Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 9

Савл васеди Иисусонь мархта

1Савл ина станяк крфась кяжса и гразясь машфтомс Азорть тонафниензон. Сон мольсь озксвятиень оцюняти2и анась кядьстонза Дамасконь синагогатненди сёрмат, конатнень эса мярьговоль Дамаск ошса кунцемс-кочксемс Иисусонь тонафтоманц мельге молихнень, алянек-аванек, кие аньцек муви, и вятемс синь сотнефста Иерусалиму.

3Но Дамаск ошти маладомста апак учентт Саволонь валдоптозе менельста сельмонь пиди валда.4Сон прась модать лангс и кульсь вайгяль, кона корхтась тейнза: «Савл, Савл, мес тон панят Эсон?»5Савл кизефтезе: «Кият Тон, Азор?» Вайгяльсь каршезонза мярьгсь: «Мон Иисуссь, конань тон панцесак. Стака тейть молемс сялгомть каршес!»6Сон трнатозь и аф азомшка эводезь мярьгсь: «Азор! Мезе мярьгат тейне тиемс?» Азорсь мярьгсь тейнза: «Стяк и архт ошу, тоса тейть азсазь, мезе тиемс».

7Саволонь мархта молихне таяскодсть: вайгяль кулихть, а няемс киньге аф няихть.8Савл стясь модать лангста, но мзярда панжезень сельмонзон, сон мезевок ашезь няе. Сонь сявозь кядьбеда и вятезь Дамаску.9Колма шит сон сокороль, мезьдонга ашезь ярхца и ашезь симе.

10Дамаск ошса ульсь тонафни, конань лемоцоль Анания. Азорсь мярьгсь тейнза няйфксса: «Анания!» Сон каршезонза мярьгсь: «Мон тясан, Азор!»11Азорсь мярьгсь тейнза: «Срхкак и мольхть курняв, конань лемнесазь Виде курнякс. Иудань кудста кизефтьсак Тарсонь эряйть, лемоц Савл; сон тяни озонды.12Сон няйфксса няйсь аля, лемоц Анания, кона сась тейнза и путозень лангозонза кядензон – мрдаза тейнза сельмовиец».13Анания пшкядсь: «Азор! Ламотнень кургста кулендень тя ломанть колга, содаса, мзяра кальдяв сон тись Тонь ломаттненди Иерусалимса.14Тясонга сонь ули озксвятиень оцюнятнень эзда азорксшиц сявондемс-сотнемс сембонь, кие кунцесы Тонь лемцень».15Но Азорсь мярьгсь тейнза: «Архт! Сон Монь кочкаф кядьгозе, кона пачфтьсы Монь лемозень ломаньтналхненди, оцязорхненди и Израилень ломаттненди.16И Мон няфтьса тейнза, мзяра маятама сонь учсы Монь лемозень инкса».

17Анания мольсь и сувась ся кудти, путозень кядензон Саволонь лангс и мярьгсь: «Савл, кемай ялга! Иисус Азорсь, кона эвондась тейть ки лангса, кучемань монь тейть – панжевольхть сельмотне и пяшкодеволеть Иняру Ваймопожфса».18Эстокиге прокс кал кедь прась Саволонь сельмоста и сон кармась няема. Тяда меле сон кстиндафтозе прянц,19а сямольде ярхцась, и сонь мрдась эрьгац.

Савл азонды Иисусонь колга Дамаскса

Дамаск ошса Савл ащесь тонафнихнень мархта мзярошка ши20и эстокиге сон кармась синагогава азондомонза: Иисус – Шкайть Цёрац.21Сембе, кит кулхцондозь сонь, дивандакшнесть и корхтасть: «Кали тя аф ся ломанць, кона Иерусалимса панцезень сятнень, кит тернезь тя Лемть? Кали сон сась тяза аф сянкса – кунцемост синь и вятемост озксвятиень оцюнятненди?»22А Савл нинге сяда вииста пачфнезе Пара кулять и сяшкава кемафтозь корхтась – Иисус Шкаень Ватьфсь, нльне Дамасконь еврейхненди ашель мезе азомс каршезонза.

