Выбрать язык
Книги Ветхого Завета
Книги Нового Завета
с русским текстом1Израилень ломаньтналть пуромксоц поладозе кинц Елимста, и омбоце ковть кеветиеце шистонза Египетста лисемдост меле, синь сембе састь Син шавмодав, кона Елимть и Синайть ёткса.2Шавмодаса Израилень ломаньтналть сембе пуромксоц кармась изгордома Моисеень и Аарононь лангс.3Израилень ломаттне мярьгсть тейст: «Вай, тейнек сяда пара улель куломс Азорть кядьтонза Египетонь масторса. Тоса минь озафтолеме сиволень пачкалкнень инголе и топодемс ярхцаме кшида! А тинь вятемасть минь тя шавмодав, сяс мес ёратада вачашиса машфтомс Израилень ломаньтналть сембе пуромксонц».4Эста Азорсь мярьгсь Моисеенди: «Ватт, Мон пиземкс прафтан тейнть кши менельста. Катк ломаттне эрь шиня лисендихть и кочксихть кши, мзяра тейст эряви фкя шинди. Тяфта Мон варжасайне синь, кармайхть пяшкотькшнемост Монь кошардоманень, али аф.5А недялять котоце шистонза катк кочкайхть кафксть сяда лама лия шитнень коряс и аноклайхть эздонза ярхцамбяль кафта шинди».
6Моисей и Аарон мярьгсть Израилень ломаньтналть сембе пуромксонцты: «Илять тинь содасасть: Азорсь лихтедязь тинь Египетонь масторста,7и шобдава няйсасть Азорть иневалдонц, сяс мес Сон кулезе тинь изгордомантень лангозонза. Китама минь, мес изгорттада лангозонк?»8Моисей мярьгсь: «Илять Азорсь максы тейнть ярхцамбяленди сиволь, и шобдава – топодемозонт кши. Азорсь кулезе тинь изгордомантень, конань тинь кеподесть Сонь каршезонза. А минь китама? Тинь изгордоманте аф лангозонк, а Азорть лангс».
9Сямольде Моисей мярьгсь Аарононди: «Азк Израилень ломаньтналть сембе пуромксонцты: "Стяда Азорть шамаликонц инголи, сяс мес Сон кулезе тинь изгордомантень"».10Мзярда Аарон корхтась Израилень ломаньтналть сембе пуромксонцты, эста синь варжакстсть шавмодать шири, и, вага, Азорть иневалдоц эвондась коволса.
11Азорсь мярьгсь Моисеенди:12«Мон кулине Израилень ломаньтналть изгордоманц. Азк тейст: "Илять карматада ярхцама сивольда, а шобдава топафтсасть пеконтень кшиса – и содасасть: Мон Азорсь, тинь Шкаенте"».
13Илять лийкстасть ёрхт*а и вельхтязь сембе ся вастть, коса Израилень ломаттне стяфтозь кошснон. Шобдава ся вастть перьфпялец ульсь раса ведьса.14Ведьбутерькснень коськомда меле, няезь, шавмодась вельхтявсь кати-мезьса ямкскянь лаца ёмланяса, и шуваняняса, кода леш*б модать лангса.15Тянь няемста Израилень ломаттне кизефнесть фкя-фкянь: «Мезе тя?» Сяс мес ашезь сода, мезе ся. Моисей мярьгсь тейст: «Тя кши, конань Азорсь максозе тейнть ярхцамбяленди.16Вага кодама кошардома макссь Азорсь: Кочксесть сонь, эрсь сняронь, мзяра тейнза сивови; кочкседа гомор*в мера эрь ломанти, кошсонт эряй ломаттнень лувксснон коряс».17Израилень ломаньтналсь тись тяфта, и кочкасть, кие лама, кие кржа.18Мзярда синь ункснезь кочкафть гоморса, сянь, кие лама кочкась, ашель вельфоц, а кие кржа кочкась, сянь ашель афсатыксоц: эрсь кочкась сняра, мзяра тейнза эрявсь.19Моисей мярьгсь тейст: «Катк кивок аф кады эздонза мезевок шобдавати».20Но синь ашезь кулхцонда Моисеень, и кой-конат кадсть сянь эзда шобдавать самс, – и эсонза эвондасть сукст, и тусь аеркс шине. Эста Моисей лаказевсь кяжса лангозост.21Израилень ломаттне кочксезь сянь варьхмодемшовор, эрсь сняронь, мзяра тейнза сивови. Мзярда шись ушеткшнесь пидема, тя кшись солсесь.
