Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 20

Кизефкс Иисусонь азорксшинц колга

(Матф. 21:23-27; Марк 11:27-33)

1Вов фкя стама шиня, мзярда Иисус тонафтсь ломаттнень эса Шкаень кудса и азондсь Пара куля, Тейнза састь озксвятиень оцюнят и койти тонафтыхть ломаньтналонь оцюнятнень мархта,2и кизефтезь Сонь: «Азк тейнек, кодама азорксшиса Тон тиендьсайть ня тефнень? Кие максозе Тейть тя азорксшить?»3Иисус каршезост мярьгсь: «Монга кизефттядязь тинь фкянь колга, азость Тейне:4Иоаннонь кстиндамац ульсь менельста али ломаттнень эзда?»5Синь эсь ётковаст кармасть корхтама: «Мярьгондярятама: "Менельста", эста Сон мярьги: "Мес ина тинь ашеде кема тейнза?"6Мярьгондярятама: "Ломаттнень эзда", эста сембе ломаттне пикссамазь кевса, сяс мес синь марнек ёньца-ваймоса лувсазь Иоаннонь прорококс».7Синь каршезонза мярьгсть: «Аф содасаськ коста».8Иисус мярьгсь тейст: «Эста Монга аф азса, кодама азорксшиса тянь тиендьса».

Валвеляфкс виноградонь касфтыхнень колга

(Матф. 21:33-46; Марк 12:1-12)

9Иисус ушедсь азондома ломаттненди тяфтама валвеляфкс: «Фкя ломанць озафтсь виноградонь пере, сиводсь мельганза якама виноградонь касфтыхть, сонць тусь лама пингс омба мастору.

10Мзярда сась виноградонь кочкама пингсь, сон кучсь виноградонь касфтыхненди покоди сявомс кядьстост эсь пяльксонц кочкаф виноградть эзда. Но сят пикссезь покодить и нолдазь шавонь кятть.11Виноградонь переть азороц тага кучсь лия покоди; аньцек сят тя покодитьке пикссемда и визькс шамас вятемда меле нолдазь шавонь кятть.12Кучезе колмоцеть; но тонаньге верс пикссезь и ёрдазь тоста.

13Эста виноградонь переть азороц мярьгсь: "Мезе тейне тиемс? Кучса тов эсь кельгома цёразень, пади сонь эздонза визделгодыхть".14Но виноградонь касфтыхне сонь няемстонза эсь ётковаст кармасть корхтама: "Тя цёрац; аряда шавсаськ сонь и виноградонь пересь ляды тейнек!"15Синь ёрдазь сонь виноградонь переста и шавозь.

Ина мезе тии синь мархтост виноградонь переть азороц?16Сон сай, машфтсыне ся виноградонь касфтыхнень и макссы виноградонь переть лия покодихнень кядьс».

Тянь кулиенза мярьгсть: «Тяфта мзярдонга тяза лисе!»17Иисус варжакстсь лангозост и кизефтезень: «Мезень колга корхтайхть Сёрматфксса ня валхне:
"Кевсь, конань ёрдазь кудонь путыхне,
арась кудужень кирди кевкс"?

18Эрсь, кие пупордай ся кевть ланга, токави, а кинь лангс сон прай, сянь тапасы».

19Озксвятиень оцюнятне и койти тонафтыхне шарьхкодезь, тя валвеляфкссь синь колгаст, сяс ёрасть эстокиге кундамс Иисусонь, но пельсть ломаттнень эзда.