Савл ворьгоди еврейхнень эзда

23Ся пингста ётась лама ши, и еврейхне эсь ётковаст ладязь шавомс Саволонь.24Но Савл содазе синь арьсефснон. Шинек-венек еврейхне учендозь сонь ошень ортатнень ваксса шавомс,25но тонафнихне веть кептерьса нолдазь Саволонь алу ошень стенать варява.

Савл Иерусалимса

26Иерусалиму самста Савл ёрась сувамс тонафнихнень ёткс. Но сембе пельсть эздонза, и ашесть кема: сон афкуксонь тонафни.27Эста Варнава вятезе сонь апостолхненди и азондозе тейст, кода ки лангса Саволонди эвондакшнесь Азорсь и корхтась мархтонза, и кода Дамаск ошса Савл аф пелезь азондсь Шкаень вал Иисус Азорть лемса.28Тяфта Савл илядсь мархтост и якась Иерусалимть келес, и аф пелезь корхтась Иисус Азорть колга.29Тяда башка сон корхнесь греконь кялень еврейхнень мархта и пялькстась мархтост, но сят срхкасть сонь шавомс.30Тянь кулемста кемайхне сявозь сонь Кесарияв, а тоста оцюведьге ильхтезь Тарсу.

31Тя ёткть Иудеянь, Галилеянь, Самариянь кемаень пуромксненди сась сетьме эряф. Кемаень пуромксне кемокснесть и эрясть Шкайда пелезь, и Иняру Ваймопожфть лездоманц вельде тонафнихнень лувкссна касондсь.

Энеень пчкафтомац

32Пётр якась ошста ошс. Сон пачкодсь кемайхненди, конат эрясть Лиддаса.33Тоса сон васьфтсь аля, лемоцоль Эней. Алять тапазе урма и сон кода ни кафкса кизот ашезь стякшне вастста.34Пётр мярьгсь тейнза: «Эней, Иисус Христос пчкафты эсот. Стяк и ашкотк ацамцень». Ся эстокиге стясь.35Сонь няезь Лиддань и Сарононь сембе эряйхне и синь шарфтсть Азорти.

Пётр вельмафтсы Тавифань кулофнень эзда

36Иоппияса эрясь фкя ава, Иисусонь тонафниец, лемоцоль Тавифа. Лемонц смузец «пандонь сяваня, серна». Авась фалу тиендсь цебярь тефт и лездсь ашуфненди.37И лиссь тяфта, ся шитнень сон сярятькстсь и кулось. Авать ловажанц штазь и путозь вярцень кудбяльксс.

38Сяс мес Лиддась аф ичкозель Иоппиять эзда, и тонафнихне кулезь – Пётр Лиддаса, синь кучсть инксонза кафта ломатть, вельдест эняльдсть куроконе самс тейст.39Пётр срхкась и эстокиге тусь мархтост. Мзярда пачкодсь, сонь вятезь вярцень кудбяльксу. Тоса сонь перьфканза пуромсть удаватне, синь авардезь няфнезь панархнень, лангань щапнень, конатнень стакшнезень Тавифа шиса улемстонза.40Пётр лихтьфтезень сембонь кудбяльксста, арась плманжа лангс, и озондсь. Сяльде пшкядсь кулофти: «Тавифа, стяк!» Ся панжезень сельмонзон и Пёторонь няемста озась.41Пётр максозе кяденц, лездсь стямс, меле серьгядезень сембе кемайхнень и удаватнень, и арафтозе авать инголест шиса-парса.

42Тянь колга содазе марнек Иоппиясь, и ламотне кармасть кемама Азорти.43И Пётр нинге ламос лядондсь Иоппияса, эрясь кедень тии Симонть пяле.


предыдущая глава Глава 9 следующая глава