Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 9

Иисус кучсыне кемгафтува апостолхнень

(Матф. 10:5-15; Марк 6:7-13)

1Иисус кочказень кемгафтувотнень и макссь тейст вий и азорксши панцемс кяжи ваймопожфнень и пчкафнемс урматнень.2Сон кучезень синь ломаттненди Шкаень Оцязорксшить колга азондома и сярядиень пчкафтома.3Иисус мярьгсь тейст: «Мезевок тяда сявонде ки лангс, аф мандоня, аф канкс, аф кши, аф сиянь ярмак, аф омбонц щапт.4Кодама кудс суватада, тозк илядода ошста тумозонт.5А кда коса аф васьфтядязь, эста туда ся ошста и шукадесть пильгстонт пультьке ся ошть эзда. Катк тя ули тейст муворгофтомань тяштьксокс».

6Тонафнихне тусть и якасть велетнень ланга, сембе вастова азонкшнезь Пара кулять и пчкафнезь сярядихнень.

Ирод кизефни Иисусонь колга

(Матф. 14:1-12; Марк 6:14-29)

7Кулезе Ирод оцюнясь мезе тиендсь Иисус, и абонкшнесь: сяс мес финцне корхнесть, кле, тя Иоанн вельмась кулофста;8омбонцне, кле, тя Илия эвондась, а конат корхнесть – вельмась кунардонь пророкнень эзда фкясь.9Ирод мярьгсь: «Иоаннонь прянц керфтыне; кие ина Ся, конань колга кулян тяфтама тефт?» Сонь мялецоль няемс Иисусонь.

Иисус анды вете тёжятть ломань

(Матф. 14:13-21; Марк 6:30-44; Иоанн 6:1-14)

10Мзярда апостолхне мрдасть, синь азондозь Иисусонди семботь, мезе тисть. Иисус сявозень синь Эсь мархтонза и тусь Вифсаида ошть ала сетьме вастс.11Но ломаттне содамок тянь, тусть мельганза; Иисус васьфтезень синь пара мяльса, корхнесь Шкаень Оцязорксшить колга, и кит анасть пчкафтома – пчкафтозень.

12Шись мадома лангсоль. Тейнза маладсть кемгафтувотне и мярьгсть: «Нолдайть ломаттнень маластонь велева удома и эстейст ярхцамбялень сатома. Тяса минь шава вастсотама».13Но Иисус мярьгсь тейст: «Тинь максода тейст ярхцамс». Сят каршезонза: «Минь, вете кшида и кафта калда башка, мезеньковок аш. Дяряй тейнек молемс сембе ня ломаттненди ярхцамбялень рамама?»14Аляда тоса ульсь ветешка тёжянь. Иисус мярьгсь тонафнихненди озафтомс ломаттнень марс, ведьгемонень.15Тисть тяфта, озафнезь сембонь.16Иисус сявозень вете кшитнень и кафта калхнень, кеподезень сельмонзон менели, бславазень синь. Сон синнезень кшитнень и калхнень, максозень тонафнихненди, сят явондозь ломаттненди.17Сембе ярхцасть топодемс; и лятф сускомда кочкавсь кемгафтува кептерь.

Пётр лувсы Иисусонь Христоскс

(Матф. 16:13-21; Марк 8:27-31)

18Весть, мзярда Иисус озондсь сетьме вастса, и тонафниенза ульсть мархтонза, Сон кизефтезень: «Кикс лувсамазь ломаттне?»19Синь каршезонза мярьгсть: «Финцне – Иоанн Кстиндайкс, омбонцне – Илиякс, лиятне корхтайхть вельмась кунардонь пророкнень эзда фкясь».20Сон кизефтезень синь: «А тинь кикс лувсамасть Монь?» Пётр каршезонза: «Тон – Шкайть эзда саф Христоссь».

21Но Иисус кемоста кардазень тянь колга киндинге корхнемс.22Мярьгсь: «Ломанень Цёрати сави лама маятамс, аерфтсазь Сонь ломаньтналонь оцюнятне, озксвятиень оцюнятне и койти тонафтыхне, Сон ули шавф и колмоце шиня вельмай».

