Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 23

Иисус Пилатонь инголе

(Матф. 27:1,2,11-14; Марк 15:1-5; Иоанн 18:28-38)

1Эста синь сембе стясть и сявозь Сонь Пилатонди.2Тоса ушедсть муворгофнемонза Сонь, и мярьгсть: «Минь няеськ, Сон тапарякшнесы минь ломаньтналоньконь, карнесыне пандомс кесарти каяфкс, лемнесы Эсь прянц Христоскс, Оцязоркс».3Пилат кизефтезе Иисусонь: «Тон еврейхнень Оцязорснат?» Сон каршезонза мярьгсь: «Тя тон тяфта корхтат».4Пилат мярьгсь озксвятиень оцюнятненди и пуромфненди: «Мон аф мушендан кодамовок муворши тя ломаньца».5Но синь кемоста ащесть эсь валснон лангса, и корхтасть: «Сон Эсь тонафтомасонза кашангофнесыне ломаттнень марнек Иудеяса, Галилеяста сявомок тяза самс».

Иисус Иродонь инголе

6Пилат, Галилеять колга кулемста, кизефтсь: «Тя Ломанць Галилеянь эряй?»7Мзярда содазе, Сон Иродонь аймакста, кучезе Иисусонь Иродонди, кона ся шитнень ульсь Иерусалимса.

8Ирод, Иисусонь няемста, пяк кенярдсь. Сонь кунаркиге мялецоль няемс Иисусонь, сяс мес лама кулендсь колганза и надиясь няемс Сонь эздонза мееньге дивань тев.9Сон макссесь Тейнза лама кизефкс, но Иисус каршезонза мезевок ашезь корхта.10Озксвятиень оцюнятне и койти тонафтыхне ащесть тоса и сембе вийса муворгофнезь Сонь.11Эста Ирод эсь ушманонзон мархта наругась и пеедсь Иисусонь лангса, а сяльде щафтозе козя щамса и кучезе меки Пилатонди.12Ся шиня Пилатонь мархта Ирод тиевсть ялгакс, а тяда инголе синь ашесть ладя фкя-фкянь мархта.

Иисусонь куломас судендамац

(Матф. 27:15-26; Марк 15:6-15; Иоанн 18:39-19:16)

13Пилат серьгядезень озксвятиень оцюнятнень, Израилень лия оцюнятнень и ломаньтналть,14мярьгсь тейст: «Тинь вятесть тейне тя ломанть, кода ломанень кашангофтыень; и вов мон пингстонт кизефнине Сонь и ашине му мезьсонга шумукс, мезьса тинь муворгофнесасть.15Иродга ашезь му эсонза муворши, сясы меки кучезе Сонь тяза. Тя ломанць ашезь тие мезевок стама, мезенкса максоволь куломати.16Сяс пиксфтомда меле нолдаса».

17А Пилатонди самай эрявсь эрь Очижиня нолнемс фкя ломань пякстафнень ёткста.18Но сембе ломаттне ушедсть юватькшнема: «Кулома Тейнза! Нолдак тейнек Вараввань!»19Варавва пякстафоль ошса оцюнятнень каршес кеподеманкса и ломанень шавоманкса.20Пилат тага корхтазевсь мархтост, сяс мес ёразе нолдамс Иисусонь.21Но сят каршезонза ювадсть: «Эськодемс! Эськодемс крёзти!»22Пилат колмоцеда пшкядсь тейст: «Мезень кальдяв Сон тись? Мон мезевок ашень му эсонза, мезенкса эряволь шавомс; пиксфтомда меле нолдаса».23Синь стаки вярьгак вайгяльхть пешкоткшнезь, анасть эськодемс Иисусонь крёзти.

Синь и озксвятиень оцюнятнень юватькшнемасна сявозь вярть.24И Пилат тиезе сянь, мезе синь вешсть.25Сон нолдазе алять, кона пякстафоль оцюнятнень каршес кеподеманкса и ломанень шавоманкса – сянь, конань аназь; а Иисусонь максозе тейст шавомс, кода синь ёрасть.

Иисусонь крёз лангс эськодемац

(Матф. 27:32-44; Марк 15:21-32; Иоанн 19:16-27)

26Мзярда Иисусонь вятезь эськодемс, мельганза крёзть кандома кошардозь Киринеяста Симононь, кона ся пингть мрдаль паксяста.

