Выбрать язык
Книги Ветхого Завета
Книги Нового Завета
с русским текстом1Тяда меле Азорсь мярьгсь Моисеенди и Аарононди Египетонь масторса:2«Катк тя ковсь*а ули тейнть васень ковкс сембе кофнень ёткста, кизоти ушетксокс.3Азость Израилень ломаньтналть сембе пуромксонцты: тя ковть кемонце шистонза катк эрь кудазорсь сяви эстейнза и кудэряензонды фкя вероз, фкя вероз сембе кудонц лангс.4А кда кудэряйдонза аф лама и тейст аф сивови верозсь, эста катк сявсы верозть маласа эряй шабранц мархта марса. И катк сявсы мяльс сянь, мзяронь ломань эряй кудсост и мзяра эрь ломанти сивови тя верозть эзда.5Верозсь улеза афсатыксфтома, атяверозкс и фкя кизоннекс. Сявость сонь учатнень али сяватнень эзда.6Ванфтость сонь тя ковть кемнилиеце шинц самс, а меле эрь кудазорсь, Израилень ломаньтналть пуромксстонза, катк печксы верозонц илядень шобдаса.7Катк сявихть сонь веронц эзда и ся верса вадьсазь кафцьке кенкш касякнень и кенкш прять ся куттнень эса, коса кармайхть ярхцама верозда.8Верозть сиволец эряви сивомс сяка веня, толса рястафста, сяпи тише и аф шапама кши*б мархта.9Тяда ярхца эздонза верокста али ведьса пидефста, но марнек рястасть сонь тол лангса: прянек, пильгонек, потмасюлонек.10Тяда кадонда эздонза шобдавати мезевок, а сянь, мезе ляды верозть эзда шобдавать самс, плхтасть толса.11Ярхцада эздонза тяфта: катк перьфонте улихть карксафт, каренте улихть пильгсонт и байдеконте – кядьсонт. Ярхцада эздонза эрязста: тя Азорть Очижиц.12А Мон ся веня ётан Египетонь масторга и кулофтса эрь васень шачфть Египетонь масторса, ломаттнень цёрашабаснон эзда сявомок и жуватань атялефкснень самс, и Египетонь сембе шкайхнень лангса тиян суд. Мон Азорсь.13Версь ули тяштьксокс куттнень лангса, коса тинь ульхтяда. Верть няемста Мон ётан вакскант, и куломась аф токатядязь тинь, мзярда Мон кучан тяфтама кальдяв Египетонь масторть лангс.14Катк тя шись ули тейнть лятфнемшикс. Ётафнеда тя шиня Азорти ила юромста юромс молезь. Тя пефтома пингонь ладяфкс.15Сисем шит ярхцада аф шапама кшида. Васенце шистокиге урядасть кудстонт шапафтомать, сяс мес эрсь, кие васенце шиста сявомок сисемце шить самс ярхцай кшида, кона ичф шапафтома лангса, ся ули паньф Израильста.16Васенце шиста кочкада иняру пуромкс, и сисемце шистовок кочкада иняру пуромкс: ня шитнень аф мярьгондеви тиендемс кодамок тев, ярхцамбялень анокламда башка. Аньцек тянь мярьгондеви тиендемс тейнть.17Ётафнесть аф шапама кшинь илать, сяс мес самай тя шиня Мон лихтедязь тинь, кода ушмовий, Египетонь масторста. Юромста юромс молезь ётафнесть тя шить, – тя пефтома пингонь ладяфкс.18Ярхцада аф шапама кшида васенце ковть кемнилиеце шинц илядьстонза и сяка ковть комсь васенце шинц иляденц самс.19Сисем шит тяза уле кудсонт шапафтома, сяс мес ся, кие кармай ярхцама кшида, кона ичф шапафтома лангса, ули паньф Израилень ломаньтналть пуромксстонза, аф ваномок, сон ширде саф ломань али шачф тя масторса.20Тяда ярхца мезьдовок, мезсь ичф шапафтомаса. Коса тинь афоледе уле, ярхцада аф шапама кшида».
21Моисей тердезень сембе Израилень оцюнятнень и мярьгсь тейст: «Моледа и кочкада вероз, эрсь кудсонза эряензонды, и печкода очижинь озксказне.22Меле сявода иссоп тишень пусма и начфтость сонь верса, кона кочкаф шавас. Вадесть верса кенкш прять и кафцьке кенкш касякнень. И катк кивок эздонт аф лисенди кудстонза шобдавать самс,23сяс мес Азорсь моли Египетть машфтома. Мзярда Сон няйсы верса ватьф кенкш прять и кафцьке кенкш касякнень, эста Сон ётай ня кенкшнень вакска и аф максы машфтыти сувамс кудозонт и шавомс тинь.24Ванфнесть тянь кода кой, кона максф тейнть и тинь юромонь поладыентенди пефтома пингс.25Мзярда суватада ся модати, конань Азорсь макссы тейнть, кода Сон и корхнесь, пяшкотькшнесть тя обуцять.26Мзярда тинь иденте мярьгихть тейнть: "Кодама тя обуцять смузец?",27азость: "Тя очижинь озксказне Азорти, кона ётась Израилень ломаттнень кудснон вакска Египетса. Сон шавондозень Египетонь ломаттнень, а минь кудоньконь мянтьфтезень куломада"». Эста ломаньтналсь комафтозе шаманц модати и сюконясь Шкайти.28Израилень ломаньтналсь мольсь и тись стане, кода Азорсь мярьгсь Моисеенди и Аарононди.
