Выбрать язык
Книги Ветхого Завета
Книги Нового Завета
с русским текстомАлтарь – васта, коза путневсть Шкайти кантф озксказнетне. Жертвенник.
Аф шапама кшинь ила – ила, кона моли сисем шит и сотф евреень очижить мархта. Ня шитнень мярьгондеви ярхцамс аф шапама кшида сяпи тише мархта, коста и тусь тя илать лемоц. Аф шапама кшинь илась ётафневи кода лятфнембяль ся пингть колга, мзярда еврейхне ворьгодсть Египетста, и ашесть кенере шорямс кшинди шапакс. Праздник опресноков.
Афсатыксфтома вероз – еврейхне эсь койснон коряс пежеснон нолдафтоманкса каннесть Шкайти озксказненди афсатыксфтома вероз али сявань лефкс. Христость лемнесазь Шкаень Верозкс, сяс мес Сон максозе Эсь прянц крёз лангса куломас, и Сонь вероц валовсь сембе ломаттнень пежеснон нолдаманкса. Непорочный агнец. 2 Моис. 12:5. Ванк: .очижи
Ваймамань ши – еврейхнень ваймамань шисна ульсь ёткшиста. Недялять сисемце шиц лемневсь Шкайти, сяс покодемс тя шиня афоль мярьгондев. «Шаббат» евреень валсь ётафтови кода «ваймама». Суббота. 1 Моис. 2:2-3; 2 Моис. 16:23.
Васедемань кош – тя иняру кошть нинге фкя лемоц, кона канни смузь: «васта, коса васетькшнихть Шкайть мархта»; скиния собрания. Тяда башка «иняру кошть» нинге лемнесазь «Шкайть эряма вастоц». Ванк: иняру кош.
Ведьгемонь шинь ила – сёронь урядамань ила, кона ётафневсь Очижида меле ведьгемонь шинь ётазь. Праздник пятидесятницы.
Видексши – 1. Кда корхтамс Шкайть колга, тя валть смузец тяфтама: Шкайсь фалу сембе тевсонза тиенди видексшить коряс, виде судть коряс и максф валонц коряс.
– 2. А кда корхтамс ломаттнень колга, эста тя валть смузец тяфтама: Иисус Христос кулось ломаттнень инкса и максозе Эсь видексшинц сятненди, кит кемайхть Tейнза. Тянь вельде кемай ломанць лувови аф муворукс и видекс Шкайть сельмоса. Праведность. 1 Моис. 15:6.
Иегова – Кунардонь пингонь евреень кяльса сёрмадомста тевс нолявсть аньцек согласнай вайгялькст. Ламоц учёнайхне арьсихть: евреень валсь ЙХВХ (Сущий = Фалу Улись) кайгсь кода ЙаХВеХ – Яхве. Синць еврейхне лувсазь Шкайть тя лемонц сяшкава инярукс, нльне аф азонкшнесазь сонь. Вастозонза корхнихть Адонай, кона ётафневи кода «Азор». Тянь аф юкстаманкса евреень Библияса синь путозь Адонай валть гласнай вайгяльксонзон ЙХВХ валть согласнай вайгяльксонзон мархта (ЙеХоВаХ). И сяс аф еврейхнень ёткса ули тяфтама кой – Яхве лемть вастс корхнемс Иегова. 1 Моис. 22:14, 2 Моис. 3:14.
Иняру кош – кош, конань потмоса Израилень ломаньтналсь озонкшнесь Шкайти и каннесь Тейнза озксказнет, мзярс Соломон оцязорсь ашезь стяфта Иерусалимса Шкаень куд. Скиния. 2 Моис. 25:9.
Иняруда иняру васта – тя иняру кошть пяльксоц. Иняру кошсь ащесь кафта пяльксста. Ингольдень пяльксонц лемоц ульсь «Иняру васта», и потмоннеть – «Иняруда иняру васта». Ня пяльксне явфневсть фкяфкянь эзда котфонь перяфксса (завесой). Святое Святых. 2 Моис. 26:33.
Кой (Моисеень коец) – Шкайть коец, кона максфоль евреень ломаньтналти. Койкс еврейхне лувондсазь Моисеень вельде максф кемонь ко-шардомвалхнень али Моисеень вете книганзон. Койсь няфнесы, кода-ма Шкайть мялец евреень ломаньтналть колга и кода евреень ломаньтналти эряви эрямс. Закон, закон Моисеев.
Левиеннетне – нят Левиень уноконь-уноконза. Шкайсь кочказе Левиень юромонц покодемс Шкаень кудса. Шкаень кудса озксвятикс ульсть аньцек сят, кит лиссть Левиень юромста и Аарононь тналста. Сембе лиятне, кит ульсть Левиень юромста, но лия тналста, лезнесть озксвятихненди.
Марнек плхтамань озксказне – тя тяфтама озксказне, кона эрявсь марнек плхтамс алтарь лангса; жертва всесожжения.
Очижи – тя шиня еврейхне тяштькснесазь Египетонь урешиста мянемаснон и ярхцамбяленди аноклакшнихть очижинь вероз. Христиаттне тя шить сотнесазь Иисусонь, Шкаень Верозть, маятаманц, куломанц и вельмаманц мархта. Пасха. 2 Моис. 12:11; Од Сотксса (в Новом Завете) Иоаннон коряс Евангелияса (1:29) сёрматф: «Омбоце шиня Иоанн няезе ширезонза сай Иисусть и корхтай: «Вов Шкаень Верозсь, кона сявсы Эсь лангозонза сембе масторлангонь пежеть! ...» Ванк: афсатыксфтома вероз.
Пророк – тя ломань, кона пачфнесыне Шкайть эзда максф валхнень ломаттненди.
Соткс – максф вал вельде кинь-бди мархта сотовома. Кепотьксонди, рьвяямань соткс. Сотксонь тиемста эрявихть кафта ширет, конатненди эряви фкя-фкянь инголе пяшкотькшнемс сотксонь ладямста максф валснон. Союз, завет, договор. Сёрматфксса соткссь, конань Шкайсь ладязе ломаттнень мархта, путневи васенце вастти, сяс мес сон кемоста сотф ломаттнень идемаснон мархта. Сембонь Кирди Шкайсь венепнесы Эсь лезды кяденц ломаттненди. Соткссь, конань Шкайсь ладязе Израильть мархта Моисеень вельде, лемневи ташта сотксокс. Эста Израильсь макссь Шкайти вал улемс кулхцондыкс Тейнза, надиямс Сонь лангозонза и кирдемс Сонь пара лувксса. Кда синь тиендезь тянь, эста Шкайсь ванфнезень синь. А кда синь ашезь тиенде тянь, Шкайсь наказакшнезень синь и тянь вельде мрдафнезень виде ки лангс. Од соткстьтиеманц колга лама корхтасть пророкне. Кода содаф, Иисус Христость куломанц и кулофста вельмаманц вельде Шкайсь ладясь од соткс ломаттнень мархта, и кемокстазе тянь Иисусонь версонза. Од сотксса Шкайсь нолнесыне минь пеженьконь и макссесы тейнек Эсь Иняру Ваймопожфонц. Тянь вельде минь ули мяленьке и виеньке кулхцондомс Шкайть. Ветхий завет, Новый завет. 1 Моис. 9:9; 15:18; 17:1-8; 2 Моис. 24:1-8.
словарь БИБЛИЯНЬ ВАЛКС (УШЕДОМАСЬ И ЛИСЕМАСЬ)