22Котоце шиня Израилень ломаттне кочкасть кшида кафксть сяда лама, кафтонь гомор мера эрь ломанть лангс. Израилень пуромксть сембе оцюнянза састь и пачфтезь тянь Моисеенди.23Моисей мярьгсь тейст: «Вага мезе азсь Азорсь: Ванды ваймамань ши, Азорть иняру ёткшиц. Мезе панема пянакудса, панесть, и мезе эряви пидемс, пидесть тячи, а мезсь аф сивови, урядасть шири и ванфтость шобдавать самс».24Кода Моисей и мярьгсь, Израилень ломаттне урядазь шобдавать самс сянь, мезсь ашезь сивов, и сон ашезь шиния, и сукстка ашесть эвонда эсонза.25Моисей мярьгсь: «Сивость тянь тячи, сяс мес тячи Азорть ваймамань шиц. Тячи тинь аф мусасть сонь паксяса.26Кота шит кочксесть сонь, а сисемце шиня – ваймамань ши. Ся шиня тинь аф мусасть сонь».27Но кой-конат ломаньтналста сяка тусть кочкамонза сонь сисемце шиня; и мезевок ашесть му.
28Эста Азорсь мярьгсь Моисеенди: «Ламос тинь карматада колсемост Монь кошардоманень и койнень?29Ванода, Азорсь макссь тейнть ваймамань ши, сяс котоце шиня Сон кшивок макссь кафта шинди. Сисемце шиня эрти лядома эсь вастсонза, коса эряй, кивок тяза лисенде кудстонза».30И сисемце шиня ломаньтналсь ваймосесь.
31Израилень ломаттне лемдезь ся кшить маннакс. Сон ульсь акша, кода кориандоронь видьме, а таньфс коря, кода медень цюкор.32Моисей мярьгсь: «Вага кодама кошаркс макссь Азорсь: "Сявода фкя гомор манна и ванфнесть сонь юромста юромс молезь, катк сай пингонь юромонте няйсазь кшить, кодамса Мон аннедязь тинь шавмодаса, мзярда лихтедязь Египетонь масторста"».33Моисей мярьгсь Аарононди: «Сяфть кукшень, марак эзонза фкя пяшксе гомор манна и путк сонь Азорть инголи, катк ванфневи юромста юромс молезь».34И Аарон тись стане, кода Азорсь мярьгсь Моисеенди, путозе ванфтомс манна мархта кукшенть сотксонь арзять*г инголи.
35Израилень ломаньтналсь ярхцсесь маннада нильгемонь киза, мзярс ашезь пачкоде ся модав, коса эрясть ломатть. Синь ярхцсесть маннада, мзярс ашесть пачкоде Ханаанонь модать видес.36Гоморсь – тя ефать*д кемонце пяльксоц.
*а 16:13 ёр – перепел; паксянь ёмла нармонь, кона шарксты сараскянди
*б 16:14 леш, лешафкс – иней
*в 16:16 гомор – почфонь али ямксонь ункстамс мера, конань эса 2,4 литрашка
*г 16:34 Сотксонь арзя – тя арзя, конань эса ванфневсть Коень кошардоматнень мархта кевонь седяфне, конат лятфнесть Шкайть и Израилень ломаньтналть ёткса сотксонь ладямать колга; ковчег свидетельства, ковчег завета.
*д 16:36 ефа – почфонь али ямксонь ункстамс мера, конань эса 22 литра
Глава 16