Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 6

Иисус анды вете тёжятть ломань

(Матф. 14:13-21; Марк 6:30-44; Лук. 9:10-17)

1Тяда меле Иисус тусь Галилеянь эрьхкть тона пяли, тя эрьхкть нинге лемнезь Тивериадань эрьхкокс.2Мельганза мольсь пяк лама ломань, сяс мес синь няезь дивань тефнень, конатнень Сон тиендезень сярядихнень пчкафнемста.3Иисус куцсь панда пряс и озась тоса Эсь тонафниензон мархта.4Малаткшнесь еврейхнень Очижисна.

5Иисус кеподезе сельмованфонц и няезе: ширезонза сай пяк лама ломань. Сон корхтай Филиппонди: «Коста раматама кши ня ломаттнень андомс?»6А Сон тяфта корхтась сяс, мес ёразе содамс Филиппонь мяленц; Сонць ни содазе, мезе кармай тиема.7Филипп мярьгсь каршезонза: «Кда и рамалеме кафта сятт динарийда кши, сянь эздовок пакшкяньге афоль сата эрь ломанти».8Лия тонафнись, Андрей, Симон Пёторонь брадоц, корхтай Тейнза:9«Тяса фкя цёранять улихть шужень вете кшинза и кафта калонза; аньцек тя мезе тняра ломанти?»

10Иисус мярьгсь: «Мярьгода ломаттненди озсемс». Ся вастса кассь туста тише, и ломаттне озсесть, ётксостоль ветешка тёжянь аля.11Иисус сявозень кшитнень, сюконясь Шкайти, и явозень тонафниензонды, а тонафниенза ломаттненди. Тяфта тись калхнень мархтовок. И ломаттне сявондсть кинь мзяра мялец.12Мзярда топодемс ярхцасть, Иисус азозе Эсь тонафниензонды: «Кочкасть лятф сускопнень, мезевок тяза юма».13Синь кочказь, и пяшкодезь кемгафтува кептерьхнень кши сускомса, конатнень кадозь шужень вете кшида ярхцайхне.

14Мзярда ломаттне няезь Иисусть тя тиф тяштьксонц, мярьгсть: «Тя видекс ся пророксь, конанди сама масторть лангс».15Иисус кодак содазе – синь ули мяльсна сявомс Сонь и вихца арафтомс оцязоркс, Сон тага тусь пандть пряс ськамонза.

Иисус моли ведть ланга

(Матф. 14:22-27; Марк 6:45-52)

16Сась илядьсь, и Иисусть тонафниенза валгсть эрьхкть трвас.17Синь озасть венчти, тусть эрьхкть тона пяли, Капернауму. Шопотькшнесь ни, а Иисус ашезь сашенда ширезост.18Яфодсь вии варма, и эрьхксь комболгодсь.19Мзярда синь уйсть комсь ветиешка али колмоньгемоньшка стадион, няезь Иисусонь, кона мольсь ведть ланга и малаткшнесь венчти. Синь эводсть.20Но Сон мярьгсь тейст: «Тя Монан, тяда пеле».21Синь ёразь озафтомс Сонь венчти; и венчсь эстокиге токась эрьхкть ся трвазонза, коза синь уйсть.

Эряфонь максы кши

22Омбоце шиня ломаттне, конат лядсть эрьхкть тона пяли, няезь: тоса ульсь аньцек фкя венч, коза озсесть Иисусть тонафниенза. Иисус ашезь озсе венчти тонафниензон мархта, синь тусть Соньфтомонза.23Ся пингоня састь Тивериадаста лия венчт ся вастть малас, коса ломаттне ярхцасть кшида Азорть бславамдонза меле.24Тяфта, мзярда ломаттне няезь: Иисус аш, тонафниензовок ашет, синь озасть ня венчненди и уйсть Капернауму Иисусть вешендема.

25Мзярда музь Сонь эрьхкть тона пяльде, мярьгсть Тейнза: «Равви! Мзярда сать тяза?»26Иисус каршезост мярьгсь: «Видеста корхтан тейнть: тинь Монь вешендьсамасть аф сяс, мес няендесть тяштьксонень, а сяс, мес ярхцаде кшида и топодеде.27Прафтода аф ся ярхцамбяльти, кона коли, а ся ярхцамбяльти, кона аф коли и максы пефтома эряф. Тянь казьсы тейнть Ломанень Цёрась; вдь Алясь, Шкайсь, путозе Эсь тяштьксонц Ломанень Цёрать лангс».

28Эста мярьгсть Тейнза: «Мезе тейнек эряви тиемс: улельхть минь тевоньке Шкайть мяленц коряс?»29Иисус мярьгсь каршезост: «Вов Шкайть мяленц коряс тевсь: кемада Сянди, кинь Сон кучезе».30Сят каршезонза: «А кодама тяштькс няфтят, конань няемста минь кемалеме Тейть? Мезе Тон тиендят?31Атянь-атяньке ярхцсесть шавмодаса маннада, кода азф Сёрматфксса: "Сон макссь тейст ярхцамс кши менельста"».32Иисус мярьгсь тейст: «Видеста корхтан тейнть: аф Моисей макссь тейнть кши менельста, а Монь Алязе максси тейнть афкуксонь кши менельста.33Вдь Шкаень кшись – Ся, кие валгонды менельста и максси масторлангти эряф».