29Пялевеста Азорсь шавозень сембе васень шачф цёратнень Египетонь масторса, оцязорондай фараонть васень шачф цёранц эзда сявомок и пякстамгудса ащить васень шачф цёранц самс, и кудонь жувататнень эзда сембе васень шачф атялефкснень.30Фараонць, сембе сонь покодиенза и Египетонь сембе ломаттне сргозсть веть, и Египетонь масторть келес кеподсь оцю авардема, сяс мес ашель куд, коса афоль уле кулоф ломань.31Фараонць веть тердезень Моисеень и Аарононь и мярьгсь: «Туда монь ломаньтналозень ёткста, тинь и Израилень ломаньтналсь. Арда сюконяда Азорти, кода и корхнеде.32Сявость мархтонт учантень, сявантень, траксонтень и букантень, кода и корхнеде. Моледа и бславамасть моньге».33Египетонь ломаттне эряскофтозь Израилень ломаньтналть, сяда курокста тульхть ся масторста, сяс мес египтяттне корхнесть: «Афток минь сембе кулотама».
34Израилень ломаттне сявозь шапаксснон, конанди нинге ашесть кая шапафтома. Эрсь ашкодозе шапаксонь шаванц нула потмос и кандозе лафтубрясонза.35Израилень ломаттне тисть Моисеень валонц коряс, синь анасть египтяттнень кядьста сиянь и зрнянь паршихть и щапт,36и Азорсь ладязень Египетонь ломаттнень седиснон кельгозь Эсь ломаньтналонцты, и синь максозь тейст сянь, мезе сят анасть кядьстост. Тяфта синь сявозь Египетонь ломаттнень паршиснон.
37Израилень ломаттне тусть Раамсесста Сокхофу. Эздост ульсь кота сятт тёжянть малава ялга моли аля, аф лувомок аватнень и шабатнень.38Тяфта жа мархтост лиссть ламоц лия тналонь ломаттне, учатне и сяватне, траксне и букатне, пяк оцю стада.39Ломаньтналсь пидесь аф шапама кшинят ся шапаксста, конань синь лихтезь мархтост Египетста. Шапакссь ашезь кенере кеподемс, сяс мес синь ульсть эрязста паньфт Египетста. Синь ашель пингсна анокламс ки лангс ярхцамбяль.
40Израилень ломаттне эрясть Египетса сембоц ниле сятт колмогемонь киза.41Самай ся шиня, ниле сятт колмогемонь кизоть ётамста, Израилень ломаньтналсь, кода Азоронь ушмовий, веньгучкать лиссь Египетонь масторста.42Ся весь Азорти ульсь ванфтомань векс, сяс мес ся веня Сон лихтезень Израилень ломаттнень Египетонь масторста. И сяс юромста-юромс молезь сембе Израилень ломаттне ванфнесазь тя веть Азорть лемонц шнаманкса.
43Азорсь мярьгсь Моисеенди и Аарононди: «Вагот ладяфксне очижинь верозть ярхцаманц колга: лия тналонь ломанти аф мярьгондеви ярхцамс эздонза,44а эрь урети, кона рамаф сиянь ярмак лангс, киськопенц керфтомда меле мярьгондеви ярхцамс эздонза.45Ширде саф ломанти и сивотьф покодити аф мярьгондеви ярхцамс очижинь верозть эзда.46Верозсь сивома сяка кудса, коса сон аноклафоль, сиволец аф лихнема кудста; и тясть синнекшне сонь пакарензон.47Израилень ломаньтналть сембе пуромксонцты эряви ётафтомс Очижинь ила.48Кда тонь модазт сай эряма лия тналонь ломань, и сонь кармай мялец ётафтомс Очижинь ила Азорти, эста тейнза эряви керфтомс кудсонза эряй сембе цёратнень-алятнень киськопесна. Тяда меле тейнза мярьгондеви ётафтомс Очижинь ила, и сон ули кода тинь масторсонт шачф ломань. Но аф керфти аф мярьгондеви ярхцамс очижинь верозть эзда.49Катк фкя кой ули тя масторса шачфтиге и лия ломаньтналоннетиге, кона сась эряма ёткозонт».
50Сембе Израилень ломаньтналсь тись стане, кода Азорсь мярьгсь Моисеенди и Аарононди.51Самай ся шиня Азорсь лихтезе Израилень ломаньтналть, кода ушмовий, Египетонь масторста.
*а 12:2 Тя ковсь – Авив. Евреень кяльста «авив» валсь ётафневи кода «сёрапря». Сон тяфта лемтьф, сяс мес тя ковня кшись ушеткшнесь сёропрянь каяма.
*б 12:8 аф шапама кши – тя кши, конань эса аш шапафтома; бесквасной хлеб
Глава 12