Выбрать язык
Книги Ветхого Завета
Книги Нового Завета
с русским текстом1Левиень юромста фкя алясь сявсь эстейнза рьвя сяка юромста.2Рьвац пекиясь и шачфтсь цёра. Тядясь, няемок, цёраняц пяк мазы, кяшендезе сонь колма кофт.3Но мзярда ашель ни кода кяшендемс идть, сон сявсь нюдиень кептерь, вадендезе сонь пичевайса и кяшеса и, путомок потмозонза идть, кадозе кептерть Нилть трвас, нюдихнень ёткс.4А идть сазороц ичкозде ванондсь мельганза, мезе лиси идть мархта.
5Фараонть стирец лиссь ляйти эшеляма, а тейнза покоди стирьхне якасть ляйть трвава. Сон няйсь кептерь нюдихнень ёткста и кучезе покоди стирть кандомс кептерть.6Кептерть панжемста сон няйсь ёмла идь, цёраня, кона авардсь, и тейнза ужялькс арась идсь, и сон мярьгсь: «Тя еврейхнень идьснон эзда».7Эста идть сазороц мярьгсь фараонть стиренцты: «Мяльце тердян потяфты евреень ава, кона андсы-касфтсы тейть тя идть?»8Фараонть стирец мярьгсь: «Архт». Стирсь мольсь и тердезе идть тядянц.9Фараонть стирец мярьгсь тядяти: «Сявк тя идть и антк-касфтк сонь тейне. Тянкса мон пандан тейть». Авась сявозе идть и аннезе сонь.10Мзярда идсь кассь, авась вятезе сонь фараонть стиренцты, и сон ульсь тейнза цёра вастс. Фараонть стирец лемдезе сонь Моисейкс*а, мярьгомок: «Мон таргайне сонь ведьста».
11Лама пингонь ётазь, мзярда Моисей ни кассь, лиссь тяфта: сон мольсь эсь юромонь ломанензонды, Израилень ломаньтналти, и няезе синь стака покодемаснон. Сон няезе, кода Египетонь алясь пикссесы фкя еврейть, юромстонза ломанть.12Эста Моисей варжакстсь перьфпяльге, и няемок – кивок аш, шавозе египтянинть, а ловажанц калмазе шуварть потмос.13Омбоце шиня сон тага лиссь и няезе: кафта еврейхть тюрихть фкя-фкянь мархта. Сон мярьгсь обжайти: «Мезенди тон пикссесак эсь юромонь ломанцень?»14Ся мярьгсь каршезонза: «Кие путонзе тонь азоркс и судьякс минь лангсонк? Али моньге ёрасамак шавомс, кода шавить Египетонь ломанть?» Моисей эводсь и мярьгсь эсь пачканза: «Улема, панжевсь ся, мезе тиень».
15Мзярда тя кулясь пачкодсь фараонть пилес, сон ёразе шавомс Моисеень. Но Моисей ворьгодсь эздонза и кармась эряма Мадиамонь модаса. Тоса сон озась эши ваксс.16Мадиамонь озксвятить ульсть сисем стиренза. Синь састь, амолдасть ведь и пяшкодезь симдемань очкнень: мяльсноль симдемс аляснон учанзон.17Но састь учань ваныхть и панезь синь. Эста Моисей стясь, арась стирьхнень ширес и симдезень учаснон.18Мзярда стирьхне састь Рагуилонди, аляснонды, сон кизефтезень: «Мес тячи тяшкава курок мрдаде?».19Синь мярьгсть: «Кати-кодама египтянин идемазь учань ваныхнень эзда, и мянь амолдась тейнек ведь, и симдезень учаньконь».20Сон мярьгсь стирензонды: «А коса сон, мес кадость сонь? Тердесть, катк сай мархтонк ярхцама».21Моисей лувозе цебярькс лядомс тя ломанть пяли, и Рагуил максозе тейнза рьвакс эсь Сепфора стиренц.22Сон шачфтсь цёра, и Моисей лемдезе сонь Гирсамкс, мярьгомок: «Тяни мон ширде сафан лиятнень модасост».
23Ётась лама пингта. Кулось Египетонь оцязорсь, но Израилень ломаттне стаки куфцесть пяк стака покодемать эзда. Синь апак лотксек юватькшнесть, анасть лезкс, и синь ювадемань вайгяльсна пачкодсть Шкайти.24Шкайсь кулезе синь седиень сярятьфснон и лятфтазе ся сотксть, конань ладязе Авраамонь, Исааконь и Иаковонь мархта.25Шкайсь варжакстсь Израилень ломаньтналть лангс и марязе синь стакашиснон.
*а 2:10 Моисей лемсь лятфнесы евреень валть, конань смузец «таргамс (ведьста)».
Глава 2