Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 1

Шумбракстомась

1Павел, Шкайть мяленц коряс Иисус Христосонь апостолоц, и Тимофей кемай ялгась кучихть пара вал Шкайть кемаень пуромксонцты Коринф ошса, и тяфта жа сембе иняру ломанензонды, конат эряйхть Ахаиять келес.2Арьсетяма тейнть пароказне и сетьмоши Шкай Аляньконь и Иисус Христос Азороньконь эзда!

Шкайсь максы ваймама-кемокстама

3Улеза шнаф-бславаф Иисус Христос Азороньконь Аляц и Шкаец! Сон – минь кельгозь ужяльди Аляньке и сембоса ваймафты-кемокстафты Шкаеньке.4Сон минь эсонк ваймафты-кемокстай эрь кодама стакашисонк, тянь вельде миньге улель виеньке ваймафтомс-кемокстамс эрь кодама стакашис повфнень сяка ваймафтомаса, конаса Сон кемокстамазь минь.5Вдь конашкава касыхть минь эряфсонк Христость инкса маятаматне, сяшкава и Шкайсь Христость вельде касфтсы минь эряфсонк Эсь ваймафтоманц-кемокстаманц.6Ся стакашитне, конатнень минь кирдьсаськ – улихть тейнть ваймафтоманди-кемокстаманди и идеманди. А мзярда тейнек максови ваймама-кемокстама – тявок моли тейнть ваймафтоманди-кемокстаманди. Тя лезды тейнть кемоста кирдемс сембе ся сталмотнень, конатнень миньге кирдьсаськ.7Минь кемоста надиятама лангозонт: тинь кирттяда. Вдь минь содасаськ: кода тинь ули пяльксонте минь мархтонк маятамасонк, тяфта жа тинь ули пяльксонте минь мархтонк ваймафтомасонк-кемокстамасонк.

8Кемай ялгат, минь мяленьке тяфтама: содаледе тинь ся стакашитнень колга, конат лиссть мархтонк Асияса. Ня стакашитне ульсть сяшкава оцюфт и аф кирдемшкат, нльне афи надияме лядомс шиса.9Минь арьсеме, афкукс ни судендафтама куломас. Тя лиссь тянкса: надиялеме аф эсь пряньконь лангс, но аньцек ськамонза Шкайть лангс, кона вельмафнесыне кулофнень.10Тя Сон идемазь минь пяк мала куломада и сяда товга идесамазь. Сонь лангозонза минь кемоста надиятама: Сон тага идесамазь,11сяс мес тиньге лезттада тейнек эсь озондомантень вельде. Эста ламотне сюконяйхть Шкайти Сонь бславаманц инкса, конань Сон казезе тейнек ламотнень озондомаснон каршес.

Павелонь Коринфу саманц кирдевомац

12Минь шнатама пря, сяс мес ару ваймовайгяленьке кемокстай эсонк: минь тя масторлангса, а сембода пяк тинь ётксонт, эряме седиень панжезь и виде ваймоса, Шкайть мяленц коряс. Прянь вятемаса минь тиендеме аф ломанень смузьшить коряс, а Шкаень пароказнеть коряс.13Минь сёрмасонк тейнть, аш мезевок лия, сяда башка, мезсь тейнть лувови и шарьхкодеви. Надиян, шарьхкодьсамасть педа-пес,14кода ни ушедоде шарьхкодемонк. Эста, Иисус Азороньконь сама шистонза, тинь карматада шнафтома пря минь эсонк, кода миньге шнатама пря тинь эсонт.

15Тянь лангс кемазь, мон сань мяльс инголи сувамс ширезонт и тянь вельде кафксть кандомс тейнть пароказне.16Мон арьсень сувамс тейнть Македонияв молемста, а сяльде, Македонияста мрдамста тага лоткамс ширезонт, а тинь кочкалесть монь кизень Иудеяв.17Дяряй мон, мзярда срхкань тяфта тиемс, тиень кода ломань, кона педа-пес ашезе арьсе тевонц? Али, пади, мон тиендян аньцек эсь арьсефозень коряс и аф ванца Шкайть мяленц? Али мон фкя сяка пингть корхтан «тяфта» и «аф тяфта»?18Шкайсь, кона фалу кирдьсы Эсь валонц, кемокстасы тянь: минь корхтамасонк тейнть ашель «тяфта» и «аф тяфта».19Вдь Шкаень Цёрась, Иисус Христоссь, конань колга минь: мон, Силуан и Тимофей, азондоме тейнть, фкя сяка пингть ашезь корхне «тяфта» и «аф тяфта»; но Иисусонь вельде пяшкодевсь «тяфта» валсь,20и мзяра надияфтомада афоль макса Шкайсь, эрсь эздост пяшкодевсь Христосса. Вов мес минь Христосса, Шкайть шнаманкса, корхтатама «аминь, тяфта ули!»21Тя Сонць Шкайсь кемокстамазь минь тинь мархтонт марса Христость эса и тя Сон вадемазь-кочкамазь минь.22Сон тяштькстамазь минь Эсь тяштькссонза и максозе Эсь Ваймопожфонц минь седиезонк. Ваймопожфть вельде минь кемоста содасаськ: Сон макссы тейнек сянь, мезе надияфтсь максомс.

23Мон варан Шкайть инголе: тя пингть самс мон ашень сашенда Коринфу сяс, мес ёрань ванфтомс тинь пичефкста.24Но аф сяс, бта минь ёратама азорондамс тинь кемамантень лангса. Аф! Тинь кемоста ащетяда кемамасонт, а минь мяленьке аньцек лездомс тейнть мумс кеняртьксонтень.


предыдущая глава Глава 1 следующая глава