Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 13

Варнава и Савл кучевихть покодемас

1Антиохияса, тостонь кемаень пуромксса ульсть пророкт и тонафтыхть: Варнава, Симеон, кона лемневсь Нигеркс, Киринеяста Луций, Манаил, кона марса кассь Ирод оцюнять мархта, и Савл.2Весть, мзярда синь покодсть Шкайти и поставасть, Иняру Ваймопожфсь мярьгсь: «Нолдасть Тейне Варнавань и Саволонь ся тевть тиема, конанди Мон синь тердине».3Поставамда и озондомда меле кемайхне путозь синь лангозост кядьснон и нолдазь синь кис.

Апостолхне азондыхть Пара куля Кипраса

4Варнава и Савл, Иняру Ваймопожфонь кучфне, састь Селевкияв, а тоста тусть ведьге Киправ.5Саламину самста синь азондозь Шкаень валть евреень синагогава. Иоанн ульсь тейст лездыкс.

6Синь ётазь марнек Кипрать мянь Паф ошти молемс. Тоса васьфтсть фкя ломань, колдун и аф афкуксонь пророк; сон ульсь еврей, лемоц Вариисус.7Сон эрясь-ащесь Сергий Павел губернаторть видеса, кона ульсь ёню ломань. Губернаторть ульсь мялец кулхцондомс Шкаень валть и сон серьгядезень Варнавань и Саволонь.8Но Елима – лиякс колдун (тяфта ётафневи лемоц), ульсь тейст каршек, тяряфтсь аерфтомс губернаторть кемамать эзда.9Эста Савл, лиякс – Павел, улемок пяшксе Иняру Ваймопожфта, оржаста ванць лангозонза и мярьгсь:10«Идемэвозть цёрац, эрь кодама видешить душманоц! Тонь потмоце пяшксе васькафнемада и кяжи тевда. Тон лоткат али аф шорямост Шкаень виде китнень?11Аньцек вов тяни тонь сатонзе Шкаень кядсь! Тон сокоргодат и кати-мзяра пинге аф няйсак шить!» Эстокиге сянь лангс прась туста шобда, и сон кармась сей-тов шарома, вятиень вешема.12Тянь няемста, губернаторсь кармась кемама, и сонь дивандафтозе Азорть колга тонафтомась.

Павел и Варнава Писидиянь Антиохиясот

13Паф ошста Павел ки лангонь ялганзон мархта тусь ведьге Пергияв, кона ащесь Памфилияса. Тоса Иоанн кадозень синь и мрдась Иерусалиму.14Синь ина Пергаста киснон поладозь Писидиянь Антиохияв. Тоса ваймамань шиня синь сувасть синагогав и озасть.15Койста и пророкнень сёрматфснон эзда лувомда меле, синагогань оцюнятне мярьгсть азомда тейст: «Ялгат, кда ули мезенте азомс ломаттнень кемокстаманкса, корхтада».

16Павел стясь, яфодезе кяденц и мярьгсь: «Израилень ломатть и Шкайда пели сембе ломаттне, кулхцондода!17Израилень ломаньтналть Шкаец кочказень минь аляньконь и касфтозе-кеподезе ломаненьконь Египетонь модаса улемстост. Сяльде Эсь вии кядьсонза Сон лихтезень синь тоста18и нильгемоньшка кизонь кувалма трязень синь шавмодаса.19Сон машфтсь Ханаанонь модаса сисем ломаньтналхт и максозе тейст синь модаснон.20И тяда меле, ниле сятт ведьгемоньшка кизоньберьф, Сон макссесь тейст судьят Самуил пророкть самс.21Меле ломаньтналсь анась эстейнза оцязор, и Шкайсь максозе тейнза Саулонь, Вениаминонь юромста Кисонь цёранц, кона оцязорондась нильгемонь киза.22Сяльде Шкайсь валхтозе сонь и путозе тейст оцязоркс Давидонь, конань колга Сон мярьгсь тяфта: "Мон кочкайне Эстейне Давидонь, Иессеень цёранц. Сон седиге тусь мялезон, сон пяшкодьсыне сембе мяльнень-арьсеманень".

23Кода и ульсь надияфтф, Шкайсь кеподезе Израильти Идикс Давидонь уноконь-уноконц, Иисусонь.24Иисусонь самдонза инголе Иоанн тердезе Израилень марнек ломаньтналть шарфтомс Шкайти и кстиндафтомс пря.25Иоанн эсь кинц шумордамста мярьгсь: "Кикс лувсамасть монь? Мон аф ся, кинь тинь учтада. Но вага, монь мельган моли Ся, конань сандалиянцка аф кондястян юксомс".

