Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JEVANGELII MARKAN MUGAH

ARBAITUSPAGINAT JUMALAN VALDUKUNDAH NÄH 4:1-34

Глава 4

Külväi

(Matf. 13:1-9; Luk. 8:4-8)

1Iisus tuli müös opastamah järven rannale. Hänes ümbäri kerävüi muga äijü rahvastu, ga Hänel pidi mennä veneheh. Häi istui venehes järvel, a rahvasjoukko oli rannal.2Häi opasti heidü äijäh dieloh arbaituspaginoin vuoh.

Opastajes Häi sanoi heile nenga:3«Kuulkua! Mies lähti külvämäh.4Konzu häi külvi, erähät siemenis kirvottih dorogupieleh, i linnut tuldih da süödih jüvät.5Erähät kirvottih kivikkökohtah, kus oli vähä muadu. Terväh net nostih orahale, ku ei olluh muadu muga süväh.6No konzu nouzi päiväine, se polti orahat, i net n'äivistüttih, ku niilöil ei olluh juurii.7Erähät kirvottih ohtoloin keskeh, ohtoit kazvettih da salvattih orahat, ei niilöis suadu sualistu.8No erähät jüvis kirvottih hüväh muah. Net nostih orahale, kazvettih i annettih sualis, kudai kolmekümmen, kudai kuuzikümmen, kudai sada jüviä.»9I Häi sanoi: «Kel on korvat, se kuulkah!»

Mindäh Iisus pagizi arbaituspaginoil?

(Matf. 13:10-17; Luk. 8:9-10)

10Konzu Iisus jäi üksinäh, kaksitostu opastujua da muut Hänenke olijat küzüttih nämih arbaituspaginoih näh.11Häi sanoi heile: «Teile on annettu tiediä Jumalan valdukunnan peittodielo, no toizile, ulgopuolizile, kai tulou arbaituspaginoin kauti,12
ku hüö kaččojen kačottas,
no ei nähtäs,
kuunnelten kuultas,
no ei ellendettäs,
da ku hüö ei kiännüttäs Jumalan puoleh
da ei suadas prosken'n'ua.»

Arbaituspaginan sellitüs külväjäh näh

(Matf. 13:18-23; Luk. 8:11-15)

13Sit Iisus sanoi: «Ku tüö etto ellendä tädä arbaituspaginua, ga voittogo ellendiä toizet arbaituspaginat?14Külväi külväü sanan.15Dorogupieleh külvettü siemen on rahvahah näh, kudamat kuultah sana, no tulou sattan da koppuau sen, mi heih oli külvettü.16Külvö kivikkökohtah on niilöih näh, kudamat sanan kuultuu kerras otetah se vastah hüväl mielel.17No heis ei ole juurdu ičes, sendäh hüö kestetäh vai kodvaine, a ku tulou ahtistus libo painandu sanan täh, sit hüö kerras hüllätäh se sana.18Sit on siemen, kudai külvettih ohtoloin keskeh. Se on niilöih näh, kudamat kuultah sana,19no kudamis sana ei tuo andimii, ku tämän muailman huolet, eloloin suvaičendu da muut mielitahtot heijän südämeh puuttuhuu täpätäh sana.20A hüväh muah külvämine on ristikanzoih näh, kudamat kuultah sana da otetah se vastah. Hüö annetah hüvä sualis, kudai kolmenkümmenen-, kudai kuvvenkümmenen-, kudai suankerdaine.»

Sanan kuundelemine

(Luk. 8:16-18)

21Iisus sanoi: «Eihäi lampua tuvva pertih vakan libo magavosijan alle pandavakse? Nägevihhäi se pannah!22Ku mi ollou peitos, ga vai sikse, ku jiäviekseh. Ku mi ollou peitettü, ga vai sikse, ku tulla nägevih.23Kel on korvat, se kuulkah!»24Vie Häi sanoi heile: «Otakkua vardeh, midä kuuletto. Mittumal miäräl tüö miäriättö, moizel miärätäh teile da vie ližätäh.25Kel on, sille annetah, kel ei ole, sil otetah segi, mi hänel on.»

Ičessäh kazvai vil'l'u

26Iisus sanoi: «Tämänmoine on Jumalan valdu. Mies külväü siemenen muah.27Häi üöl maguau, a päiväl nouzou, a siemen orastau da kazvau, a häi ni tiijä ei, kui.28Mua andau sualehen ičessäh, enzimäi korren, sit tähkän, sit tävven jüvän tähkäh.29Konzu vil'l'u on sualistunnuh, kerras häi tüöndäü leikkuajat, ku leikkuanduaigu on tulluh.»

Gorčitsan siemen

(Matf. 13:31-32, 34; Luk. 13:18-19)

30Sit Iisus sanoi: «Mih vie müö voizimmo verrata Jumalan valdua? Mittumal arbaituspaginal voizimmo sanella sih näh?31Se on ku gorčitsan siemen. Konzu gorčitsan siemen külvetäh muah, se on muailman siemenis kaikis pienin,32no muah puuttuhuu, se nouzou da kazvau kaikkii kodipellon kazvoksii suurembakse. Sit kazvetah moizet suuret oksat, ga taivahan linduzet voijah luadie pezii niilöin pilvekseh.»33Äijil nengomil arbaituspaginoil Häi pagizi rahvahanke sen verran, min hüö voidih kuunnella.

34Arbaituspaginoittah Häi ei paissuh heijänke, no omile opastujile sellitti kai, konzu hüö oldih keskenäh.

SUURET KUMMAT 4:35-5:43

Iisus tüünistüttäü järven

(Matf. 8:23-27; Luk. 8:22-25)

35Illan tulduu sennü päivännü Iisus sanoi opastujile: «Lähtekkiämmö toizele rannale.»36Opastujat jätettih rahvasjoukko, a iče mendih veneheh. Iisus jo istui venehes. Heijänke lähtiettih toizetgi venehet.37Järvel nouzi suuri bauhu, allot perrettihes veneheh, i se oli jo täüttümäs viel.38A Iisus magai venehen peräs, pielus piänpohjis. Opastujat nostatettih Händü i sanottih: «Opastai, etgo ni huoles ole, müö uppuommo!»39Iisus nouzi, kieldi tuuldu da sanoi järvele: «Azetu, ole hil'l'ah!» Tuuli hil'l'eni, i rodih ihan tüüni.40Iisus sanoi heile: «Miksebo oletto nengozet varačut? Eigo teil viegi ole uskuo?»41Suuri varavo otti heidü valdah, i hüö küzeltih toine toizel: «Mibo miehii tämä on, ku Händü kuunnellah tuuli dai allot?»


предыдущая глава Глава 4 следующая глава