Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 14

Пророчендамань казне и лия кяльхнень лангса корхтамань казне

1Моледа кельгомать мельге и путода оцю вий Ваймопожфонь казнетнень сатоманкса, а сембода пяк – пророчендамань казнеть.2Вдь ся, кие корхтай лия кяльхнень лангса, корхтай Шкайти, аф ломаттненди. Кивок аф шарьхкодьсыне сонь валонзон, вдь сон корхтай салавашит Ваймопожфть вятеманц коряс.3А кие пророчендай, ся эсь корхтамасонза касфтсыне-кемокстасыне ломаттнень, максы тейст неже и седиень ваймама.4Лия кяльхнень лангса корхтайсь касфтсы-кемокстасы эсь прянц, а ся, кие пророчендай, касфтсы-кемокстасы кемаень пуромксть.5Монь мялезе тяфтама: сембе тинь корхталеде лия кяльхнень лангса, но нинге сяда пара улель, кда пророчендаледе. Вдь кие пророчендай, сянь серец сяда оцю лия кяльхнень лангса корхтайть коряс. Но кда лия кяльхнень лангса корхтайсь панчсы эсь азфонц смузенц и тянь вельде кемокстасы кемаень пуромксть, эста синь сересна фкат.

6Кемай ялгат, арьседа: кда мон самстон корхталень мархтонт лия кяльхнень лангса, эста кодама улель тейнть тянь эзда лезкс? Кодама улель лезкс, кда мон афолень канда тейнть Шкайть эзда панжема, афолень азонда тейнть содамошинь, пророчествань али тонафтомань валхт?7Эрьда кепотьксонди сяфтяма морамань инструмент, конань аш ваймоц, – флейта али арфа. Кода содамс, мезе налхкови флейтаса али арфаса, кда вайгяльхне фкя-фкянь эзда аф явихть?8И кда ушманонь торамась торазеви аф шарьхкодевиста, кие кармай аноклама тюремас?9Тяфта мархтонтка: кда тинь корхтатада аф шарьхкодеви кяльса, эста кода ломаттне шарьхкодьсазь сянь, мезе тинь корхтатада? Тинь карматада корхтама шавоста.10Масторлангса пяк лама кяльда, и аш фкявок стама, кона улель смузьфтома.11Но кда мон аф содасайне валхнень смузьснон, эста мон корхтайти лия мастороннян, сонга тейне лия масторонь.12Тяфта мархтонтка: тинь оцю мяленте сатомс Ваймопожфонь казнет – сатода сяда ламоня тяфтама казнеда, конат лездыхть касфтомс-кемокстамс кемаень пуромксть.

13Сяс, лия кяльхнень лангса корхтайсь катк озонды: максовоза тейнза казне панчсемс азф валонзон смузьснон.14Вдь кда мон озондан лия кяльхнень лангса, эста озонды монь ваймопожфозе, а ёнезе ляткшни ширеса.15Кода ина улемс? Карман озондома ваймопожфсон, карман озондома эсь ёньцонга. Карман моразь шнамонза Шкайть ваймопожфсон, тяконь лаца карман моразь шнамонза Шкайть эсь ёньцонга.16Кда тон азат сюконяма Шкайти аньцек эсь ваймопожфсот, эста кода ломанць, конань аш лия кяльхнень панчсемань казнец, мярьги «афкукс тяфта!» тонь валхнень каршес? Вдь сон аф шарьхкоди, мезе тон корхтат!17Тон лац сюконят Шкайти, но лия ломанти тя аф лезды касомс-кемокстамс кемамаса.18Азан сюконяма Шкайти, мон тинь корязонт сембода лама корхтан лия кяльхнень лангса.19Но кемаень пуромксса сяда цебярькс лувса азомс вете шарьхкодеви валхт, и тянь вельде тонафтомс лиятнень, лия кяльхнень лангса ламодонга-лама азф валхнень вастс.

