Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 15

Пялькстома киськопень керфтомать кувалма

1Иудеяста сась мзярошка ломань и синь кармасть тонафтомост кемайхнень: «Аф керфтондярясасть киськопентень, кода кошардсь Моисей, тинь аф идефтяда».2Павел и Варнава тя мяльть ширенц ашезь кирде, и сяс тя кизефксть коряс срхкась оцю пялькстома сафнень мархта. Эста Павелонь, Варнавань и нинге мзярошка кемайхнень кучезь Иерусалиму кизефтемс апостолхнень и оцюнятнень тя тевть колга.3Кемаень пуромкссь ильхтезень кучфнень ки лангс. Сят тусть Финикиять и Самариять пачк, ки кувалма азондсть кемайхненди, кода лия тналонь ломаттне шарфтсть Шкайти, и сембе пяк кеняртькшнесть тянди.

Апостолхнень васедемасна

4Иерусалиму самста синь оцю мяльса васьфтезе кемаень пуромкссь, апостолхне и кемаень пуромксонь оцюнятне. Кучфне азондозь тейст, мезе Шкайсь тись синь вельдест и кода Сон панжезе кемамань кенкшть лия ломаньтналхненди.5Эста анасть вал кона-кона ломаттне, конат инголи ульсть фарисеень тонафтомаса, а тяни кармасть кемама Иисус Христости. Синь корхтасть: «Лия ломаньтналоннетнень эряви керсемс киськопесна, и синь эрявихть кошардомс Моисеень коенц пяшкодема».

6Апостолхне и оцюнятне кочкавсть марса тя тевть ваномонза.7Ламос корхтамада меле Пётр стясь и мярьгсь: «Кемай ялгат! Тинь содасасть, Шкайсь васень шистокиге кочкамань монь ёткстонк сянкса – кулезазь лия тналонь ломаттне монь кургстон Пара кулянь валхнень и кармальхть кемама.8И Шкайсь, кона содасыне ломаттнень седиснон, няфтезе Эсь пара мяленц лия тналонь ломаттненди – казсь тейст Иняру Ваймопожф, кода тейнеконга.9Сон лувозень синь минь мархтонк фкакс, сяс мес кемамаса аруяфтозень синь седиснон.10Ина мезенди тяни варчсесасть Шкайть кирдемшканц, ёратада тонафнихнень сялдазс щафтомс стама ашка, кона ульсь аф кандовомшка аф минь аляньконди, аф тейнек?11Вдь минь кематама: Иисус Христос Азорть пароказненц вельде минь идефтяма, кода идевихть синьге».

12Эста сембе пуромфне сетьмость и кармасть кулхцондомост Варнавань и Павелонь, конат азондозь, кодама тяштькст и дивань тефт синь вельдест тись Шкайсь лия тналонь ломаттнень ёткса.13Мзярда синь аделазь азондомаснон, ушедсь корхтама Иаков: «Кемай ялгат, кулхцондомасть монь!14Симон пачфтезе тейнек, кода Шкайсь васенцеда мяляфтсь лия тналонь ломаттнень колга, сяс мес мялецоль тиемс синь эздост ломаньтнал, кона каннелезе Сонь лемонц.15Тяконь колга корхтайхть пророкневок Сёрматфксса:16
«Тяда меле Мон мрдан
и одукс кеподьса Давидонь сратф кудонц,
и сянь, мезе потмосонза калафтф,
одукс стяфтса и петьса.
17Эста сембе лядыкс ломаттне, сембе лия тналонь ломаттне
кармайхть вешемонза Азорть,
вдь Мон тердине синь арамс ломаньтналкс,
кона каннесы Монь лемозень.
Тяфта корхтай Азорсь,
кона тисы тянь семботь.
18Ушедомок пефтома пингста Шкайти содафт
сембе Эсь тевонза».

