Выбрать язык
Книги Ветхого Завета
Книги Нового Завета
без русского текста Alliluija. Alliluija! om evrejankeline ülenzoituzkirgund.Se znamoičeb: ”Ülenzoitkat Ižandad!” (psalmad 103:35; 104:45; 105:1).
Aaron. Aaron nece oli Moisejan vel’l’. Hän oli Izrail’an ezmäine pap’ (2. Moisejan kirj 29; Kirjeine evrejalaižile 5:4; 7:11); Izrail’an papiden ezitat (1. Aigkirj 5:27-47; Evangelii Lukan mödhe 1:5). Aaron oli Levijan suguspäi. Kacu Levii.
Arf. Arf om laval seižui jändevändim (psalmad 56:9; 70:22; 150:3).
Avraam. Avraam oli Izrail’an ezitat, kudamb tegi kaiken Jumalan sanan mödhe i läksi Mesopotamiaspäi Hanaanan maha. Nece ma oli toivotadud hänele i hänen jäl’gnikoile (psalmad 46:10; 104:6, 9, 42).
Blaslovida, blaslovind. Blaslovind znamoičeb hüväd, midä Jumal andab mehele. Muga kut Jumal blaslovib mehid, mugažo mez’-ki voib blaslovida toižid mehid (psalmad 3:9, 5:13, 20:4; 113:20), ozutesikš, tatad blasloviba ičeze poigid, papid blasloviba Izrail’an rahvast (4. Moisejan kirj 6:23-26).
David David om kaikid tutabamb Izrail’an kunigahišpäi. Lugetas, miše hän eli 1000 vot edel Hristosan sündundad. Davidan sugu sai ičeze augon Jakovan ezitataspäi Judaspäi. Davidaspäi zavodihe Judan kunigahuz’. Hän oli üks’ Messian, Iisusan Hristosan, ezitatoišpäi (2. Kunigahiden kirj: 7:12-16; Evangelii Matvejan mödhe 1:1; 9:27; Evangelii Lukan mödhe 1:32; Evangelii Joannan mödhe 22:16). David kirjuti suremban palan psalmoišpäi.
Edom. Ezitatan Jakovan Isav-vellespäi sündui rahvaz, kudamb eli Kolnudenmeren suvirandal, Edomas (psalmad 59:10; 82:7).
Efrem. Efrem oli ezitatan Jakovan poigan Josifan ezmäine poig i hänespäi lähtnu sugu (psalmad 59:9; 77:9; 107:9).
Ezičuine. Ezičuižeks kuctihe Izrail’an kanzoiš vanhemban poigan (psalmad 77:51; 104:36).
Filistii. Filistii sijazihe Keskmeren randal, Palestinas. Kut sanutas, sigä eliba Kritalpäi tulnuded filistilaižed (psalmad 55:1; 59:10).
Galaad. Galaad nece oli mägima Jordanjogen päivnouzmpolel, Gennisaretjärven randal (psalmad 59:9; 107:9).
Heruvim. Jumalan rindal olijad angelad vai heruvimad kuviteldihe enamba kaiked suugikahan. Psalmoiš heruvim om Jumalan hebo, miččel hän ištub raccil (psalmad 17:11; 79:2; 98:1).
Izrail’. Izrail’ – nece om: 1) ezitatan Jakovan toine nimi; 2) hänespäi lähtnuden rahvahan nimi.
Jordan. Jordan – nece om Palestinan kaikid suremb jogi, mitte lähteb Germonmägelpäi i vodab Gennisaretjärven kal’t Kolnudehemerhe (psalmad 41:7; 113:3).
Jakov. Jakov oli ezitatan Isakan poig i Avraaman poigan poig. Psalmoiden kirjas kävutadas paksus nimed ”Jakov” Izrail’an rahvahan sinoniman (psalmad 13:7, 21:24). Jakoval oli kaks’toštkümne poigad, kudambišpäi sünduiba kaks’toštkümne suguoksad. Psalmoiden kirjas heišpäi om johtutadud Levii (psalm 134:20), Juda (psalmad 47:12; 59:9), Zavulon i Naffalim (psalm 67:28), Josif (psalmad 77:67; 79.2, 80:6) i Veniamin (psalmad 7:1, 67.28, 79:3).
Josif. Josif – hän oli ezitatan Jakovan poig (psalm 76:16).Josifan velled möiba händast orjaks Egiptaha. Sigä händast tactihe vigatoman türmha, no möhemba Egiptan kunigaz, faraon, pästi händast valdale i pani ičeze valdmehiden i kaiken rahvahan vanhembaks (psalm 104.17-22). Josifal oli kaks’ poigad: Efrem i Manassii.
Juda. Juda – nece om: 1) üks’ Jakovan poigišpäi (1. Moisejan kirj 29:35); 2) üks’ Izrail’an suguoksiš vai roduiš. Heiden elotahod oliba Judan mägil Jerusalimaspäi suvipolel (psalmad 47:12; 59:9; 62:1).