34Тянь каршес мярьгсть Тейнза: «Пара ломань! Макссек тейнек фалу тяфтама кши».35А Иисус тейст мярьгсь: «Мон – эряфонь максы кшисян; Тейне сашендысь аф ули вачеда, и Тейне кемайть мзярдовок аф сай симомац.36Но кода Мон азыне тейнть: няемасть Монь и аф кематада.37Сембе, кинь Алязе макссесыне Тейне, сайхть Тейне; и Тейне сайть аф панца.38Мон валгонь менельста аф Эсь мялезень, а Монь Кучиезень, Алязень мяленц тиема.39А Монь Кучиезень мялец тяфтама: сембонь ёткста, кинь Сон максозе Тейне, киньге аф юмафтомс, а сембонь синь вельмафтомс мекольце шиня.40Кучиезень мялец тяфтама: эрть, кие няйсы Цёрать и кемай Тейнза, сянь ули пефтома эряфоц; и Мон вельмафтса сонь мекольце шиня».

41Еврейхне лангозонза изгордсть, сяс мес Сон мярьгсь: «Мон ся кшись, кона валгсь менельста».42Синь корхтасть: «Дяряй тя аф Иисуссь, Иосифонь цёрац, конань алянц и тядянц минь содасаськ? Кода стане Сон корхтай: Мон валгонь менельста?»43Иисус каршезост мярьгсь: «Лоткада изгордомда эсь ётковант.44Кивок аф сай Тейне, кда аф вятьсы Алязе, Монь Кучиезе; и Мон вельмафтса ся ломанть мекольце шиня.45Пророкнень ули сёрматфсна: "И сембонь тонафтсыне Шкайсь". Эрь ломанць, кона кулхцондозе Алязень и тонадсь эздонза, сай Тейне.46Но тяса Mон аф корхтан, бта кивок няезе Алять, Шкайть пяльде Сайть башка. Аньцек Сон няезе Алять.47Видеста корхтан тейнть: Тейне кемайть ули пефтома эряфоц.48Мон – эряфонь максы кшисян.49Атянь-атянте ярхцасть шавмодаса маннада и сяка кулость.50Но кшись, кона валги менельста, тяфтама: эздонза ярхцайсь аф кулы.51Мон менельста валкф эряфонь максы кшисян: тя кшида ярхцайсь кармай эряма пефтома. Кшись, конань Мон максса, – Монь ронгозе, конань Мон максса масторлангонь эряйхнень инкса».

52Эста еврейхне кармасть эсь ётковаст пялькстома: «Кода Сон макссы тейнек ярхцамс Эсь ронгонц?»53Иисус мярьгсь тейст: «Видеста корхтан тейнть: кда аф ярхцатада Ломанень Цёрать ронгтонза и аф сиптяда Сонь вердонза, эста аф ули тинь эсонт эряф.54Монь ронгтон ярхцайть и вердон симить ули пефтома эряфоц; и Мон вельмафтса сонь мекольце шиня.55Вдь Монь ронгозе – афкуксонь ярхцамбяль, и Монь верозе – афкуксонь симомбяль.56Монь ронгтон ярхцайсь и вердон симись ащи Монь эсон, и Монга эсонзан.57Алязе, конац эряй, кучемань Монь, и Мон эрян Сонь вельденза. Тяфта Моньдон ярхцайське кармай эряма Монь вельден.58Вов кодама менельста валкф кшись. Сон аф кода маннась, конада ярхцасть атянь-атянте и кулость: тя кшида ярхцайсь кармай эряма пефтома».

59Тянь Сон корхтазе Капернаумонь синагогаса тонафтомста.

Ламоц тонафнихне кадсазь Иисусонь

60Тянь марямок, тонафниензон эзда ламотне корхнесть: «Кодама стака тонафтомац! Кие кармай Сонь кулхцондомонза?»61Но Иисус Эсь потмосонза марязе тонафниензон пеняцямаснон и мярьгсь тейст: «Кали тянь эзда керовсь седиенте?62Мезе ина улель мархтонт, кда няендярялесть Ломанень Цёрать кеподеманц тоза, коса ульсь тяда инголе?63Аньцек Ваймопожфсь кази эряф, ломанть тяса аш виец. Валхне, конатнень Мон тейнть азыне, – ваймопожф и эряма.64Но ётксонт ули мзярошка аф кемайда». Вдь Иисус ушетксстокиге содазень, кит аф кемайхть и кие Сонь мисы.65Иисус мярьгсь: «Сяс Мон корхтань тейнть: кивок аф сай Тейне, кда тейнза тянь аф макссы Монь Алязе».

66Тяда меле тонафниензон ёткста ламотне тусть ваксстонза и лоткасть мархтонза якамда.67Эста Иисус мярьгсь кемгафтувотненди: «Тиньге ули мяленте тумс эздон?»68Симон Пётрсь мярьгсь каршезонза: «Азор! Кинди минь мольхтяма? Тонь кядьсот валхне, конат максыхть пефтома эряф.69И минь кармаме кемама и лац шарьхкодеськ: Тон Христоссят, эряй Шкайть Цёрацат».70Иисус каршезост корхтась: «Дяряй аф Монць кочкадязь тинь, кемгафтувотнень? И сембе сяка, фкясь ёткстонт – идемэвозь».71Тяфта Иисус корхтась Иудань, Симон Искариотонь цёранц колга. Иудась кемгафтувотнень ёткста фкясель и сембе сяка пингонь ётазь мисы Иисусть.


*а 6:9 шуж – ячмень

*б 6:19 Стадион – тя кувалмонь ункстама, конань эса 185м.


предыдущая глава Глава 6 следующая глава