20Кемай ялгат, тяда уле ёньц коряс иднякс. Кяжса уледа аф машты идькс, а ёнь коряс – кенерьф ломанькс.21Койса сёрматфт Азорть валонза:
«Лия кяльхнень лангса корхтай ломаттнень вельде,
лия мастороннетнень кургса
карман корхтама тя ломаньтналти,
а сонь Монь эстонга аф кулхцондсамань».

22Сяс, лия кяльхнень лангса корхтамась – тя няфтемань тяштькс аф сятненди, кит кемайхть, а сятненди, кит аф кемайхть. А пророчендамась – тя тяштькс кемайхненди, а аф сятненди, кит аф кемайхть.23Вдь кда пуроми марнек кемаень пуромкссь, конаса эрсь кармай корхтама лия кяльхнень лангса, и тов сайхть аф содайхть али аф кемайхть, мезе синь азыхть? Мярьгихть, ёньда лиседе!24Но кда сембе пророчендайхть и ся пингть сувай тов аф кемай али аф содай ломань, эста сон кули эрть валстонза сянь, мезсь лихтьсы лангу пеженц и судендасы сонь.25Тяфта тя ломанть панжевихть седиень салавашинза. Эста сон прай шаманц лангс, озонды Шкайти и азсы: «Афкукс мархтонт Шкайсь!»

Кемаень пуромксса прянь вятемать колга

26Мезе тянь эзда лисенди, кемай ялгат? Мзярда тинь пуромкшнетяда марса, эрть тинь эздонт ули мезецка лиятненди: шнамань мор, тонафтома, Шкайть эзда панжема, лия кяльхнень лангса корхтама али тя корхтамать смузенц панжемац. И сембось тя катк тиеви кемаень пуромксть касоманкса-кемокстаманкса.27Кда улихть ётксонт лия кяльхнень лангса корхтайхть, катк кафттне эздост корхтайхть, но аф колмода лама, фкя-фкянь мельге, а кивок катк панчсесы азфть смузенц.28А кда аш смузень панжи, катк лия кяльхнень лангса корхтайсь аф кашторды кемаень пуромксть инголе, а корхтай аньцек эсь пачканза и Шкайти.29Тяконь лаца пророкнень эздонга катк кафттне али колмотне корхтайхть, а лиятне катк арьсихть Шкайть эзда тя валсь али аф.30А кда тоса улихнень ёткста киндинге максови Шкайть эзда панжема, эста васенце корхтайсь лотказа корхтамда.31Сембонди тейнть мярьгови пророчендамс, но фкя-фкянь мельге, и тянь вельде сембе кемаень пуромксти максоволь тонафтома и ваймама-кемокстама.32Пророчендамань казнесь кулхцондсы пророкть,33сяс мес Шкайсь – тя сетьмошинь ладяй Шкай, а аф тапарямань-шорямань.

Кода тиендихть Шкаень ломаттне сембе кемаень пуромкснень эса,34тяфта улеза тиньге пуромкссонт: катк аватне аф каштордыхть. Тейст пуромксса аф мярьгондеви корхтамс. Катк синь сетьмоста кулхцондыхть, кода и тонафты койсь.35Кда мяльсна мезевок содамс, катк тянь колга кизефтьсазь кудса мирдьснон. Вдь авати корхтамс кемаень пуромксса тя визьксонь тев.36Кали тинь арьсетяда: Шкаень валсь тинь эздонт моли? Али аньцек тейнть сась?

37Эрсь, кие лувсы прянц прорококс али ломанькс, конань ули Ваймопожфонь казнец, катк содасы: ся, мезе мон тейнть сёрмадан, – Азорть кошардомвалоц.38А кие шарфты ня валхнень эзда, катк сонь эздонзонга шарфтыхть.39Тяфта, кемай ялгат, путода оцю вий пророчендамань казнеть сатоманкса, и лия кяльхнень лангса корхтаматьке тясть карне;40сембось тя тиендевоза видеста и ладяфть коряс.


*а 14:21 Исаия 28:11-12


предыдущая глава Глава 14 следующая глава