Выбрать язык
Книги Ветхого Завета
Книги Нового Завета
с русским текстом1Шкайсь бславазе Ноень и сонь цёранзон и мярьгсь тейст: «Шачфнеда и ламолгодода, и пяшкодесть масторть.2Масторлангонь сембе жувататне, менелень сембе нармоттне, модава сембе шашнихне и оцюведень сембе калхне катк пелихть эздонт и трнатыхть инголент, сяс мес синь максфт тинь кядялонт.3Семботь, мезсь якай и эряй, Мон максса тейнть ярхцамбяленди, кода тяда инголе макссине ярхцамс тишень касыкснень.4Но тяда ярхца сивольда, конань эса ули эряфонь вайме, лиякс мярьгомс, вер.5Мон пантфтса шумоть эрть кядьста, кие валсы тинь веронтень, лиякс мярьгомс, сявсы эряфонтень. Эряфонтень инкса мон пантфтса шумоть эрь жуватать кядьстонга; пантфтса шумоть эрь ломанть кядьстонга, кона валсы мала ломаненц веронц.
6Кие валы ломанень вер,
сянь сонцень вероц валови ломанень кядьса,
сяс мес Шкайсь Эсь коряванза тиезе ломанть.
7А тинь шачфнеда и ламолгодода,
срадода масторть келес и ламолгодода лангсонза».
8Шкайсь мярьгсь Ноенди и сонь цёранзонды:9«Вага, Мон ладян соткс тинь и юромонь поладыентень мархта, конат сайхть тинь мельгант,10и эрь эряй ваймоть мархта, кона лиссь мархтонт оцю венчста: нармоттнень, кудонь и лия жувататнень мархта, лиякс мярьгомс, масторлангонь сембе жувататнень мархта.11Мон ладяса мархтонт Эсь сотксозень и максан тейнть надияфтома: шада веттне оду вестевок аф машфтсазь сембе эряйхнень, и шадось оду аф шамдсы масторть».
12Шкайсь мярьгсь: «Вага мезсь няфтьсы тя сотксть, конань Мон пефтома пингс ладяса тинь мархтонт и эрь эряй ваймоть мархта:13Мон путан атямъёнга коволхнень*а лангс, и сон кармай няфнемонза сотксть, кона ладяф Монь и масторлангса эряйхнень ёткса.14Мзярда Мон кочкасайне коволхнень модать вельхксса, и коволхнень лангса эвондай атямъёнга,15эста Монь мялезон ляди сотксозе, кона ладяф Монь и тинь мархтонт, и эрь эряй ваймоть мархта: шада веттне оду вестевок аф машфтсазь сембе эряйхнень.16Мзярда коволхнень лангса эвондай атямъёнга, Мон няйса сонь и лятфтаса пефтома пингонь сотксозень, конань Мон ладяйне масторлангса эрь эряйть мархта».17Шкайсь нинге мярьгсь Ноенди: «Вага мезсь няфтьсы тя сотксть, конань Мон ладяйне сембонь мархта, кит эряйхть масторлангса».
18Ноень цёранза, конат лиссть оцю венчста, нят: Сим, Хам и Иафет. Хам ульсь Ханаанонь аляц.19Ня колмотне ульсть Ноень цёранза. Синь эздост лиссть сембе ломаттне, конат срадсть сембе масторть келес.
20Ной кармась покодема модать лангса и озафтсь виноградонь пере.21Весть сон иредемозонза симсь винада и крхтапа мадотовсь эсь кошсонза.22Хам, Ханаанонь аляц, няемок алянц крхтапаста, лиссь ульцяв и азондозе тянь кафта брадонзонды.23Эста Сим и Иафет сявсть щапт, лаподезь лафтубрязост, потазь сувасть кошть потмос и вельхтязь аляснон крхтапа вастонзон. Шамаснон синь шарфтозь лия шири, и сяс ашезь няе аляснон крхтапаста.
24Мзярда Ной кятавгодсь и содазе, мезе тейнза тись сяда ёмла цёрац*б,25сон мярьгсь:
«Сюдоф Ханаанць.
Эсь брадонзон ширеса сон кармай мезькска аф путови урекс*в».
26Сон тага мярьгсь:
«Бславаф Азорсь, Симонь Шкаец,
а Ханаан ули тейнза урекс.
27Катк Шкайсь касфтсыне Иафетонь эряма вастонзон,
и катк сон ладязь эряй Симонь кошсонза,
а Ханаан ули тейнза урекс».
28Шадода меле Ной эрясь нинге колма сятт ведьгемонь киза.29Сембоц марс сон эрясь вейхкса сятт ведьгемонь киза, и меле кулось.
*а 9:13 ковол – облако
*б 9:24 тяса корхтави Ноень омбоце цёранц, Хамонь, колга
*в 9:25 уре – раб
Глава 9