Иисус корхтай мельганза молемать колга

(Матф. 16:24-28; Марк 8:34-9:1)

23Иисус мярьгсь сембонди: «Кинь мялец молемс Монь мельган, ся катк макссы эсь прянц Тейне, сявсы крёзонц и моли мельган.24Сяс мес кие ёрай ванфтомс эряфонц, ся юмафтсы сонь. А кие юмафтсы эряфонц Монь инксон, ся ванфтсы сонь.25Кодама лезкс ули ломанти, кда сявондярясы эстейнза сембе масторлангть, а эсь ваймонц юмафтсы-арафтсы али эсь прянц вятьсы кальдявс.26Кие виздьсамань Монь и Монь валнень, сянь Ломанень Цёраське виздьсы, мзярда сай Эсь иневалдсонза, Алянц и Шкаень ангелхнень иневалдсост.27Видеста корхтан тейнть: тяса ащихнень ёткса улихть стапт, конат нинге аф кенерихть куломс, кода ни няйсазь Шкаень Оцязорксшить».

Иисусонь лиякстомац

(Матф. 17:1-8; Марк 9:2-9)

28Ня валхнень азомда меле кафксошка шинь ётазь, Сон сявозень мархтонза Пёторонь, Иоаннонь, Иаковонь и куцсь мархтост панда пряв озондома.29Озондомста Сонь шамац лиякстомсь, щамоцка тиевсь пиндолды акшекс.30Вов Сонь вакссонза эвондасть кафта алят, конат корхнесть Сонь мархтонза, нят ульсть Моисей и Илия.31Синь састь менелень иневалдса, и корхнесть Иисусонь эряфонц шумордаманц колга, конань Тейнза эряволь пяшкодемс Иерусалимса.

32Пётр и сонь ялганза кемоста матодовсть, а сргоземстост няезь Иисусонь иневалдонц и кафта алятнень, конат ащесть мархтонза.33Мзярда ня алятне срхкасть тумс Иисусонь ваксста, Пётр мярьгсь Тейнза: «Тонафты! Кодань пара тейнек тяса. Эрь тихтяма колма кошт: фкять Тейть, фкять Моисеенди и фкять Илиянди». Сон сонцьке ашезе сода, мезе корхтась.

34Сон валонцка ашезе адела, кода эвондась ковол и вельхтязень синь; тонафнихне эводсть, мзярда повсть коволть потмос.35Коволста кулевсь вайгяль, кона корхтась: «Тя Монь кельгома Цёразе. Кулхцондость Сонь!»36Тя вайгяльть сетьмомста Иисус меки лядсь ськамонза. Тонафниенза ванфтозь тянь потмосост и ся пингть киндинге ашесть азонда няйфснон колга.

Иисус панцы кяжи ваймопожфть цёранять потмоста

(Матф. 17:14-18; Марк 9:14-27)

37Омбоце шиня, мзярда синь валгсть панда пряста, Иисусонь васьфтема лиссь лама ломань.38Апак учт ломаттнень ёткста кати-кие пешкодсь: «Тонафты! Эняльдян, варжакстт цёразень лангс, сон монь тякось.39Сонь кунцесы кяжи ваймопожфсь: шабась апак учт юватькшни, а ваймопожфсь стане калкфтсы, мянь шофт лихти кургстонза; и кадондсы аньцек мзярда шабась вийда машты.40Мон энялькшнень Тонь тонафнихненди панемс ваймопожфть, и тейст ашезь панев».41Иисус каршезонза мярьгсь: «Вай, тяниень пингонь аф кемай и кольф ломатть! Мзярс Мон карман улема мархтонт и кирдемонт тинь! Вятьк сей цёрацень».42Цёранять нинге Тейнза молембачк прафтозе кяжи ваймопожфсь и кармась калкфтомонза; Иисус кардазе аф ару ваймопожфть, пчкафтозе цёранять и максозе алянцты.43Сембе дивандасть Шкаень оцюшити.

