Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди:2«Азк Израилень ломаньтналти, катк синь кандыхть Тейне озксказнет. Сявондеда Тейне озксказнет эрть кядьста, кинь седисонза ули максомс.
3Вага кодама озксказнет сявондеда кядьстост: зрня, сия, сере*а,4валда-сенем, якстерь и шобда-якстерь понань сюре, шуваня иляназ, сявань пона,5якстерь тюсса архтф боранонь кетть, сенем кетть, акация шуфтт,6вай валдоптоматненди, танцти шине надобият вадемань вайти и качафтоманди,7оникс кефт и лия питни кефт, вельдест мазоптсасть ингольксть*б и мяштелангаксть*в.8Катк синь тиихть Тейне иняру васта, и Мон карман эряма ётксост.9Тиесть иняру кошть, Монь эряма вастозень, и семботь сянь, мезе кармай потмосонза, ся кепотьксть коряс, конань Мон няфтьса тейть».
10«Тиеда арзя акация шуфтста: катк кувалмоц ули кафта пяле мархта кенерь, келец фкя пяле мархта кенерь, и серец фкя пяле мархта кенерь.11Вельхтяк ару зрняса потмонцка, лангонцка; и арзять перьфке тик зрнянь каеркс*г.12Тик арзяти зрнянь ниле суркст и кемокстайть синь арзять алдонь ниле ужензон лангса: кафта суркст фкя боксонза и кафта – омбоцеса.13Тик олкт акация шуфтста и вельхтяйть синь зрняса.14Тонгить олкнень суркснень потмос, конат ащихть арзять кафта бокованза, вельдест кармайхть каннемонза арзять.15Олкненди фалу улема арзянь суркснень потмоса, синь аф лихнемат тоста.16Путыть арзяв сотксонь няфти кевонь седяфнень, конатнень Мон макссайне тейть.17Тик ару зрняста пежень нолдама вельхкс*д, катк кувалмоц ули кафта пяле мархта кенерь, а келец фкя пяле мархта кенерь.18Зрняста чакак-шафт кафта херувипт-ангелхт и стяфтыть синь пежень нолдама вельхксть кафта пензон лангс.19Васенце херувимть-ангелть тик вельхксть фкя пезонза, а омбоцеть – вельхксть омба пезонза. Тейст улема вельхксть мархта фкя марстонь тифксокс.20Катк херувипнень-ангелхнень пацясна улихть келептьфт вяри ванозь и эсь мархтост вельхнесазь вельхксть лангонц. Херувипнень-ангелхнень шамасна катк улихть карань-каршект фкя-фкянди и ваныхть вельхксть лангс.21Путк вельхксть арзять лангс, а арзяв путыть сотксонь няфти кевонь седяфнень, конатнень Мон макссайне тейть.22Арзять ваксса Мон карман васетькшнема мархтот, и пежень нолдама вельхксть эзда, кафта херувипнень-ангелхнень ёткста, конат ащихть сотксонь арзять лангса, Мон азсайне тейть сембе ся кошардоматнень, конатнень тонь вельдет Мон макссайне Израилень ломаньтналти».
23«Тик шра акация шуфтста. Катк сонь кувалмоц ули кафта кенерьхть, келец – фкя кенерь и серец – фкя пяле мархта кенерь.24Вельхтяк сонь ару зрняса и перьфканза тик зрнянь каеркс.25Шрать крайганза тик кядьлапшень сереса перяфкскя, и перяфкскять ланга нолдак зрнянь каеркс.26Тик шрати ниле зрнянь суркст и кемокстайть синь шрать ниле ужеванза, пильгонятнень лангса.27Катк сурксне улихть перяфкскять ала. Эзост кармайхть тонгондовома олкне, конатнень вельде кандови шрась.28Тик олкт акация шуфтста, и вельхтяйть синь зрняса. Синь вельдест кармайхть каннемонза тя шрать.29Тик шрати шават и качафтомань кядьгот, кукшетть и карьхкат, конатнень вельде карматада кайсема озксказнень вина. Сембе синь тиемат ару зрняста.30Путнек иняру кшит Монь инголен шрать лангс, и катк синь фалу улихть лангсонза».
31«Тик валдоптомань кирдема. Валдоптомань кирдемась марнек чакама-шавома ару зрняста. Катк сонь алксоц, пильгоц, панчфонь кукшеннянза, панчф цильхконянза и лопанянза улихть фкя тифксокс мархтонза.32Катк кота таратт лисендихть сонь эздонза: колма таратт валдоптомань кирдемать фкя бокстонза и колма таратт валдоптомань кирдемать омба бокстонза.33Васень таратть лангса катк улихть колма панчфонь кукшеннят, конат шаркстыхть миндалень панчфкятнень лангс, панчф цильхконят и лопанят, и омба боконь тарадсонга катк улихть колма панчфонь кукшеннят, конат шаркстыхть миндалень панчфкятнень лангс, панчф цильхконят и лопанят. И тяфта катк ули сембе кота тараттнень лангса, конат лисендихть валдоптомань кирдемаста.34А валдоптомань кирдемать пильгонц лангса катк улихть ниле панчфонь кукшеннят, конат шаркстыхть миндалень панчфкятнень лангс, панчф цильхконят и лопанят.35Катк васень кафта тараттнень ала ули панчфонь цильхконя, омбоце кафта тараттнень ала – панчфонь цильхконя, и колмоце кафта тараттнень ала – панчфонь цильхконя. Тяфта катк ули сембе кота тараттнень ала, конат лисендихть валдоптомань кирдемаста.36Катк панчфонь цильхконятне и тараттне улихть фкя тифксокс валдоптомань кирдемать пильгонц мархта. Валдоптомань кирдемась марнек чакама-шавома ару зрняста.37Тик тейнза сисем вайтолонь валдоптомат и путыть синь стане: валдоптолезь валдоптомань кирдемать инголенц.38Палф кайтанонь*е керсемс васоньбеельхнень и палф кайтаттнень алу кядьгонятнень тяфта жа тиить ару зрняста.39Валдоптомань кирдемась и сембось, мезсь моли мархтонза, тиемат фкя талант*ж ару зрняста.40Ватт, тик семботь тянь ся кепотьксть коряс, кона няфтьфоль тейть панда пряса».
*а 25:3 сере – медь или бронза
*б 25:7 Инголькс – тя озксвятихнень вярдень нюрьхкяня щамсна, конань озксвятихне щакшнезь лангозост Шкайть иняру кошсонза покодемста; ефод.
*в 25:7 Мяштелангакс – тя мяште лангс повфневи зепе. Потмосонза кирдезь уримть и туммимть, конатнень вельде ёрясть жерьба и кизефнезь Азорть мяленц; наперсник.
*г 25:11 каеркс – кайма, окантовка
*д 25:17 Пежень нолдама вельхкс – евреень кяльса тя валсь канни смузь «вельхкс» али «васта, коса вельхневихть (али нолневихть) пежетне». Лувондовсь, тя вельхксть и зрнянь херувипнень вельхксса аф няевиста ащесь Шкайсь. Аруяфтомань шиня озксвятиень оцюнясь сувсесь иняруда иняру васту и мархтонза каннесь озксказнень вер ломаттнень пежеснон инкса. Тя верса сон валондозе арзять вельхксонц.
*е 25:38 кайтан – фитиль
*ж 25:39 34 кг маласа
Глава 25