Jumalad tundmatomad rahvahad, Mirun rahvahad, Verhad rahvahad.Psalmoiden kirjas nenil nimil kuctas kaikid toižid rahvahid, i vaiše Izrail’an rahvaz ei mülü neniden rahvahiden gruppaha; se om eriži. Nene rahvahad ei usknugoi Izrail’an Jumalaha. Hö tegiba sidä, midä Jumal ei käskend tehta ičeze rahvahale (psalmad 2:1; 9:12; 16, 17; 17:44; 32:10; 43:3, 77:55).
Korejalaižed. Korejalaižed oli üks’ Levian rodun oks (psalmad 41:1; 43:1; 44:1). Necen rodun ezitajad vediba pühäkodiš Jumalan ülenzoitust (2. Aigkirj 20:19). Kacu Levii.
Kožmusen lipaz. Nece oli puspäi tehtud, kuldal pälitadud lipaz, kus kaitihe kaks’ kivilaudad, mihe oli kirjutadud Jumalan kümne käsköd. Liphas kaitihe möst toižid-ki pühid kaluid (psalmad 77:61; 131:8). Kožmusen lipaz kaitihe pühäkodin kaikiš pühembas sijas.
Kožmuz. Jumal tegi kožmusen Izrail’an rahvahanke Sionmägel (2. Moisejan kirj 24). Necil kožmusel Jumal ozutab rahvahale ičeze armoid i armastust. Rahvahaspäi hänvarastab, miše se eläškandeb hänen käsköiden mödhe (psalmad 18:8; 43:18).
Letema, Tühj ma, Tühj letema, Rahvahatoi ma. Ma, kus mehed ei elägoi kaiken aigan i kus om ani vähän kazvmusid, sikš ku sigä ei ole vet (psalmad 62:1; 67:8; 77:40).
Levii. Levii oli ezitatan Jakovan poig (Psalm 134:20). Konz Hanaanan mad jagetihe Jakovan poigile, Levian jäl’gnikad, levialaižed, ei sanugoi man palad, sikš ku heid pandihe radmaha Jerusaliman pühäkodihe. Hö saiba elomišt pühäkodihe todud žertvoišpäi. Kacu Žertv.
Lira. Lira om kantelen vuitte kümnekeline jändevändim (psalmad 32:2; 42:4).
Livan. Livanaks kuctas Keskmeren randan mägisel’g Palestinan pohjoižpolel (psalmad 28:5, 6; 71:16).
Madiam. Madiamalaižed oma sanuded ičeze augotišen Avraaman heimkundaspäi, kenenno Moisei peitihe pagetes Egiptaspäi (psalm 82:10). Madiam sijazihe Akabanlahten päivnouzmpolel Aravias.
Manassii. Manassii oli Jakovan poigan Josifan vanhemb poig i hänespäi lähtnu rodun oks (psalmad 59:9; 79:3; 107:9).
Melhisedek. Melhisedek oli Moisejan kirjan mödhe Saliman pap’kunigaz. Meletadas, miše Salim oli sil sijal, kus nügüd’ om Jerusalim. Psalmoiden kirjas sanutas, miše Messia om Melhisedekan vuitte pap’kunigaz (psalm 109:4).
Messia. Messia-sana, mitte om tulnu evrejalaižiden kelespäi, i grekankeline Hristos-sana znamoičeba ”Voideltud”. Izrail’as voideltihe kunigahaks, papikš i Jumalan sanankandajikš. Kacu Voideltud.
Mir. Mir evrejalaižiden keles om šalom. Psalmoiden kirjas šalom znamoičeb sidä, miše Izrail’an rahvahal om kožmuz Jumalanke, toižiden mehidenke i ičezenke. Mirsanan znamoičendas om tervhen-ki znamoičend, hüvän elon da ozan znamoičend (psalmad 21:3; 34:27; 36:11; 37:4; 71:3; 119:6, 7).
Mirun rahvahad. Kacu Jumalad tundmatomad rahvahad. Moav. Moav sijadase Kolnudenmeren päivnouzmrandal (psalmad 59:10; 82:7).
Moisei. Moisei oli Izrail’an uskondaline i politine ohjandai, kudamb vei rahvahan Egiptaspäi ühtes Aaron-vellenke (psalmad 76:21; 89:1; 102:7).
Nimi. Nimel Biblijas om suremb znamoičend mi nügüd’. Jumalan nimel kuctas kut händast ičtaze, muga i hänen väged (psalmad 7:18; 8:2; 23:4; 62:5).
Päzutada, Päzutand, Päzutai. Psalmoiš päzutada-terminal znamoitas, miše Ižand abutab kaikele Izrail’an rahvahale, toižile rahvahile i ühtele-ki mehele sures gor’as. Päzutai – nece om mugažo iče Ižand (psalmad 3:8; 9:14, 15; 16:7; 17:3).
