Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 18

Павел Коринфса

1Тяда меле Павел кадозе Афинать и тусь Коринфу.2Тоса сон васьфтезе Акила еврейть, кона шачемас коре ульсь Понтаста. Сон Прискилла рьванц мархта аф кунара састь Италияста, сяс мес Клавдий оцязорсь мярьгсь сембе еврейхненди кадомс Римть. Павел мольсь синь варжамост.3Синь Павелонь мархта ульсть маштыкятть фкя-тяка тевса, стакшнесть котфонь кошт, сяс Павел лядсь ширесост и покодсь.4Эрь ваймамань шить сон ётафнезе синагогаса, корхнезень еврейхнень и грекнень шарфтомс кемамати.

5Мзярда Сила и Тимофей састь Македонияста, Павел марнек виенц путозе Пара кулянь азондомати, корхнемок-няфнемок еврейхненди: Иисус – тя Христоссь.6Но сяс мес еврейхне ульсть каршект тянди и кармасть сялдомонза, сон шукадезе щамстонза пульть и мярьгсь тейст: «Эсь муворшидонт юматада, а мон аруван. Тяни туян лия ломаньтналхненди».7Павел тусь тоста и сась Шкайда пели ломанть пяли – Иустонь, кона эрясь синагогать ваксса.8Криспка, синагогань оцюнясь, сембе кудэряензон мархта кармась кемама Азорти. Коринфонь ламоц ломаттне Шкаень валть кулемста кармасть кемама и кстиндафтома пря.

9Фкя веня Павел няйсь няйфкс – эвондась Азорсь и мярьгсь: «Тят пеле, корхтак, тят лотксе.10Вдь Мон мархтотан. Кивок аф тии тейть кальдяв, сяс мес тя ошса лама Монь ломаньдон».11Павел эрясь тоса киза пяле, тонафнезень ломаттнень Шкаень валти.

12Ся ёткть, мзярда Ахаияса губернатороль Галлион, еврейхне фкя мяльса кочкавсть Павелонь каршес, мольсть, сявозь сонь и вятезь судс.13Синь корхтасть: «Тя ломанць тонафты лувомонза Шкайть аф минь коеньконь коряс».14Павел ашезь кенере панжемс кургонц, кода Галлион мярьгсь: «Еврейхть, молендяряль корхтамась койхнень коламаснон али кяжи тевонь колга, эста монь улель туфталозе кулхцондомс тинь.15Но мзярда пялькстомась моли тинь тонафтомантень, лемонтень и коентень колга, эста ня кизефкснень ваность тинць: монь аш мялезе тянди улемс судьякс».16И сон панезень синь тоста.17Эста грекне врьгятсть Сосфенонь, синагогань оцюнять лангс и кармасть пикссемонза судьятнень инголе. Но Галлиононь тя прокс ашезе таколфта.

Павелонь мрдамац Антиохияв

18Павел ащесь Коринфса нинге лама ши. Меле сон кадозень кемай ялгатнень, сявозень мархтонза Прискиллань и Акилань, и ведьге тусть Сирияв. Тумда инголе, Кенхреяса, Павел нарафтозе эсь прянц, сяс мес Шкайти макссь вал.19Мзярда синь пачкодсть Ефесу, Павел кадозень Прискиллань и Акилань, а сонць тусь синагогав и кармась корхнема еврейхнень мархта.20Сят тейнза эняльдсть лядомс мархтост сяда ламос, но сон ашезь ляда.21Явомстост мярьгсь: «Тейне пяк эряви ётафтомс сай Очижить Иерусалимса. Улендяряй Шкайть мялец, мрдан тейнть». И сон тусь Ефесста ведьге. (А Акилань мархта Прискилла лядсть Ефесса.)22Сась Кесарияв, тоста тусь кемаень пуромкснень варжама Иерусалиму, сяда меле кинц поладозе Антиохияв.

23Тоса ащесь мзярошка пинге, сяльде тусь и ётазень Галатиянь и Фригиянь масторхнень, кемокстакшнезень сембе тонафнихнень ваймопожфснон.

Аполлос покоди Ефесса

24Ефесу сась фкя еврей, лемоцоль Аполлос, шачемас коре Александрияста. Алясь мазыста корхтась и лац содазень Сёрматфкснень.25Сон ульсь тонафтф Азорть кинцты, и пяк псиста и видеста тонафтсь и корхтась Азорть колга, хуш содазе аньцек Иоаннонь кстиндаманц.26Сон аф пелезь кармась тонафтома синагогаса. Прискилла и Акила кулхцондозь сонь, меле серьгядезь эсь ширезост и сяда лац-ряц азондозь тейнза Азоронь кить.27Мзярда сон арьсесь молемс Ахаияв, кемай ялгатне лездсть тейнза, макссть мархтонза сёрма тостонь тонафнихненди, эняльдсть лац васьфтемс сонь. Тов самста сон пяк лездсь сятненди, кит Шкаень пароказнеть сюнеда кармасть кемама.28Вдь сембонь ингольде сон вии валса лангу лихнезень еврейхнень аф видешиснон и Сёрматфксонь валхнень вельде няфтезе: Иисус – Христоссь.


*а 18:18 нарафтозе эсь прянц – улема, мяльса кирдеви назореень койсь (Бытие 6:1-21).


предыдущая глава Глава 18 следующая глава