26Ялгат, Авраамонь уноконь-уноконза и Шкайда пели сембе ломаттне! Тейнть кучф вал тя идемать колга.27Иерусалимонь эряйхне и синь оцюнясна ашезь шарьхкоде кикс ульсь Иисус. Синь судендазь Сонь, но тянь вельде пяшкодезь пророкнень валснон, конатне лувондовихть эрь ваймамань шиня.28Синь ашесть му Эсонза кодамовок муворши, мезенкса максоволь куломас, но сяка эняльдсть Пилатонди шавомс Сонь.29Мзярда пяшкодезь семботь, мезе азфоль колганза Сёрматфксса, валхтозь Сонь крёзста и путозь калму.30Но Шкайсь вельмафтозе Сонь кулофста.31Сон лама шинь кувалма эвондакшнесь сятненди, кит шиса улемстонза лиссть мархтонза Галилеяста Иерусалиму. Синь тяни азондыхть колганза ломаньтналоньконди.

32Минь пачфнесаськ тейнть тя Пара кулять: мезе Шкайсь надияфнесь минь атянь-атяньконди, сянь Сон пяшкодезе тейнек, идьснонды, вельмафтомок Иисусонь кулофста,33кода сёрматф омбоце псаломса:
"Тон Монь Цёразят,
тячи Мон шачфтыхтень Тонь".

34Шкайсь вельмафтозе Иисусонь кулофста, и Сон мзярдонга ни аф кулы. Тянь колга Шкайсь мярьгсь тяфта:
"Мон макссайне тейнть иняру и аф полафневи бславаматнень,
конат надияфтфт Давидонди".

35Сяс лия вастсонга корхтай:
"Тон аф максат Иняруцти наксадомс калмоса".

36Давид эряфоньберьф тиендсь сянь, мезе арьсесь тейнза Шкайсь. Сяльде кулось, калмафоль атянь-атянзон ёткс и наксадсь.37А Ся, конань вельмафтозе Шкайсь, ашезь наксада.38Содасть ина, ялгат, тя Сонь вельденза тейнть азови пежень нолдамась, сембе пежетнень – сятненьге, конат ашесть ноляв Моисеень коенц вельде.39Сонь вельденза нолдавихть пеженза эрть, кие кемай Тейнза.40Сяс ванода, тяза лисе мархтонт пророкнень вельде азфсь:41
"Ванода, низелкшнихть,
дивандада и юмада!
Сяс мес Мон тиян тяни, пингстонт, тяфтама тев,
конанди тинь афоледе кема,
кда кивок азондолезе тейнть"».

42Мзярда Павел и Варнава лиссть евреень синагогаста, лия ломаньтналоннетне эняльдсть азондомс тяконь колга сай ваймамань шистовок.43Кодак пуромфне кармасть сраткшнема, эста ламоц еврейхне и Шкайда пели ломаттне, конат шарфтфольхть евреень кемамати, тусть Павелонь и Варнавань мархта. И сят ломаттнень мархта корхнемста мярьгсть сяда товга эрямс Шкаень пароказнеса.

44Омбоце ваймамань шиня пцтай марнек ошсь пуромсь кулхцондомонза Шкаень валть.45Мзярда еврейхне няезь тняра пуромф ломаттнень, синь сявозень сельмонь каямась и, кяжда сялдозь, туркс арасть сянди, мезе корхтась Павел.46Эста Павел и Варнава аф пелезь мярьгсть: «Шкаень валть эряволь пачфтемс васенда тейнть. Но сяс мес тинь аердасасть Шкаень валть и тинць эсь прянтень тиесть аф кондястикс пефтома эряфти, минь пшкяттяма лия тналонь ломаттненди.47Сяс мес тяфта кошардомазь Азорсь:
"Мон тиихтень Тонь валдокс лия ломаньтналхненди,
кандозат Тон идема масторлангть пес"».

48Лия тналонь ломаттне тянь кулемста кеняртькшнесть и шназь Азорть валонц, и сембе, кит кочкафтольхть пефтома эряфонди, кармасть кемама.49Азорть валоц сраткшнесь сембе аймакова.50Но еврейхне взафтозь лангозост Шкайда пели содаф аватнень и ошень васенце ломаттнень. Синь кармасть панцемост Павелонь и Варнавань, и панезь эсь аймакстост.51Эста апостолхне шукадезь пильгстост пульть, тянь вельде няфтезь синь муворшиснон, и тусть Иконияв.52А сембе тонафнихне пяшкодсть кенярдемаса и Иняру Ваймопожфса.


*а 13:33 Псалтирь 2:7

*б 13:34 Исаия 55:3

*в 13:35 Псалтирь 15:10

*г 13:41 Аввакум 1:5

*д 13:47 Исаия 49:6


предыдущая глава Глава 13 следующая глава