Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 17

Фессалоникаса ломаттнень кеподемасна

1Апостолхне ётасть Амфиполь и Аполлония ошнень пачк и састь Фессалоникав, коса ульсь евреень синагога.2Павел, кода тиендсь фалу, тусь синагогав. Тоса сон мельцек колма недялянь ваймамань шитнень корхнесь мархтост Сёрматфксть колга,3эздонза сявф кепотькс вельде панчсезе и няфнезе: Христости эрявсь кирдемс маятамат и вельмамс кулофста. Павел корхтась: «Тя Христоссь – Иисус, конань колга мон азондан».

4Кона-кона еврейхне кармасть кемама и педсть Павелонди и Силанди. Синдедост башка, кармась кемама Шкайда пели лама гректа и аф кржа содаф авада.5Тя срхкафтсь сельмонь каяма аф кемай еврейхнень ёткса, синь мусть мишендема-рамсема вастста нильготькс ломатть, кочкавсть марса и кеподсть ошса комболдома. Синь састь Иасононь кудонцты Павелонь и Силань вешема, ёрасть лихтемс синь ломаттненди.6Тоса апостолхнень ашезь му, эста ошень оцюнятненди вятезь Иасононь и лия кой-кона кемай ялгатнень. «Синь шорсесазь ломаттнень марнек масторлангса, а тяни састь тязонга, – пешкоткшнесть пуромфне.7– А Иасон нолдазень синь эсь кудозонза. Сембе синь колсесазь кесарть кошардоманц, корхтайхть, кле, ули лия оцязор, конань лемоц Иисус».8Ломаттне и ошень оцюнятне тянь кулемста таколдозевсть.9Синь сявсть Иасононь и лиятнень кядьста кемокстафты вал ярмак мархта, и тяда меле нолдазь.

Павел и Сила покодихть Верияса

10Кемай ялгатне пингонь апак тарксек веть ильхтезь Павелонь и Силань Верияв. Верияв пачкодемста синь мольсть евреень синагогав.11Тястонь эряйхне фессалониканнетнень коряс ульсть сяда панжада ваймот. Синь оцю мяльса кулхцондозь Павелонь валонц Пара кулять колга и эрь шиня тонафнезь-ванозь Сёрматфксть: видеть али аф корхтасы Павел.12Ламоц еврейхне кармасть кемама, тяфта жа кармасть кемама ламоц содавикс греконь алятне и аватне.13Но мзярда Фессалоникань еврейхне кулезь: Павел тонафты Шкаень валти Верияса, синь мольсть тозонга и кармасть кепсемост и шорямост ломаттнень.14Кемай ялгатне эстокиге ильхтезь Павелонь оцюведь трвав, а Силань мархта Тимофей лядсть Верияв.15Павелонь ильхтиенза састь мархтонза Афинав, сяльде меки мрдасть Верияв и пачфтезь Павелонь эняльдеманц Силанди и Тимофеенди – куроконе самс тейнза.

Павел Афинаса

16Павел учсезень Силань мархта Тимофеень Афинаса, и мзярда сон ванондозе ошть, седиец ацергодсь, сяс мес ошсь пяшксель эсь кятть тиф аф афкуксонь шкайда.17Синагогаса сон корхнесь еврейхнень и Шкайда пели грекнень мархта. Эрь шиня сон корхнесь ётайхнень-потайхнень мархта мишендема-рамсема вастса.18Весть сонь мархтонза срхкафтсть пялькстома философт – эпикуреецт и стоикт. Финцне кизефнесть: «Мезе мялец азомс тя лама валонь шотнайть?» Омбонцне: «Афоли сон азонды лия масторонь шкайхнень колга». Тя сянкса, мес Павел пачфнесь Пара куля Иисусонь колга и кулофста вельмамать колга.19Павелонь серьгядезь ареопагу и эняльгодсть: «Азонтка тейнек, мезень од тонафтома кандоть?20Кати-мезе аф шарьхкодеви кулихть пиленьке, сяс мяленьке содамс, мезе тя тяфтамсь?»21Вдь афинаннетне и ошсост эряй лия мастороннетневок тяфта ашесть прафта мезьска лияс, кода кулхцонкшнемс од кулят-мяльхть и синь корхтафнемс.

22Павел стясь ареопагонь пуромксть кучкас и мярьгсь: «Афинань эряйхть! Сембонь коряс няйса, тинь пяк лувсасть шкайхнень.23Мзярда якамста ванондыне тинь озондома вастонтень, няень алтарьге, конань лангса тяштьф: «Аф содаф Шкайти». Вчёк тя Шкайть колга, конань тинь апак содак лувсасть, монь и мялезе азондомс тейнть.

24Шкайсь, кона тиезе менельть и масторть, и семботь, мезе эсонза, улемок менелень и модань Азоркс, аф эряй ломанень кядьса тиф Шкаень кудса,25и Тейнза аф эряви ломанень кядьса покодема, бта Сонь Сонцень кати-мезец аф сатни. Сон Сонць максси сембе ломаттненди эряф, ваймонь тарксема и семботь лиять.26Фкя ломань эзда Сон тиезень сембе ломаньтналхнень, эрязаст марнек масторть лангова. Сон путсь сембе ломаттненди ладяф пинге и васта модать лангса.27Шкайсь тиезе тянь сянкса – ломаттне вешендезазь Сонь, катк нльне сокоронькончт молельхть Тейнза и мулезь Сонь. Виде, Сон аф ичкозе эрть эзда.28Вдь минь Соньцонза эрятама-ащетяма, якатама. «Минь Сонь юромстонза», – кода сёрмадсть конат-конат тинь валмораентень ёткста.29Сяс тейнек, Шкаень юромстотненди, аф ладяй арьсемс, кле, Шкайсь шары зрняста, сияста али кевста тифть лангс, конань арьсезе-тиезе ломанень маштомашись али пря арьсемась.

30Ся аф содамань пинкнень Шкайсь кирдсь, но тяни кошардсыне сембе ломаттнень сембе вастова каендама.31Сон ладясь ши, мзярда кармай судендамонза масторлангть Эсь кочкаф Ломаненц вельде. Шкайсь кемокстазе тянь сембе ломаттнень ингольде, мзярда вельмафтозе Христость кулофста».

32Мзярда синь кульсть кулофста вельмамать колга, кой-конатне ёткстост кармасть пеетькшнема, омбонцне мярьгсть: «Тянь колга тонь кулхцонттядязь оду».33Тяка мархта Павел тусь пуромксстост.34Кона-кона ломаттне педсть тейнза, кармасть кемама. Синь ётксост ульсь ареопагу сувси алясь Дионисий и ава – лемоцоль Дамарь, нинге мархтост лият.


*а 17:19 ареопаг (греконь кяльса «Аресонь губороц») – тяфта лемнезь Афинаса губорть и вярдень судть, кона ётафнезень тяса эсь пуромксонзон и кона вятезень тонафтомань, религиянь и прянь вятемань кизефкснень.


предыдущая глава Глава 17 следующая глава