Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 8

Иисусонь мельге моли аватне

1Курокста тяда меле Иисус тусь ошева и велева Шкаень Оцязорксшить колга Пара кулять азондома; мархтонза ульсть кемгафтувотне2и мзярошка ава, конатнень Сон пчкафтозень кяжи ваймопожфта и урмада: Магдаласта Мария, конаста Иисус панць сисем кяжи ваймопожфт,3Хузань, Иродонь кудвятиенц, рьвац – Иоанна, Сусанна и ламоц лиятне, кит эсь уликсстост лездсть Иисусонди и Сонь тонафниензонды.

Валвеляфкс сёронь видить колга

(Матф. 13:1-9; Марк 4:1-9)

4Весть, мзярда пуромсь лама ломань – а Тейнза сашендсть сембе ошнень эзда – Иисус азондсь тейст валвеляфкс:5«Лиссь видись видема, и мзярда сон видесь, кона-кона видьмотне прасть кить ваксс, тапсевсть и нармоттне кочказь синь;6конат-конат прасть кеву вастс. Синь нолдасть лисьфкат и коськсть, сяс мес вастсна аф летьколь.7Кона-кона видьмотне прасть сялги тише ёткс, кассь тишесь и опаптозень лисьфкятнень.8А конат-конат прасть пара модас, синь кассть и кандсть сядонь-крда раштафкс». Тянь азомда меле Иисус ювадсь: «Кинь улихть кули пиленза, ся катк кульсы!»

Валвеляфксть смузец

(Матф. 13:10-23; Марк 4:10-20)

9Тонафниенза кизефтезь Сонь: «Мезень колга корхтай тя валвеляфкссь?»10Сон мярьгсь: «Тейнть максф содамс Шкаень Оцязорксшить салавашинзон, а лядыхненди корхтан валвеляфксса; тяфта синь ваныхть и аф няихть, кулхцондыхть и аф шарьхкодихть.11Вов мезе тя валвеляфксть смузьса; видьмось – тя Шкаень вал.12Ки ваксс прафне – нят сят, конат кульсазь валть, но сяльде сашенды идемэвозсь и салсесы валть седистост, сяс синь аф кемайхть кульфти и аф улихть идефт.13Кеву вастс прафне – нят сят, кит валть кулемста кенярдезь путсазь сонь седизост, но синь аш юрсна, сяс аф ламос кемайхть и стакашиса варчсемста потайхть кемамада.14Сялги тишес прафне, нят сят, кит кульсазь валть, но пингонь ётазь эрь шинь тефне, ярмаконь и топоцьта эряфонь мельге панцемась опаптсазь валть и сон аф максы раштафкс.15Цебярь модас прафне, нят сят, кит ляпе и ару седисост марясазь валть, ванфтсазь сонь и кирдемшкаснон вельде каннихть раштафкс».

Азомок тянь, ювадсь: «Кинь улихть кули пиленза, катк кульсы!»

Валвеляфкс валдть колга

(Марк 4:21-25)

16«Крьвястьф штатолть кивок аф вельхнесы кядьгоса, афи путсы удома вастть алу, а путсы сонь штатолонь кирдемас, няевоза валдоц сувайхненди.17Вдь сембе кяшфсь арай няевикс, и сембе салаваннесь арай содафокс и лиси лангти.18Сяс ванода эсь мельгант, кода тинь кулхцонттада. Вдь кинь ули, сянди максови, а кинь аш, сянь кядьста сявови сявок, мезть лувондсы сонценнекс».

Иисусонь тядяц и брадонза

(Матф. 12:46-50; Марк 3:31-35)

19Тяда меле Иисусти састь тядяц и брадонза, но лама ломань ёткова ашесть ётав Тейнза.20Тейнза макссть содамс: «Тядяце и браттне ушесот, мяльсна няемс Тонь».21Иисус каршезост мярьгсь: «Монь тядязе и брадне нят, кит кулхцондсазь Шкаень валть и пяшкотькшнесазь сонь».

Иисус сетьмофтсы даволть

(Матф. 8:23-27; Марк 4:35-41)

22Фкя шиня Иисус Эсь тонафниензон мархта озась венчс и мярьгсь тейст: «Ётатама эрьхкть тона трвазонза». Синь кармасть ётама.23Уемста Иисус матодовсь. Эрьхкса кеподсь давол, ведькомболксне лоськофнесть венчезост. Синь повсть пелькс палас.24Тонафниенза нежедсть Иисусонди, стяфтозь: «Тонафты! Тонафты! Ваятама!» Сон стясь, кардазе вармать и ведень комболфть; сят лоткасть, и арась сетьме.25Эста Сон мярьгсь тейст: «Коса кемаманте?» Тонафниенза эводембачк дивандазь корхтасть фкя-фкянди: «Кие Тя, кона кошярясыне варматьке, ведтьке, и сят кулхцондсазь?»