Кизефкс каяфксонь пандомать колга

(Матф. 22:15-22; Марк 12:13-17)

20Синь ванондсть Иисусонь мельге и кучсть Тейнза ломатть, конат пряснон няфнезь коень ваны ломанькс. Но афкукс синь кучфтольхть кундамс Иисусонь кодамонга валса и сяльде максомс Римонь азорть кядялу судендамс.21Ня кучф ломаттне кизефтезь Иисусонь: «Тонафты, минь содасаськ, Тонь валхне и тонафтомаце видет, Тон киньге мяленц аф ванондсак, видеста тонафтсамасть Шкаень кити.22Азк, койть коряс мярьгондеви тейнек пандомс каяфкс кесарти али аф?»23Иисус шарьхкодемок синь ваймонь кичкорямаснон, мярьгсь тейст: «Мезенди варчсесамасть Монь кизефксонтень вельде?24Няфтеда Тейне динарий ярмак: кинне лангсонза шамаликсь и лемсь?» Сят каршезонза: «Кесарть».25Иисус мярьгсь тейст: «Эста макссесть кесарти кесареннеть, а Шкайти – Шкаеннеть».26Ашесть машта кундамонза Сонь валса ломаттнень инголе, дивандазевсть валонзонды и кашт исть моле.

Кизефкс кулофнень эзда вельмамать колга

(Матф. 22:23-33; Марк 12:18-27)

27Иисусонди сась мзярошка саддукей, конат ашесть кема кулофста вельмамати, и кизефтезь Сонь:28«Тонафты, Моисей сёрмадсь тейнек койса: "Кулондяряй рьвяяф идьфтома аля, эста брадонцты сявома полакс рьвац, и шачфтома кулофти юромонь полады идня".29Эрь вов, ульсть сисем братт, васенцесь рьвяясь и кулось идьфтомокс.30Сявозе рьвять омбоцесь, сявок кулось идьфтомокс.31Сявозе сонь колмоцесь, тяфта сявондезь рьвакс сембе сисем браттне, и кулость, ашесть када итть.32Мекпяли кулось рьвяське.33Вельмамда меле авась конанди арай полакс? Вдь сисемицьке сявондезь рьвакс».

34Иисус мярьгсь каршезост: «Тя пингонь ломаттне рьвяйсихть, тушендыхть рьвакс;35ина сят, конатненди Шкайсь кази сай пингонь эряф и кулофста вельмама, аф рьвяйсихть, рьвакска аф лисендихть.36Синь мзярдонга аф кулыхть, сяс мес улихть ангелхнень лаца. Синь Шкаень итть, вдь Шкайсь вельмафтозень кулофста.37А кулофнень эзда вельмама афкукс ули, тянь колга корхтась Моисейга палы кусторксть колга азксса, мзярда лемдезе Азорть Шкайкс Авраамонди, Шкайкс Исааконди, Шкайкс Иаковонди.38Шкайсь – аф кулофнень Шкайсна, а эряйхнень, сяс мес Тейнза сембе эряйхть».39Тянь каршес конат-конат койти тонафтыхнень эзда мярьгсть: «Тонафты, Тон лац азыть».40Тяда меле синь кяльсна ашезь шарфтов кизефнемс Иисусонь мезеньге колга.

Христоссь – кинне цёрась?

(Матф. 22:41-46; Марк 12:35-37)

41Иисус мярьгсь тейст: «Мес ломаттне тяфта корхтайхть: Христоссь – тя Давидонь Цёрац?42Вдь сонць Давид корхтай Псалтирьса:
"Азорсь мярьгсь монь Азорозти:
Озак Монь види ширезон,
43мзярс аф путсайне Тонь пильгалот
Тейть каршек ащихнень".

44Лисенди, Давид лемнесы Христость Азоркс; кода ина Христоссь ули Давидонди цёракс?»

Пеледа койти тонафтыда

(Матф. 23:1-36; Марк 12:38-40; Иоанн 11:37-54)

45Мзярда сембе ломаттне кулхцондсть, Иисус мярьгсь тонафниензонды:46«Ванфтода пря койти тонафтыда, конат кельгсазь кувака щамса якамать, мишендема-рамсема вастса шумбракснема-шнама валонь кочксемать, синагогаса и каванямань иласа инголи озсемать.47Синь сивондьсазь-ётафнесазь удаватнень мекольценяснон и прянь няфтемга ламос озонкшнихть. Синь сяда кемоста улихть судендафт».


*а 20:17 Псалтирь 117:22

*б 20:42-43 Псалтирь 109:1


предыдущая глава Глава 20 следующая глава