Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 7

Иисус анды ниле тёжятть ломань

(Матф. 15:32-39)

1Сяка шитнень тага пуромкшнесь лама ломань. Синь мезьсновок ашель ярхцамс. Иисус тердезень тонафниензон и мярьгсь:2«Тейне ужяльхть ня ломаттне, колма шит ни мархтон, а тейст аш мезьда ярхцамс.3Нолдандярясайне куду вачеда, синь ки лангса лафчемихть, вдь ёткстост конат-конат састь ичкозде».4Тонафниенза каршезонза мярьгсть: «Кинди муви тяса шавмодаса сатомшка кши тняра ломанень андомс?»5Иисус кизефтезень синь: «Мзяра тинь кшидонт?» «Сисем», – азозь синь.

6Эста Иисус кошардозень ломаттнень озама модать лангс. Сявозень сисем кшитнень и, Шкайти сюконямань азомда меле, синнезень и максозень тонафниензонды явондомс. Сят явондозь кшить ломаттненди.7Синь ульсь мзярошка калнясновок. Иисус бславазень калхнень и мярьгсь явомдост синьге.8Ломаттне ярхцасть и топодсть. И лятф сускомда кочкасть сисем пяшксе кептерьхть.9Ульсь тоса нилешка тёжянь ломань.

Ломаттнень нолдамда меле10Иисус озась Эсь тонафниензон мархта венчти и уйсь Далмануфань аймакти.

Фарисейхне анайхть тяштькс Иисусонь кядьста

(Матф. 16:1-4)

11Састь фарисейхть и срхкафтсть Иисусонь мархта пялькстома. Синь вешсть Сонь кядьстонза тяштькс менельста, тяфта варчсезь Сонь виенц.12Иисус крхкаста таргазе ваймонц и мярьгсь: «Мезенди тяниень пингонь ломаттне вешендихть тяштькс? Видеста корхтан тейнть, аф максови тяштькс тяниень пингонь ломаттненди».13И кадомок фарисейхнень, Сон тага озась венчти и тусь эрьхкть тона пяли.

Фарисейхнень и Иродонь шапафтомасна

(Матф. 16:5-12)

14Тонафниенза юкстасть сявомс мархтост кши, и венчсост фкя кшида башка оду кшисна ашель.15Иисус мярьгсь тейст: «Ванода, ванфтода пря фарисейхнень шапафтомадост и Иродонь шапафтомада».16Тонафниенза корхтасть эсь ётковаст: «Сон тяфта мярьгсь сяс, мес аш кшиньке».17Иисус шарьхкодезе, мезень колга синь корхтайхть, кизефтезень: «Мес корхтатада: аш кшинте? Кали нинге аф няйхтяда и аф шарьхкоттяда? Кали нинге тнярс калгода седиенте?18Сельмонте улихть, дяряй аф няйхтяда? Пиленте улихть, дяряй аф кульхтяда? Афи мяляфтсасть:19мзярда Мон вете кшитнень синнине вете тёжянь алянди, мзяра кептерь пяшкодеде сускомса?» «Кемгафтува», – мярьгсть синь каршезонза.20«А мзярда синнень сисем кшит ниле тёжянь ломаненди, мзяра пяшксе кептерь суском тинь кочкаде?» «Сисем», – мярьгсть синь.21Эста Сон кизефтезень: «Мес мле тянемс нинге аф шарьхкодьсасть?»

Иисус пчкафтсы сокор алять Вифсаидаса

22Иисус и Сонь тонафниенза састь Вифсаидав. Вятсть Иисусти сокор ломань и эняльдсть, токафтолезе сянди кяденц.23Иисус сявозе сокорть кядьта и лихтезе велеста. Сон сельгсь сельмозонза и путомок кядензон сокорть лангс, кизефтезе: «Няят мезевок али аф?»24Сокорсь варжакстсь перьфпяльге и мярьгсь: «Мон няян ломатть. Синь кода шуфтт, но якайхть».25Тяда меле Иисус тага путозень кядензон сокорть сельмонзон лангс и мярьгсь варжакстомс перьфпяльге. И ломанць пчкясь, кармась семботь няемонза лац.26Иисус кучезе сонь куду, мярьгсь: «Вели тят сувсе и тянь колга киндиге тят азонда велеса».

Пётр лувсы Иисусонь Христоскс

(Матф. 16:13-20; Лук. 9:18-21)

27Иисус тусь тонафниензон мархта Филиппонь Кесария ошенц маластонь веленятненди. Ки лангса Сон кизефтезень тонафниензон: «Мезе арьсихть ломаттне, киян Мон?»28Синь каршезонза мярьгсть: «Финцне корхтайхть: Тон – Иоанн Кстиндайсь, омбонцне: Тон – Илиясь. Лиятне арьсихть: Тон пророкнень ёткста фкясь».29Иисус кизефтезень синь: «А тинь кода арьсетяда, киян Мон тяфтамсь?» Пётр мярьгсь каршезонза: «Тон Христоссят».30Иисус кардазень синь: киндинге афольхть азонда Сонь колганза.

Иисус азонды Эсь куломанц колга

(Матф. 16:21-23; Лук. 9:22)

31Иисус ушедсь тонафтома эсост: «Ломанень Цёрати сави лама маятамс. Сонь эздонза потайхть ломаньтналонь оцюнятне, озксвятиень оцюнятне и койти тонафтыхне. Сонь шавсазь, но колмоце шиня Сон вельмай кулофста».32Иисус тянь колга корхтась видеста. Эста Пётр тердезе Сонь ширеняв и ушедсь карнемонза.33Но Иисус шарфтсь, варжакстсь тонафниензон лангс и кемоста мярьгсь Пёторонь каршес: «Аертт ваксстон, Сатана! Тон мяльхне-арьсематне ломанень, а аф Шкайть эзда».

Иисус корхтай мельганза молемать колга

(Матф. 16:24-28; Лук. 9:23-27)

34Тяда меле тердезень ваксозонза ломаттнень и тонафниензон, мярьгсь тейст: «Кинь мялец молемс Монь мельган, ся катк макссы эсь прянц Тейне, сявсы крёзонц и моли мельган.35Сяс мес кие ёрай ванфтомс эсь эряфонц, ся юмафтсы сонь, а кие юмафтсы эряфонц Монь инксон и Пара кулять инкса, ся ванфтсы сонь.36Кодама лезкс ули ломанти, кда сон сявондярясы эстейнза сембе масторлангть, а эсь ваймонц юмафтсы?37Али мезе максы ломанць эсь ваймонц мрдафтоманкса?38Кие виздьсамань Монь и Монь валнень тяниень пежу и Шкайти полафни ломаттнень инголе, сянь Ломанень Цёраське виздьсы, мзярда сай Эсь Алянц иневалдса иняру ангелхнень мархта».


предыдущая глава Глава 8 следующая глава