Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 1

Шумбракстомась

1Павел, Шкайть мяленц коряс тертьф Иисус Христосонь апостолоц, и кемай ялганьке Сосфен2кучихть пара вал Коринф ошень кемаень пуромксти, сембонди, кит иняруяфтфт Иисус Христосонь эса и тертьфт улемс иняру ломанькс сембонь сятнень мархта, кит эрь вастова, эсь ширесост и минь ширесонка, тернесазь Иисус Христос Азороньконь лемонц.3Арьсетяма тейнть пароказне и сетьмоши Шкай Аляньконь и Иисус Христос Азорть эзда!

Павел сюконяй Шкайти

4Мон фалу сюконякшнян Шкаезти тинь инксонт, ся пароказнеть инкса, конань Сон максозе тейнть Иисус Христосонь вельде.5Тя Сонь вельденза Шкайсь козякофтодязь сембоса: эрь кодама валса и эрь кодама содамошиса –6вдь Христость колга кулясь кемокставсь эсонт, –7сяс тинь кядьсонт сембе казнетне Иисус Христос Азороньконь эвондаманц учемста.8Сон кемокстадязь тинь петь самс, и тянь вельде тинь ульхтяда аф муворуфт Иисус Христос Азороньконь сама шистонза.9Кемоста кирдьсы валонц Шкайсь, кона тердедязь тинь сотовомс Эсь Цёранц, Иисус Христос Азороньконь мархта.

Явоматне кемаень пуромксса

10Мон эняльдян тейнть, кемай ялгат, Иисус Христос Азороньконь лемса: ладяда сембе эсь ётковант, афольхть уле ётксонт явомат, но улеледе сотфт фкя-фкянь мархта фкя ёньца-мяльса.11Кемай ялгане, тейне пачкодсь Хлоя сазороньконь ломанензон эзда, кле, тинь пялькстотада эсь ётковант.12Мон корхтан ва мезень колга: эздонт финцне корхтайхть: «Мон Павелоннян», лиятне: «Мон Аполлосоннян», «Мон Кифаннян» али «Мон Христосоннян».13Кали Христос явовсь пяльксонь-пялькс? Кали Павел ульсь эськотьф крёз лангс тинь инксонт? Кали Павелонь лемса тинь кстиндафтада?14Сюконян Шкайти, мес мон тинь эздонт киньге ашень кстинда, Криспта и Гаийда башка.15Сяс кивок аф мярьгови, монь лемсон кстиндафтада.16Мон нинге кстиндайне Стефанонь кудэряензон, а кстиндань али аш тага киньге – аф содаса.17Вдь Христос кучемань монь аф кстиндама, а Пара кулянь кандома, но аф ломанень смузю кяльса-валса: афоль юмафтов Христость крёзонц виец.

Христос – Шкаень вий и смузьши

18Крёз лангса Кулофть колга кулясь – тя ёньфтомаши сятненди, кит молихть юмамань киге аду, а тейнек, идемань киге молихненди, – тя Шкаень вий.19Сёрматфксса азф:
«Мон машфтса смузьшиснон смузюфнень,
и нардаса ёнюфнень ёньцнон».

20Коса тяни смузюсь? Коса койти тонафтысь? И коса тя масторлангонь ёнюста арьсись, мазыста корхтайсь? Дяряй Шкайсь ашезе няфте тя масторлангонь смузьшить сембе ёньфтомашинц?21Шкайсь няфтезе Эсь смузьшинц, но мзярда масторлангсь эсь смузьшисонза ашезе сода и ашезе шарьхкоде Шкайть, эста Шкайсь арьсесь идемс кемайхнень тя «ёньфтома» кулять вельде, конань минь пачфнесаськ.22Еврейхне вешихть дивань тяштькст, а грекне вешендихть смузьши,23ина минь канттама Куля крёз лангс эськотьф Христость колга. Еврейхненди тя Кулясь – пупордамань кев, лия ломаньтналхненди – ёньфтомаши.24А сятненди, конатнень тердезень Шкайсь: еврейхненди и грекненди, Христоссь – Шкаень вий и Шкаень смузьши,25сяс мес Шкаень ёньфтомашись ломанень смузьшида ёню, и Шкаень лафчашись сяда вии ломаннеть коряс!

26Лятфтасть, кемай ялгат, кикс тинь уледе, мзярда тинь тердедязь Шкайсь. Аф ламоль ётксонт стамда, кинь ломаттне лувозь смузюкс, аф ламоль виида, пара лувксоннеда и содавикс юромоннеда.27Мезсь тя масторлангса лувови ёньфтомашикс, сянь Шкайсь кочказе, и тянь вельде вятезень смузюфнень визькс шамас. Мезсь тя масторлангса лувови лафчекс, сянь Шкайсь кочказе, и тянь вельде вятезень виихнень визькс шамас.28И мезсь тя масторлангса юромфтома, мезькска аф лувови, аердаф, сянь кочказе Шкайсь, тянь мархта няфтезе: ся, мезе лувондови питникс масторлангса – ся шава.29Сяс киндинге аф шнави пряц Шкайть инголе!30Вдь тя Сонь вельденза тинь сотоводе Иисус Христосонь мархта, конань Шкайсь тиезе тейнек смузьшикс. Христость вельде минь улеме лувфт видексшинь ломанькс Шкайть инголе, улеме аруяфтфт и идефт-рамафт воляшис.31Тяфта пяшкодеви Сёрматфксса азфсь:
«Прянь шнафтысь шназа пря Азорть мархта!»


*а 1:19 Исаия 29:14

*б 1:31 Иеремия 9:24


предыдущая глава Глава 1 следующая глава