Pühä. Ižand Jumal om pühä. Hän om sur’, händast varaitas, hän om kaiken oiged. Hänen kädes om kaik vald (psalm 21:4). Pühän voib olda mugažo mez’ (psalm 15:10), mitte-ni kalu (psalm 77:61) vai sija (psalm 2:6), mitte om tehtud Jumalan služban täht. Psalmoiden kirjas Izrail’ om Jumalan pühä rahvaz (psalm 148:14).
Pühäkodi, Jumalankodi, Jumalan pert’. Pühäkodi-sana znamoičeb Jumalan služban sijad, kuna todihe žertvoid Jumalale. Konz izrail’aižed pördihe Egiptaspäi Hanaanmaha, heiden pitkän matkan aigan pühäkodin oli kangazpertine, miččen Moisei tegi Jumalan sanan mödhe. Levialaižed kandoiba necen kangazpertižen sirttes tahospäi tahoze. Solomon-kunigaz sauvoi ezmäižen kivižen pühäkodin Jerusalimha, Sionan mägele.
Rogomeri. Sidä mert, miččen nimi Vanhan Zavetan aigan oli Rogomeri i mittušt nimed kävutadas nügüd’-ki äjiš kändmižiš, niiden keskes vepsänkeližes kändmižes, toižiš keliš kuctas nügüd’ Rusttaks mereks. Se om merenlaht Afrikan i Aravian keskes. Moisei i Aaron veiba izrail’aižid sen poikpoli pagon aigan Egiptaspäi (2. Moisejan kirj 14:21-31; psalmad 105:7, 9, 22; 135:13, 15).
Salim. Salim om se-žo üks’, mi Jerusalim-ki (psalm 75:39).
Sinai. Sinai om mägi, miččel Ižand ozutihe Moisejale i andoi hänele kaks’ kivilaudad, mihe oli kirjutadud 10 käsköd (2. Moisejan kirj 19; 4. Moisejan kirj 10; psalm 67:9; 18).
Sion. Sionas oli vahvištoittud sija, mitte oli Davidan valdas. Möhemba Jerusaliman pühäkodin mäged kucuškatihe necil nimel (psalmad 2:6; 9:12; 13:7; 47:3).
Sirion. Sirion om Germonmägen hanaanalaine nimi (psalm 28:6).
Solomon. Solomon oli David-kunigahan poig. Hän oli Izrail’an i Judan kunigahan läz 961-922 vozid edel Hristosan sündundad (psalmad 71:1; 126:1).
Zakon, Käsk. Jumalan käsköd da zakonad – nene oliba Moisejan kal’t Izrail’an rahvahale anttud käsköd da zakonad (2. Moisejan kirj 20:1-7). Möhemba zakonoikš da käsköikš nimitadihe kaik viž Moisejan Kirjad (psalmad 1:2; 24:10; 118:1).
Žertv. Žertv oli lahj Jumalale, i sil ozutadihe hänele, miše händast pidetas korktas arvos i sadihe hänelpäi blaslovindad. Žertvan andmine Jumalale oli Vanhan Zavetan aigan paks azj. Žertv todihe pühäkodin ezitanhale. Žertv kuti ühtenzoiti Jumalan i mehen vai Jumalan i kaiken Izrail’an rahvahan. Žertvoikš Jumalale todihe lambhid, härgid i linduid, mugažo pašttud leibäd, jauhod, olivan void, vinad. Psalmoiš johtutadas äjid žertvoid: poltandžertv (19:4), söndžertv (39:7), grähkžertv (39:7), pututandžertv (39:7; 43:23), kitändžertv (55:13), johtutuzžertv (69:1), ehtžertv (140:2).
Timpan. Timpan – nece om vändim, mitte pidetas käziš i lödas sihe kädel (psalmad 67:26; 80:3).
Vauvatada. Vauvatada-verbal om vahvas nadeidas-, vahvas toivoda-znamoičend. Se ani kožub psalmoiden kel’he, sikš ku äjiš psalmoiš nägub sel’ktas vauvatandznamoičend. Uskoi mez’ vauvatab Jumalaha da Ižandaha Iisusaha, miše hö abutaba hänele elos i kaikiš holiš (psalmad 5:12; 85:2; 146:11).
Veniamin. Veniamin oli ezitatan Jakovan noremb poig (psalmad 7:1; 67:28).
Verhad rahvahad. Kacu Jumalad tundmatomad rahvahad.
Voideltud, Voidelta. Vanhan Zavetan aigan voideltihe pühävoil sidä, keda anttihe Jumalale radho. Pühävoil voideltes kuti pästtihe mehen päle kaik se, midä pidi hänele necen radon täht. Voideltud-sana ozutab mugažo voideltud kunigahaks, papikš vai Jumalan sanankandajaks. Erašti se ozutab mugažo Jumalan oigetud Päzutajan, Iisusan Hristosan (psalmad 2:2, 17:51; 104:15).
словарь