Выбрать язык
Книги Ветхого Завета
Книги Нового Завета
с русским текстом1Мзярда Аврамонди ульсь вейхксогемонь вейхкса киза, Азорсь эвондась тейнза и мярьгсь: «Мон Сембонь Кирди Шкайсь. Якак Монь инголен и ульхть афсатыксфтомокс.2Мон ладяса тонь мархтот Эсь сотксозень, и пяк ламолгофтте тонь».3Эста Аврам прась шаманц лангс. Шкайсь поладозе корхтаманц мархтонза, мярьгомок:4«Вага Монь сотксозе тонь мархтот: тон улят алякс ламоц ломаньтналхненди.5Тяни тонь лемце кармай ни аф Аврам*б, но Авраам*в, сяс мес Мон тихтя тонь алякс ламоц ломаньтналхненди.6Мон максан тейть пяк лама идьта: тонь эздот лисихть ломаньтналхт и шачихть оцязорхт.7Мон ладяса сотксозень Эсь мархтон и тонь мархтот, и тонь юромонь поладыхнень мархта, юромста юромс молезь. Тя соткссь кармай кирдема пефтома пингс: Мон улян Шкайкс тейть и тонь юромонь поладыхненди.8Мон пефтома пингс максса тейть и тонь юромонь поладыхненди сембе Ханаанонь модать, ся модать, конань лангса тон эрят кода ширде саф ломань. И Мон улян тейст Шкайкс».
9Шкайсь мярьгсь Авраамонди: «Но тейть эряви ванфтомс Монь сотксозень, тейть и тонь юромонь поладыхненди, юромста юромс молезь.10Вага Монь сотксозе, кона ладяф Монь мархтон, тонь мархтот и тонь юромонь поладыхнень мархта, ванфнесть сонь: тиеда киськопень керома сембе алянтенди и сембе цёранянтенди.11Тифтеда киськопень керома эсь киськопезонт: и тя кармай няфнемонза ся сотксть, конань Мон ладяйне Эсь мархтон и тинь мархтонт.12Юромста юромс молезь тейнть эряви керфнемс сембе кафкса шинь цёранятнень; керфтомат сят, конат шачсть кудботмосонт, и сятневок, конат аф тинь юромстонт, но ярмак лангс рамафт лия тналоннетнеть кядьста.13Катк ули керф тонь кудсот шачфське и ярмак лангс рамафське. Тянь вельде соткссь, кона пефтома пингс ладяф Монь мархтон, ули няфтьф тинь ронгонтень лангса.14А ся алять, конань киськопец аф ули керф, панесть эсь ломаньтналстонт, сяс мес сон колазе Монь мархтон сотксть».
15Шкайсь мярьгсь Авраамонди: «Рьвяцень Сарань оду ни тяк лемне Саракс, но тяни сонь лемоц ули Сарра.16Мон бславаса сонь и максан тейть эздонза цёра. Мон бславаса Саррань и эздонза шачихть ломаньтналхт, ломаньтналхнень оцязорсна лисихть эздонза».17Авраам прась шаманц лангс и пеедезевсь, сяс мес потмова арьсесь: «Дяряй сяда кизонь атять эзда шачеви шаба? И Сарра, конань вейхксогемонь кизоц, кода шачфты?»18И Авраам мярьгсь Шкайти: «Хуш Измаил улель шиса и бславаф Тонь инголет!»19Но Шкайсь мярьгсь: «Аф, Сарра рьвяце шачфты тейть цёра, и тон лемдьсак сонь Исаакокс*г. Мон ладяса сонь мархтонза Эсь сотксозень, кона кармай улема пефтома пингонь сотксокс сонь юромонь поладыензонды, конат сайхть мельганза.20Мон кулине тонь эняльдемацень Измаилоньге колга: Мон бславаса сонь и максан тейнза лама идь, и пяк-пяк ламолгофтса сонь. Сонь эздонза шачи кемгафтува оцюня и Мон тиян сонь эздонза оцю ломаньтнал.21Но Эсь сотксозень Мон ладяса Исааконь мархта, конань Сарра шачфтсы тейть сай кизоть тяка пингть».22Семботь тянь азомда меле Шкайсь кеподсь Авраамонь эзда.
23Авраам сявозе Измаил цёранц, эсь кудсонза сембе шачфнень и сембонь, кит рамафт ярмак лангс, сембе алятнень и цёратнень Авраамонь кудста, и керфтозень синь киськопеснон сяка шиня, кода Шкайсь и мярьгсь тейнза.24Авраамонди ульсь вейхксогемонь вейхкса киза, мзярда керфоль сонь киськопец.25А Измаилонди, сонь цёранцты, ульсь кемголмува киза, мзярда керфоль сонь киськопец.26Фкя сяка шиня керфтольхть Авраам и Измаил цёрац,27и сембе алятне и цёратне Авраамонь кудста, сят, конат шачемстокиге эрясть кудсонза, и сятка, конат рамафтольхть ярмак лангс лия тналоннетнень кядьста.
*а 17:0 киськопень керфтома – обрезание
*б 17:5 Аврам лемть смузец евреень кяльса «пара лувксс путневи аляньке».
*в 17:5 Авраам лемть смузец евреень кяльса «ламотнень алясна».
*г 17:19 Исаак лемть смузец – «сон пееди».
Глава 17