста пади Шкайсь аф виде, кда шарфнесы Эсь кяженц минь лангозонк? Мон тяса корхтан ломанень арьсемать коряс.6Прокс аф! Афток кода Шкайсь кармай судендамонза тя масторлангть?7Но кда монь кяльготнемазе тисы сядонга няевиксокс Шкайть валонь кирдеманц, и тянь вельде сядонга касфтови Сонь оцюшиц, эста мес мон эряван судендамс кода пежень тии?8Мес эста аф мярьгомс: «Карматама тиендема кальдяв, катк лиси эздонза цебярь»? Сялдыеньке вчёк тянь и корхнесазь, бта минь афкукс тянди тонафттама. Тяфтама ломаттнень шумосна пандови тевснон коряс.

Аш фкявок видексшинь ломань

9Кода ина эста? Кали минь, еврейхне, ащетяма аф сяда вяре лиятнень коряс? Прокс аф. Минь няфтеськ ни: сембе ломаттне, еврейхть синь али лия ломаньтналонь, сембе синь пежеть алот.10Сёрматфксса тяфта азф:
«Аш фкявок видексшинь ломань;
11Аш фкявок шарьхкоди ломань, кивок аф вешендьсы Шкайть.
12Сембе шарфтсть Шкайть эзда и сембе колафт;
Аш паронь тии, фкявок аш.
13Синь кргапарьсна – панжада калма;
Синь кяльбрясост васькафнема.
Синь трвасост куень урафтома
14и кургсна пяшксе сюдомада и сяпта.
15Синь ласькозь ласькихть веронь валома.
16Эсь мельгаст синь кадыхть срафтома и ризф,
17и аф маштыхть ладязь эряма.
18Синь ашесть тонада Шкайда пелема».

19Но минь содасаськ, сембось, мезень колга тяса корхтай койсь, азф сятненди, кит эряйхть койть коряс. Сяс киньге аф панжеви кургоц эсь прянь араламанкса. Марнек масторлангсь мувору Шкайть инголе.20Вдь кивок Сонь инголенза аф лувови видексшинь ломанькс сянкса, мес тиенди койть кошардоманзон коряс. Койть вельде ломанти аньцек шарьхкодеви пежесь.

Видексшись максови Иисус Христости кемамать вельде

21Вов тяни Шкайсь панжезе ломаттненди видексшить, кона максови аф койть вельде. Тянь колга ни азондсть койсь и пророкне.22И тя видексшить Шкайсь макссы ломаттненди Иисус Христости кемамать инкса. Сон максови сембонди, кит кемайхть, кикс синь афольхть уле,23сяс мес сембе сувасть пежес и кадовсть Шкаень иневалдфтома.24Но сембонь муворшисна валхтови питнефтома, Шкайть пароказненц коряс Иисус Христость вельде, кона идезень-рамазень синь воляшис.25-26Шкайсь Сонь арафтозе ладямань озксказнекс, конань версонза аруяфтсыне пежетнень эзда сембонь, кит кемайхть Тейнза. Тяфта Шкайсь няфтезе Эсь видексшинц. Оцю кирдемшканц сюнеда Сон ашезь пантфта шума инголи тиф пежетнень инкса. А тяниень пингть Сон няфнесы Эсь видексшинц тяфта: Сон Сонць видексшинь и лувсыне видексшинь ломанькс сятнень, кит кемайхть Иисусти.

27Тяни ули минь туфталоньке прянь шнамс? Аш, сембе туфталхне юмафтфт. Кодама ина койсь тянь тиезе? Койсь, кона анай тефт? Аф. Тянь тиезе кемамань койсь.28Сяс минь кемоста азсаськ: видексшись максови кемамать инкса, а аф коень ванфтоманкса.29Кали Шкайсь аньцек еврейхненди Шкай, а лия ломаньтналхненди аф? Тяфта, Сон – лия ломаньтналхнендинге Шкай,30сяс мес Шкайсь фкя-тяка. Сон лувсыне Эсь инголенза видексшинь ломанькс киськопень керфнень, кда синь кемайхть, и тяка лаца киськопень апак керфненьге, кда синь кемайхть.31Тяшкава вяри кемамать путомста минь аф машфнесаськ койть? Ёфси аф. Минь тянь вельде кемокснесаськ койть.


*а 3:4 Псалтирь 50:6

*б 3:10-12 Псалтирь 13:1-3

*в 3:13 Псалтирь 5:10; 139:4

*г 3:14 Псалтирь 9:28

*д 3:15-17 Исаия 59:7-8

*е 3:18 Псалтирь 35:2


предыдущая глава Глава 3 следующая глава