Иисус азонды Эсь куломанц колга

(Матф. 17:22,23; Марк 9:30-32)

Ся пингть, мзярда сембе дивандакшнесть Иисусонь тифонцты, Сон мярьгсь Эсь тонафниензонды:44«Кулхцондость и мяляфтость сянь, мезе азан: Ломанень Цёрась ули максф ломанень кядьс».45Аньцек синь ашезь шарьхкоде азф валонзон смузьснон: сон кяшфоль эздост и ашезь шарьхкодев тейст; ина Иисусонь кизефтемс тянь колга пельсть.

Кие сембода оцю?

(Матф. 18:1-5; Марк 9:33-37)

46Тонафнихне эсь ётковаст срхкафтсть пялькстома: кие эздост сембода оцю?47Иисус содамок, мезень колга синь седиге арьсихть, сявсь идня, арафтозе ваксозонза.48Мярьгсь тейст: «Кие сявсы тя идть Монь лемсон, ся Монь сявсамань; а кие Монь сявсамань, ся сявсы Монь Кучиезень; вдь кие эздонт инь ёмлась, ся ули сембода оцю».

Кие тейнть аф каршек, ся инксонт ащи

(Марк 9:38-40)

49Эста Иоанн мярьгсь: «Тонафты! Минь няеме ломань, кона Тонь лемсот панци кяжи ваймопожфт, аньцек минь кардаськ, сяс мес сон аф якай мархтонк».50Иисус мярьгсь тейнза: «Тясть карне. Кие аф каршек тейнть, ся тинь инксонт».

Самариянь ломаттнень аш мяльсна нолдамс Иисусонь ширезост

51Мзярда малаткшнесь Иисусонь менели сявома пингоц, Сон срхкась молемс Иерусалиму.52Эстедонза инголи Сон кучсь кулянь пачфтихть; сят тусть и сувасть Самариянь фкя велес Тейнза инь эрявиксть аноклама.53Аньцек тостонь ломаттнень ашель мяльсна нолдамс Иисусонь ширезост, сяс мес содазь Сонь молеманц Иерусалиму.54Тянь няемста Иаков и Иоанн тонафниенза мярьгсть: «Азор, мяльце, минь мярьктяма толти валгомс менельста и машфтомс синь, кода и Илия тиендсь?»55Иисус шарфтсь тейст, кардазень и мярьгсь: «Тинь аф содасасть, кодама ваймопожфоннетяда;56вдь Ломанень Цёрась сась аф машфтомс ломаттнень ваймоснон, а идемс». И синь тусть лия велес.

Иисусонь мельге молемать питнец

(Матф. 8:19-22)

57Ки лангса фкя ломанць мярьгсь Иисусонди: «Азор! Мон молян мельгат, коза Тон афолеть моле».58Иисус мярьгсь тейнза: «Келаснень улихть варясна, менелень нармоттнень – пизосна, а Ломанень Цёрати аш коза путомс пряц».

59Омбоцети мярьгсь: «Мольхть мельган». Ся каршезонза: «Азор! Нолдамак монь васенда куду алязень калмама».60Иисус мярьгсь тейнза: «Катк кулофне калмосесазь эсь кулофснон, а тон архт и азонтт Шкаень Оцязорксшить колга».

61Нинге фкясь мярьгсь Тейнза: «Азор, мон молян мархтот. Аньцек ожу, васенда молян куду и тумдон инголе азан маластонненди мекольцень валхт».62Иисус мярьгсь тейнза: «Ся, кие кундась сокати и ванонды фталу, Шкаень Оцязорксшити аф ладяй».


*а 9:53 Самариянь и Иудеянь эряйхне ашесть ладя эсь ётковаст. Сембода пяк Самариянь эряйхненди ашесть кельгов ся еврейхне, конат якасть масторснон пачк Иерусалиму Шкайти сюконяма.


предыдущая глава Глава 9 следующая глава