27Иисусонь мельге мольсь ламодонга лама ломань, ётксост ульсть аватка, конат авардсть и явсесть инксонза.28Иисус шарфтсь тейст, мярьгсь: «Иерусалимонь стирьхть, тяда аварде инксон, авардеда эсь инксонт и идентень инкса;29сяс мес сайхть шит, мзярда мярьгихть: "Павазуфт аф шачфтовихне и сят, конат нинге ашесть шачфне, и мяштьса аф потяфтыхне!"30Эста ушедыхть корхтама панттненди: "Прада лангозонк!", губорхненди: "Вельхтямасть минь!"31Кда пижелгоды шуфтть мархта тяфта тиендихть, эста мезе ули коськть мархта!»

32Иисусонь мархта вятсть куломас нинге кафта алят, зиянонь тиихть.33Мзярда састь вастти, кона лемневи Пряпакарь, тоса ушматтне эськодезь крёз лангс Иисусонь и зиянонь тиихнень, фкять види, омбоцеть кержи ширезонза.34Иисус корхтась: «Аляй! Нолдайть пежеснон, сяс мес синь аф содасазь, мезе тиихть». Ушматтне, жерьбань ёрдазь, явозь Иисусонь щамонзон.

35Ломаттне ащесть и ванцть. Оцюнятневок ванцть мархтост и марса рахсесть лангсонза, корхтасть: «Лиятнень идекшнезень, идезазе Эсь прянцка, кда Сон Христоссь, Шкаень кочкафсь!»36Ушматтневок наругасть лангсонза, нежетькшнесть Тейнза и макссесть Тейнза шапама вина,37корхтасть: «Кда Тон еврейхнень Оцязорснат, идек пряцень!»38Иисусонь вельхксса сёрматфоль греконь, римонь и евреень кяльса: «Тя Еврейхнень Оцязорсна».

39Фкя эськотьф зиянонь тиись кяжиста пеедезь пялендезе валса: «Кда Тон Христоссят, идек Эсь пряцень и миньге идемасть!»40Но омбоцесь карнезе сонь, корхтась: «Кали тон Шкайдонга аф пелят, вдь тонцьке судендафат тяконди?41Минь судендафтама видешис коре, эсь тевоньконь инкса сатоськ тянь, а Сон мезеньге кальдяв ашезь тие».42Сон мярьгсь Иисусонди: «Иисус, лятфтамак, мзярда саят Оцязорксшизт!»43Иисус мярьгсь тейнза: «Видеста корхтан тейть, тячиёк улят мархтон райса».

Иисусонь куломац

(Матф. 27:45-56; Марк 15:33-41; Иоанн 19:28-30)

44Пингсь ульсь котоце частть маласа, мзярда апак учт марнек модать комачазе шобдась и тяфта ульсь вейхксоце частти молемс.45Шись кяшевсь, и Шкаень кудса котфонь перяфкссь сязевсь кучкава кафтова.46Иисус вярьгак вайгяльхть ювадсь: «Аляй! Тонь кядезт максса ваймозень!» Ня валхнень азомда меле ваймоц лиссь.

47Сядонь оцюнясь тянь няемста, Шкаень шназь, мярьгсь: «Афкукс тя ломанць ульсь видексшинь ломань!»48Сембе ломаттне, конат пуромсть тянь ванома, мзярда няезь, мезе лиссь, ризфть эзда эрьхнезь эсь мяштьснон и тушендсть тоста.49Но сембе сят, кит содазь Иисусонь, ащесть ширеняса и ванцть, ётксостольхть аватневок, конат састь Сонь мархтонза Галилеяста.

Иисусонь калмамац

(Матф. 27:57-61; Марк 15:42-47; Иоанн 19:38-42)

50Фкя ломанць, лемоцоль Иосиф, сувсесь Оцю пуромксть лувксс. Сон ульсь пара вайме и видексшинь ломань,51и каршеколь сянди, мезе арьсесь и тись Оцю пуромкссь. Шачемас коре Иосиф ульсь Аримафеяста, евреень ошста, и Сон учендозе Шкаень Оцязорксшить саманц.52Иосиф мольсь Пилатонди и эняльдсь максомс Иисусонь ловажанц.53Сон валхтозе крёз лангста ловажать, ашкодозе иляназонь котфс и путозе калмос, кона карафоль кевбандс, коса нинге кивок ашель калмаф.54Тя ульсь пяденцяста, ваймамань шинди аноклама шиня.

55Аватне, конат састь Иисусонь мархта Галилеяста, мольсть Иосифонь мельге, няезь калмоть и кода путфоль эзонза ловажась.56Куду мрдамста синь анокласть танцти шине вадендемат и шуфта вай. Ваймамань шить синь ётафтозь ваймосезь, кода кошардсь койсь.


предыдущая глава Глава 23 следующая глава