Иисус панцы аф ару ваймопожфть ломанть потмоста

(Матф. 8:28-34; Марк 5:1-20)

26Сяльде синь уйсть Галилеять каршеста Гадарина мастору.27Эрьхке трвав лисемста Иисусть каршес повсь ошень ломань, конань эса ульсть кяжи ваймопожфт, щапт сон кунаркиге ашезь щакшне, эрясь аф кудса, а калмонь кевботмарса.28Сон кодак няезе Иисусонь, пешкодозь прась пильгозонза и вярьгак вайгяльхть ювадсь: «Иисус, Инь Вярдень Шкайть Цёрац, мезе Тейть эздон эряви? Эняльдян Тейть, тямак маятафта!»29Сон мярьгсь тяфта сяс, мес Иисус кошардозе аф ару ваймопожфть лисемс тя ломанть потмоста. Куватьс ни тя ломанць повф аф ару ваймопожфть кядс, и хуш ломанть сотнекшнезь цинзерса кяднек-пильгонек, ванфтозь, сон сяка сязендезень цинзерхнень. И кяжи ваймопожфсь сонь панцезе шава вастова.30Иисус кизефтезе сонь: «Кода лемце?» Сон каршезонза: «Легион», – мярьгсь тяфта, сяс мес лама кяжи ваймопожфта сувась эзонза.31Синь эняльдсть Иисусонди аф панцемс синь потмаксфтома томбати.

32Тяка маласа, панда лангса, вановсь тувонь оцю стада; кяжи ваймопожфне эняльдсть Иисусонди: мярьгоза сувамда тувотнень потмос. Сон мярьгсь тейст.33Кяжи ваймопожфне лиссть ломанть эзда и сувасть тувотнень потмос; тувонь стадась сери трваста комотсь эрьхкти и ваясь.

34Тувонь ваныхне, няемок мезе лиссь, ворьгодсть и азондозь тянь ошса и перьфпяльдень аймакова.35Ломаттне састь ваномонза, мезе тиевсь. Иисусонди маладомста няезь ся ломанть, конаста лиссть кяжи ваймопожфне: сон ащесь озада Иисусонь пильгонзон ваксса, щаф-каряф, шумбра ёньца, и синь сявозень пелема.36Няихне азондозь сафненди, кода пчкясь кяжи ваймопожфса колафсь.37Эста Гадарина масторонь сембе ломаттне эняльдсть Иисусонди тумс тоста, сяс мес синь сявозень оцю пелема. Сон озась венчс, срхкась тумс меки.38Алясь, конаста лиссть кяжи ваймопожфне, эняльдсь сявомда сонь мархтонза. Иисус мрдафтозе сонь, мярьгсь:39«Мрдак кудозт и азонтк, кодама оцю тев тись тейть Шкайсь». Алясь тусь и азондозе марнек ошти, мезе тись тейнза Иисус.

Иисус вельмафтсы кулофста синагогань оцюнять стиренц и пчкафтсы сяряди авать

(Матф. 9:18-26; Марк 5:21-43)

40Мзярда Иисус мрдась меки, ломаттне кенярдезь васьфтезь Сонь, сяс мес сембе учсть эсонза.41Вов сась Иисусонди синагогань оцюня, лемоцоль Иаир. Сон прась Иисусонь пильгс, эняльдсь сувамс пялонза.42Сонь ульсь кемгафтувошка кизоса фкя-тяка стирняц, кона кулома лангсоль.

Тов молемста ломаттне пяк эцесть Иисусонди.43Ётксостоль ава, кона кемгафтува киза сярядсь веронь шудемаса. Сон ётафтозе марнек уликсонц пчкафтыхнень лангс, но киндинге ашезь пчкафтов.44Сон маладсь Иисусти фталда, токазе щам пенянц; эстокиге вероц лоткась шудемда.45Иисус кизефтсь: «Кие токамань?» Кивок ашезь виденця, эста Пётр мярьгсь: «Тонафты! Ломаттне перьфкат эцезь эцихть!»46Но Иисус мярьгсь: «Кати-кие токамань: Мон маряйне, кода эздон лиссь вий».47Авась няйсы – аф сёпови, трнатозь мольсь и прась Иисусонь пильгс, и сембе ломаттнень инголе азондозе, кодама туфталонкса токазе Сонь и кода эстокиге пчкясь.48Иисус мярьгсь тейнза: «Стирняй, тят пеле, кемамаце пчкафтонзе тонь; архт сетьмошиса».

49Иисус ашезе адела корхтаманцка, кода сась кати-кие синагогань оцюнять кудста и мярьгсь оцюняти: «Стирце кулось, тяк томошинда Тонафтыть».50Тянь кулезь, Иисус мярьгсь Иаиронди: «Тят пеле, аньцек кемак – и стирце ули пчкафтф».51Куду самста Сон киндинге ашезь мярьге сувамс мархтонза потму, Пёторда, Иоаннда, Иаковда и стирнять тядядонза-алядонза башка.52Кудса сембе авардсть и явсесть стирнять инкса. Иисус мярьгсь: «Тяда аварде; сон ашезь кула, уды».53Синь пеедсть Иисусонь лангса, вдь содазь шабать куломанц.54Сон сявозе стирнять кядьта, кайгиста мярьгсь: «Стирня, стяк!»55Стирнять ваймопожфоц мрдась. Сон эстокиге стясь; и Иисус мярьгсь андомс сонь.56Тядянза-алянза дивандасть. Иисус мярьгсь тейст киндинге аф азондомс, мезе лиссь.


*а 8:48 Тя валсь греконь кяльста нинге ётафневи кода: идензе.


предыдущая глава Глава 8 следующая глава