19Сяс мон арьсян: тейнек аф эряви тиендемс сталмот лия тналонь ломаттненди, конат шарфнихть Шкайти.20Меколанкт, тейнек эряви кучемс тейст сёрма, конань эса азондоволь мезе аф мярьгондеви тиендемс: аф ярхцамс аф афкуксонь шкайхненди озксказнекс кантф ярхцамбяльда, кона тяфта тиевсь аф арукс; аф усксевомс; аф ярхцамс верда али поваф жуватань сивольда; и тязаст тиенде лиятненди сянь, мезе аф ёрайхть эстейст.21Вдь Моисеень коец кунардонь пингстокиге азонкшневи эрь ошса и эрь ваймамань шиня кайгиста лувондови синагогава».

Апостолонь пуромксть эзда сёрма лия ломаньтналонь кемайхненди

22Эста апостолхне и оцюнятне марса марнек кемаень пуромксть мархта арьсесть кочкамс эсь ёткстост мзярошка ломань и кучемс синь Павелонь и Варнавань мархта Антиохияв. Кочказь Иудань, конань лемнезь Варсава, и Силань. Ня кафттне ульсть вятикс кемай ялгатнень ёткса.23Синь кучсть мархтост тяфтама сёрма:

«Апостолхне, оцюнятне и кемай ялгатне кучихть пара вал Шкайти шарфтф лия ломаньтналонь кемай ялгатненди, конат эряйхть Антиохияса, Сирияса и Киликияса.24Кода содаськ, конат-конат минь ёткстонкне абонтфнетядязь и колсесазь мялентень эсь кошардомаснон мархта, корхтайхть, кле, эряви керфнемс киськопентень и ванфтомс койть. Но минь ашеме макссе тейст азорксши тяфта корхтамс.25Сяс минь сембе саме фкя мяльс, кочкамс мзярошка ломань и кучемс синь тейнть кельгома ялганьконь Варнавань и Павелонь мархта,26ломаттнень, конат эряфснон ашезь ужяльде Иисус Христос Азороньконь инкса.27Тяфта минь кучеськ ширезонт Иудань и Силань, синь тяконь азсазь тейнть валса.28Иняру Ваймопожфть мялец и минь мяленьке тяфтама: аф стакалгофнемс тинь мезеньге канксса, инь эрявикста башка:29тяда ярхца аф афкуксонь шкайхненди озксказнекс кантф ярхцамбяльда, верда и пондаф жуватань сивольда, кирдеда усксевомада и тяда тиенде лиятненди сянь, мезе аф ёратада эстейнть. Пяшкодендярясасть тянь, тихтяда пяк лац. Уледа шумбрат».

30Кучфне састь Антиохияв. Тоса кочказь кемайхнень и максозь сёрмать.31Сят лувозь и кенярдсть мялень кеподи валхненди.32Иуда и Сила, конат кафцьке ульсть прорококс, ламос корхтасть кемай ялгатнень мархта и эсь валсост петезь синь мяльснон, и кемокстазь ваймоснон.33Синь ащесть тоса мзярошка пинге, а сяльде кемайхне, сетьмошинь арьсезь, ильхтезь синь меки апостолхненди.34Но Сила арьсесь лядомс тозк. (Иуда мрдась Иерусалиму.)35А Павел и Варнава лядсть Антиохияв, и ламоц лия кемайхнень мархта тонафтсть и азондсть Азорть эзда Пара кулять.

Павелонь и Варнавань мяльсна явихть

36Мзяра пингонь ётазь Павел мярьгсь Варнаванди: «Эрька мольхтяма кемай ялганьконь варжама сембе ся ошева, конава азондоськ Шкайть валонц, ванцаськ, кода синь эряйхть».37Варнава ёрась мархтост сявомс Иоаннонь, кона лемневсь Маркокс,38но Павел лувозе аф эряви мархтост сявондемс сянь, кие кадозень синь Памфилияса и ашезе полада синь ушетф тевснон, конань тиема кучфтольхть.39Тянь коряс синь мяльсна сяшкава явсь, нльне эрсь тусь эсь киганза. Варнава сявозе Марконь и синь тусть ведьге Киправ,40а Павел кочказе ки лангонь ялгакс Силань. Кемай ялгатне бславазь сонь и максозь Шкайть кельгоманц кядьс, и тяфта сон тусь кис.41Павел ётась Сириять и Киликиять пачк и кемокстакшнезень тостонь кемаень пуромкснень.


*а 15:16-18 Амос 9:11-12


предыдущая глава Глава 15 следующая глава