Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ФИЛИППА ОШЕНЬ КЕМАЙХНЕНДИ

Глава 4

Кемоста ащеда марса

1Сяс, кельгома кемай ялгане, ащеда кемоста Азорса. Кельгомне, мон лажадонь тейнть. Тинь монь кеняртьксозе и каштазозе!2Мон эняльдян Еводиенди и Синтихиенди ладямс фкя-фкянь мархта Азорса.3Тейтьке эняльдян, мархтон фкя тевса афкуксонь покоди: лезтт тейст, сяс мес синь монь мархтон марса тюрсть-покодсть Пара кулять инкса, тяконь лаца Климентонь мархта и фкя тевонь лия ялганень мархта, конатнень лемсна эряфонь книгасот.

4Кеняртькшнеда фалу Азорса! И тага весть азса: «Кеняртькшнеда!»5Катк сембонди няеви тинь сятявшинте. Азорсь маласа.6Мезеньге колга тяда пичеде, но фалу озондомаса и эняльдемаса, сюконязь панчсесть мялентень Шкайть инголе.7Эста Шкаень сетьмошись, кона сембе ломанень ёньда сяда оцю, ванфтсыне тинь седиентень и арьсемантень Христос Иисусса.

8И нинге, кемай ялгат, фалу арьседа сянь колга, мезсь видешинь, мезсь лувови цебярькс, мезсь виде, мезсь ару, мезсь кельгови, мезсь кулеви парокс, мезсь цебярь и шнави.9Тиендеда сянь, мезенди тонадоде, мезе сяводе и куледе монь эздон, и мезе няеде монь эсон. Эста Шкайсь, сетьмошинь лихтибрясь, ули мархтонт.

Павел сюконяй Филиппань эряйхненди

10Мон пяк кенярдень Азорса, сяс мес тинь мекпяли тага ушедоде лездома тейне. Тинь инголивок ульсь мяленте лездомс, аньцек эста тя ашель кода тиемс.11Корхтан тянь колга аф сяс, бта мон эрян ашса. Мон тонадонь эряма тянь лаца: тейне сатни ся, мезезе ули.12Мон содаса, мезе тяфтамсь ашушись, содаса, мезе тяфтамсь уликсшиське. Мон семботь ётайне и тянь вельде семботи анокан: улемс топодьста и улемс вачедокс, улемс уликсшиса и афсатыксшисовок.13Семботь маштса Сянь вельде, кие максы тейне вий.14Тинь сякокс лац тиеде, мес явость мархтон монь сталмонень.15Филиппань эряйхть, тинь тинць содасасть: мзярда мон васенцеда кандыне тейнть Пара кулять, и сяльде тунь Македонияста, тиндедонт башка фкявок кемаень пуромкссь ашезь лезда тейне ярмаконь максомаса.16Тинь тейне Фессалоникавга аф весть кучседе лезкс.17Мон тянь колга корхтан аф эстейне анамать инкса. Монь мялезе фкя: тя лездомантень вельде кочкаледе эстейнть сяда лама пара сай пингти.18Епафродит максозе тейне семботь, мезе тинь кучеде. И тяни монь ули сембозе, мянь эрявикста лама. Тинь казненте – тя кода танцти шинень нолдама, кода озксказне, кона Шкайть мялезонза.19И монь Шкаезе, Эсь иневалдонь козяшинц коряс, Христос Иисусть вельде пяшкодьсыне тинь эрь кодама ашушинтень.20Шнама Шкайти, минь Аляньконди пефтома пингс! Аминь.

Пара валонь пачфтемась

21Азода пара вал сембе иняру ломаттненди, конат Христос Иисуссот. Тейнть кучихть пара валхт кемай ялгане, конат тяса мархтон.22Кучихть тейнть пара валхт сембе иняру ломаттне, сембодонга пяк сят, конат кесарень кудста.

23Иисус Христос Азороньконь пароказнец улеза тинь сембонь мархтонт! Аминь.


предыдущая глава Глава 4 следующая глава