Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 5

Шкайть мархта ладямась

1Тяни минь лувфтама кемамать инкса видексшинь ломанькс, и сяс ладязь эрятама Шкайть мархта Иисус Христос Азороньконь вельде.2Тя Сон вятемазь минь кемамать вельде ся пароказнети, конаса минь тяни эрятама-ащетяма. Тяни минь кенярдезь и надиязь учсаськ сянь, мзярда суватама Шкайть мархта Сонь иневалдозонза.3Минь кенярдеманьке аф аньцек тянь эса. Минь кенярттяма маятаматнендивок, сяс мес содасаськ: маятамаста шачи кирдемшкась,4кирдемшкаста – кемошись, кемошиста – надиямась.5А надиямась аф васькафты, сяс мес Шкайсь Эсь кельгоманц валозе минь седиезонк Иняру Ваймопожфть вельде, кона максф тейнек.

6Мзярда минь ашель виеньке лездомс эстейнек, Христос ладяф пингть кулось минь инксонк, пежу ломаттнень.7Арьсян пяк стака мумс стама ломань, кона кулоль видексшинь тиить инкса; пади, муви аньцек стама, кие улель анок куломс паронь тии ломаненкса.8А Христос кулось минь сембонь инксонк, мзярда минь нинге улеме пежу ломанькс. Тяфта Шкайсь няфтезе тейнек Эсь кельгоманц.9Сяс сядонга пяк тяни, мзярда Шкайсь лувомазь минь видексшинь ломанькс Христость веронц вельде, минь ульхтяма идефт Шкайть кяженц эзда.10Вдь нинге ся пинкнень, мзярда минь улеме каршект Шкайти, Сон минь ладямазь Эсь мархтонза Цёранц куломанц вельде, сяс тяни, мзярда минь ни ладяме Сонь мархтонза, сяда пяк идефтяма Шкаень Цёрать эряманц вельде.11И тя аф сембось, тяда башка минь нинге шнафттама пря Шкайса, кона ладямазь минь Эсь мархтонза Иисус Христос Азороньконь вельде.

Адам и Христос

12Кода фкя ломанть вельде масторлангти сувась пежесь, и пежеть мархта куломаське, стане куломаське ётась сембе ломаттнень лангс, сяс мес сембе сувасть пежес.13Вдь пежесь ульсь масторлангса нинге койть максомдонза инголе; но тоса, коса аш кой, пежесь муворшикс аф лувови.14Но Адамонь эзда сявомок Моисеенди самс куломась азорондась сятненьге лангса, кит ашесть сува пежес Адамонь лаца. Адам ульсь няфтемань тяштьксокс, и сон няфнесь Сянь лангс, конанди эрявсь самс.

15Но Шкайть казненц аш кода путомс Адамонь зияну тевонц ваксс. Кда фкя ломанть зияну тевоц кандсь кулома лама ломаненди, эста ламодонга сяда оцюфт Шкаень пароказнесь и Сонь пароказненц казнец, конат сембонди максовихть фкя Ломанть, Иисус Христосонь вельде.16Фкя ломанть пежец коданга аф путови Шкаень казнеть ваксс. Сяс мес фкя зияну тевть инкса ульсь суд, кона судендась молемс аду, а Шкаень пароказнесь макссь сембе пежетнень эзда лихтема и видексшинь ломанькс арама.17Вдь кда фкя зияну тевть инкса, конань тиезе фкя ломань, кармась азорондама куломась, эста сядонга пяк фкя Ломанть, Иисус Христость вельде кармайхть эряма и азорондама сят, кинди максовсть Шкайть козя пароказнец и видексшиц.

18Лисенди, кода фкять зияну тевоц судендазень сембе ломаттнень аду, тяка лаца фкять видешинь тевоц тисыне сембонь Шкайть инголе видексшинь ломанькс и кази тейст эряф.19Вдь кода фкять аф кулхцондомац ламотнень тиезень пежукс, тяфта фкять кулхцондомац ламотнень тисыне видексшинь ломанькс.20Но Моисеень коец максфоль меле, и вельденза ламолгодсь пежесь. А мзярда ламолгодсь пежесь, эста сяда пяк ламолгодсь Шкаень пароказнеське.21И сяс, кода инголи азорондась пежесь и вятсь куломас, тяфта тяни Шкаень пароказнесь кармай азорондама видексшить вельде и вятьсамазь минь пефтома пингонь эряфти Иисус Христос Азороньконь вельде.


предыдущая глава Глава 5 следующая глава