Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 3

Коське пильге ломанть пчкафтомац

1Весть Пётр и Иоанн марса мольсть Шкаень куду. Тя ульсь вейхксоце частста, озондома пингть.2Шкаень кудть Якстерькс лемневи ортанзон видеса озадоль ломань, конань пильгонза шачемстокиге афольхть яка. Эрь шиня сонь каннезь ня ортатненди анцема Шкаень куду сашендыхнень кядьста.3Сон няезе кода Пётр и Иоанн срхкасть сувама Шкаень кудть пирьфозонза, и анась кядьстост.4Пётр Иоаннонь мархта варжакстсть лангозонза и Пётр мярьгсь: «Ватт лангозонк».5Ся оржаста варжакстсь, учсь, сят мезевок максыхть.6Эста Пётр мярьгсь тейнза: «Аф сиязе, аф зрнязе аш. Но мезезе ули, сянь максса тейть. Назаретонь Иисус Христость лемса – стяк и якак».7Сявозе сярядить види кядьта и кеподезе сонь. Алять эстокиге пильге полданза и плманжанза кемокстасть,8сон комотсь вастстонза и ушедсь якама. Сон сувась мархтост Шкаень кудть пирьфозонза, тосовок кенярдемать эзда якась и комотнесь, шназе Шкайть.9Сембе ломаттне няезь, кода сон якась и шназе Шкайть.10Синь содазь, тя ульсь вчёк ся алясь, кона ащекшнесь Шкаень кудть Якстерь ортанзон видеса и анцесь. Синь пяк дивандафтозе и абонтфтозе ся, мезе лиссь алять мархта.

Пёторонь корхтамац Шкаень кудса

11Сяс мес пчкафтфсь ашезень кадонда Пёторонь и Иоаннонь, дивас праф ломаттне ласьксть тейст, ся вастти, конань лемнезь – Соломононь вельхтяф пирьфоц.12Тянь няемста Пётр мярьгсь ломаттненди: «Израилень ломатть! Мес дивандатада тянди? Мес ваттада лангозонк стане, бта минь эсь вийсонк али эсь видексшисонк стяфтоськ сонь пильге лангс и сон арась якайкс?13Авраамонь, Исааконь, Иаковонь Шкайсна, минь атянь-атяньконь Шкайсна кеподезе-шназе Эсь Цёранц Иисусонь. Тинь мисть Сонь и потаде эздонза Пилатонь инголе, мзярда ся мярьгондсь нолдамс Сонь.14Тинь потаде Иняруть и Видексшинь Тиить эзда и эняльдеде нолдамс ломанень шавить.15Тинь шавость Эряфонь Максыть. Но Шкайсь кеподезе Сонь кулофнень эзда, тянь минь няеськ эсь сельмосонк и тянь колга азонттама.16Иисусонь лемоц и Тейнза кемамась кемокстазе тя ломанть, конань тинь няйсасть и содасасть. Иисусонди кемамась пчкафтозе алять сельминголент.

17Мон содаса, ялгат, тинь и тинь оцюнянтевок аф содамошида максость Христость куломас.18Но тяфта Шкайсь пяшкодезе сянь, мезе кунаркиге азондсь сембе пророконзон вельде: Христости сави кирдемс оцю маятамат.19Сяс каендада и шарфтода Шкайти эсь пежентень нолдаманкса! Кда тяфта тихтяда,20эста сай одкстоптомань пингсь, кона максови Азорть эзда; и Сон кучсы тейнть Иисус Христость, конань инголькиге кочказе тейнть.21Тейнза лядома менельса ся пингть самс, мзярда Шкайсь одукс тисы семботь, кода надияфтсь кунаркиге иняру пророконзон вельде.22Вов мезе мярьгсь атянь-атятненди Моисей: "Азорсь, Шкаенте, кучи тейнть Пророк тинь ломанентень ёткста, кода кучемань монь. Кулхцондость Сонь сембоса, мезе Сон мярьги.23Эрь ломанць, кие аф кулхцондсы ся Пророкть, ули паньф Шкаень ломаньтналста и юмай".24Ня шитнень колга корхтасть лия пророкневок: Самуил и сембе, кит ульсть прорококс сонь мельганза.25А тинь пророкнень уноконь-уноксна, сят, кинди катф соткссь, конань Шкайсь ладязе тинь алянтень мархта, мзярда мярьгсь Авраамонди: "Масторлангонь сембе ломаньтналхненди канды бславама тонь уноконь-унокце".26И мзярда Шкайсь вельмафтозе Эсь Цёранц, Сон васенда кучезе Сонь тейнть – бславамонт и кяжи тевда аерфтомонт».


предыдущая глава Глава 3 следующая глава